1986 جىلى جەلتوقسانداعى قاندى وقيعادا قۇربان بولعان قازاقتىڭ باتىرى ەربول سىپاتايەۆ جايىندا ساقتالعان دەرەكتەردى Qamshy.kz اقپارات اگەنتتىگى وقىرمان نازارىنا ۇسىنادى.
«سىرت كيىمدەرى جىرتىلىپ، يىقتارىنا توگىلگەن شاشتارى قوبىراعان قوس بويجەتكەندى ىعىنا الىپ قورعاشتاي شەگىنگەن ەربول بۇلارعا قۇتىرعان يتشە اقىرىپ جەتىپ كەلىپ، وندى-سولدى كەلتەگىن سەرمەگەن ساۋىتتىنى اياقتان شالىپ كۇلاتتى دا، قاسىنداعىلارعا «تەز قورشاۋدان شىعالىق»، - دەپ قولدارىنان جەتەلەپ، قارسىداعى كوپقاباتتى ۇيلەردىڭ قالقاسىنا قاراي جۇگىردى. بۇلار قارۋلىلار قورشاۋىنان جۇگىرىپ ءوتىپ، تار كوشەنىڭ بويىمەن تومەن قاراي تۇسە بەرگەندە، ارت جاقتان ەستىلگەن ءزىلدى داۋىسقا جالت قاراسا، قولدارىندا ساپەر كۇرەگى بار ەكى فورمالى قۋىپ كەلەدى ەكەن. ەربول قىزدارعا: «ەشتەڭەگە قايىرىلماي تەز جۇگىرىپ، ۇلكەن كوشەگە شىعىپ كەتىڭدەر» دەگەنشە، وكشەلەپ كەلىپ، كوزدەرىنە قان تولعان قارۋلى ەكەۋ باس سالىپ، ەربولمەن ايقاسا كەتتى. قولىنا، يىعىنا تيگەن كۇرەك سوققىلارىنا كاراماستان، ارپالىسقان ەربول ولاردى ءبىرازعا دەيىن الدىرمادى. ۇزىنتۇراسىن جامباسقا سالىپ، الىپ ۇردى. تۇرا بەرگەنى سول ەدى، باسىنا سارت ەتە تۇسكەن سوققىدان اپ-ساتتە كوزى قاراۋىتىپ سالا بەردى. بار كۇشىن جيىپ، ءتونىپ كەلگەن ەكىنشى سوققىعا قولىن توسەپ ۇلگەردى. ءبىراق، اياعى تايعاناپ، ءسۇرىنىپ قۇلادى. وسى ساتتە ورنىنان ارەڭ تۇرىپ ۇلگەرگەن ۇزىنتۇرا جۇگىرىپ كەلىپ، ەربولدىڭ باسىنا اۋىر زاتپەن سالىپ قالدى. قاپىدا قالگان البىرت جاس گۇرس ەتىپ قۇلادى. اياۋشىلىق پەن مەيىرىمدىلىك اتاۋلىنى ۇمىتقان ءالگى ەكەۋى بىلاپىت سوزدەردى كارشا بوراتىپ، قۇلاپ تۇسكەن ەربولدى اياۋسىز تەپكىنىڭ استىنا الدى. اۋىر سوققىلاردان ەربول ەسىن جوعالتتى. ودان ءاءرى نە بولعانىن بىلمەيدى. ەسىن جيىپ، كىرپىگىن كوتەرۋگە عانا شاماسى كەلگەندە، بايقاعانى — ماڭىندا تۇرعان اق حالاتتى دارىگەرلەر ەدى.
الدىندا تۇرگان اق حالاتتىلارعا جالىنى ءسونىپ بارا جاتقان كوزدەرىن قاداپ جاتىپ، ول «قىزدار قۇتىلدى ما ەكەن؟»، - دەپ ويلادى. ولارعا قاراپ جاتىپ، ول «مەن الاڭعا ءولىم ىزدەپ بارعان جوق ەدىم عوي»، «ەلىم-اي، ەرتەڭىڭ نە بولار ەكەن؟» دەپ قينالدى… 1986 جىلى جەلتوقساننىڭ جيىرما ءۇشى كۇنى ەربول سىپاتايەۆ نەبارى 22 جاسىندا اۋرۋحانادا جارىق دۇنيەمەن قوشتاستى.
يءا، ول الاڭعا ءولىم ىزدەپ بارعان جوق ەدى…»
"زاڭ" گازەتى، 1997 جىل 14 جەلتوقسان
پىكىر قالدىرۋ