الماتىنىڭ بارلىق ۇستازدارى كاسىبي بىلىكتىلىكتەرىن ارتتىرۋ ءۇشىن قايتا دايارلىق كۋرسىنان وتەدى.

بۇگىن قالا اكىمدىگى مەن «نازاربايەۆ زياتكەرلىك مەكتەپتەرى» ەكىجاقتى مەموراندۋمعا قول قويدى. قۇجاتقا سايكەس، شاھارداعى جالپى ءبىلىم بەرەتىن مەكتەپتەردىڭ مۇعالىمدەرى ءبىلىم جەتىلدىرەدى. ۇستازدار يننوۆاسيالىق ءبىلىم بويىنشا كاسىبي دەڭگەيدى ارتتىرادى. 127 كۋرستان تۇراتىن ءدارىس بارلىق پەداگوگتى قامتيدى. ياعني، باستاۋىش سىنىپقا ساباق بەرەتىن ۇستازدان باستاپ، ديرەكتورعا دەيىن قايتا ساۋات اشپاق. ماڭىزدى قۇجاتقا قول قويعان قالا اكىمى باۋىرجان بايبەك ۇستازداردىڭ بىلىكتىلىگىن ارتتىرۋ ءبىلىم ساپاسىن كوتەرۋگە سەپتەسەتىنىن قاداپ ايتتى.

«الماتى قالاسى مەكتەپتەرىنىڭ 74،3 پايىز وقۋشىلارى نازاربايەۆ زياتكەرلىك مەكتەپتەرىنىڭ وقىتۋ جۇيەسى بويىنشا ءبىلىم الۋدا. ال 2020 جىلى بارلىق مەكتەپتەگى وقۋشىلار 100 پايىزعا جاڭارتىلعان ءبىلىم مازمۇنىنا كوشەتىن بولادى. ەندى ءبىزدىڭ ۇستازدارعا كەلەتىن بولساق، ەڭ باستىسى، ءاربىر ۇستاز ساباقتى جاڭاشا وتكىزسە، ونى رەفورما دەپ ساناۋعا بولادى»، – دەدى الماتى قالاسىنىڭ اكىمى باۋىرجان بايبەك.

ۇستازدار قاۋىمى دايارلىق كۋرستارىندا جاڭارتىلعان ءبىلىم مازمۇنىن عانا مەڭگەرىپ قويمايدى. ۇجىمدا جۇمىس ىستەۋ جولدارىن، وقۋشىلاردى زەرتتەۋ جانە اتا-انامەن ءتىل تابىسۋدىڭ دا قىر-سىرىن مەڭگەرەتىن كورىنەدى. سونداي-اق، عالامتوردان ساباققا قولدانۋعا بولاتىن پايدالى ماتەريال ىزدەۋدى دە ۇيرەنەدى. ايتا كەتسەك، مۇعالىمدەردى «نازاربايەۆ زياتكەرلىك مەكتەپتەرىندە» ءدارىس بەرەتىندەر مەن ارنايى ترەنەرلەر وقىتادى.

«بىرىنشىدەن، قاراپايىم مەكتەپتىڭ ءمۇعالىمى جاڭارتىلعان ءبىلىم مازمۇنىن قايتادان مەڭگەرىپ شىعادى. ەكىنشىدەن، جاڭا مەتوديكا مەن تەحنولوگيالاردى قارايدى. ءوزىنىڭ پراكتيكاسىن زەرتتەۋدى ۇيرەنەدى. جالپى، جاڭارتىلعان جاڭا باعالاۋ جۇيەسىمەن تانىسادى. جانە ءبىز ءقازىر وسى جاڭارتىلعان جاڭا باعالاۋ جۇيەسىنە بايلانىستى ەسەپتەر دايىنداۋ، سۇراقتار، تاپسىرمالاردى دايىنداۋدى ۇيرەتەمىز. جالپى، مۇعالىمدەر قايتا دايارلىق كۋرسىنان وتكەن كەزدە تەك لەكسيا تىڭداپ قانا قويماي، بارلىعى بىرىگىپ ساباق جوسپارىن دايىندايدى»، – دەدى «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش شامشيدينوۆا.