پوليسەيلەر حالىققا ءبىرتابان جاقىنداي ءتۇستى. الماتىدا كەلەسى جىلى سەنبى مەن جەكسەنبى كۇنى دە جۇمىس ىستەيتىن 12 ىلگەرى-كەڭسە اشىلادى.

بۇدان بىلاي تۇرعىندار ءتارتىپ ساقشىلارىنا تەز ارادا ارىز-شاعىمدارىن تاستاپ، وعان قوسا، قۇقىقتىق كومەك تە الا الادى. فرونت-كەڭسەلەر قالاي جۇمىس ىستەيدى؟ ءقازىر قاي اۋداندا قۇرىلىسى باستالدى؟

الماتىدا 2 ايدان بەرى جەتىسۋ اۋداندىق پوليسيا باسقارماسى تەكسەرۋ پۋنكتىنىڭ ءىشىن كەڭەيتىپ، كىشىگىرىم فرونت-كەڭسە اشتى. بۇل جاڭاسى سالىنعان دەيىن ۋاقىتشا جۇمىس ىستەيدى دەيدى قۇزىرلىلار. ويتكەنى، يگى باستامانىڭ ناتيجەلى ەكەنىن بايقاعان ءتارتىپ ساقشىلارى تاجىريبەنى قازىردەن باستاپ ەنگىزۋدى ءجون كورگەن. جۇمىس ىستەۋ ءتارتىبى وڭاي. ارىزدانۋشى كەلگەن بويدا كەڭەسشى كابينەتتەرگە سابىلتپاي بىردەن ەسىكتەن قارسى الادى. كەرەكتىسىن تاۋىپ بەرىپ، ۋاقىت شىعىنداماستان جۇمىسىن بىتىرۋگە سەپتەسەدى. كەڭەسشىنىڭ قىزمەتىنە كۇنىنە شامامەن، 50 شاقتى ادام جۇگىنەدى ەكەن.

«جۇمىسىمىز بۇرىنعىعا قاراعاندا ءقازىر اناعۇرلىم ىلگەرىلەي ءتۇستى. ءقازىر ارىزدانۋشىلاردى جاقسى قارسى الامىز. ەشقانداي كەزەك كۇتۋ دەگەن بولمايدى. كەلگەن كىسىلەر ىشكە قاراي كىرىپ كەتە الادى. باقىلاۋ-وتكىزۋ بەكەتى بۇرىن شاعىن ەدى. 2-3 ادام كەلسە، بۇل جەردە اينالاتىن ورىن قالمايتىن. ءقازىر ونى كەڭەيتىپ، كەلگەن كىسىلەرگە بارىنشا قولايلى مۇمكىندىك جاساپ جاتىرمىز»، – دەدى الماتى قالاسى جەتىسۋ اۋداندىق پوليسيا باسقارماسى كەزەكشى ءبولىمىنىڭ باسشىسى مۇرات داۋرەنبەكوۆ.

جەتىسۋ اۋداندىق پوليسيا باسقارماسى جانىنداعى فرونت-كەڭسە تاڭعى ساعات 8:00-دەن اشىلىپ، كەشكى 20:00-گە دەيىن جۇمىس ىستەيدى. ءتىپتى، اپتانىڭ سەنبى مەن جەكسەنبى كۇنىنە دە قارامايدى. ال كەلەسى جىلى حالىق ءۇشىن بۇدان دا جايلى جاعداي جاسالماق. جاڭا نىساندا كۇتۋ زالى قاراستىرىلىپ، قىلمىستىق جانە اكىمشىلىك پوليسيا قىزمەتكەرلەرى، سونداي-اق زاڭگەرلەر كەڭەس بەرەدى.

«مەنىڭ جول كولىك اپاتىنا قاتىستى ماسەلەم بولدى. پوليسيا باسقارماسىنا كەلگەندە كەڭەسشى قارسى الىپ، بىردەن قايدا بارۋ، نە ىستەۋ كەرەكتىگىن ءتىزىپ ايتىپ بەردى. بۇل ستراتەگيالىق نىسان بولعاندىقتان، كىرۋ قيىندىق تۋعىزادى. كەز كەلگەندى كىرگىزە بەرمەيدى. دەگەنمەن، بۇگىن كەرەكتى كابينەتتى تەز تاۋىپ، جۇمىسىمدى از ۋاقىتتا تىندىردىم. اينەك فرونت-كەڭسە سالىنادى دەگەندى ەستىگەنمىن. جاقسى بولار ەدى»، – دەدى ءىلياس قاسەنبايەۆ.

ءقازىر تۇركسىب اۋداندىق پوليسيا باسقارماسىنا قاتىستى فرونت-كەڭسەنىڭ قۇرىلىسى قارقىندى جۇرگىزىلۋدە. زاماناۋي ۇلگىدە سالىناتىن نىساننىڭ ءارقايسىسى شامامەن، 65 شارشى مەتردى قۇراماق. ال جەمقورلىقتى ازايتۋ ماقساتىندا سىرتى ءتوزىمدى عانا ەمەس، سونداي-اق، ءبارىن سىرتتاي كەدەرگىسىز باقىلاۋعا بولاتىن اينەكتەن جاسالادى.

كەلەر جىلى ادام¬دار¬دى اۋرە-سارساڭعا سالماي، مۇڭ-مۇقتا¬جىن ءبىر جەردەن شەشۋ ءۇشىن جالپى سانى 12 فرونت كەڭسە سالىنباق. ول ءۇشىن 300 ميلليون تەڭگەدەن استام قارجى بولىنگەن. ايتا كەتەيىك، ءبىر تەرەزە قاعيداسى نەگىزىندە جۇمىس ىستەيتىن نىسان اۋداندىق باسقارمالاردا ءبىر تيپتە سالىنادى. ونىڭ ەنى 6 مەتر، ال ۇزىندىعى 11 مەتردى قۇرايتىن بولادى.