الماتىدا دەنيس تەننىڭ ءولىمى بويىنشا قىلمىستىق ىسكە قاتىستى ءوتىپ جاتقان سوت وتىرىسىندا جابىرلەنۋشى تاراپتىڭ ادۆوكاتى ءىستى قوسىمشا تەرگەۋگە جىبەرۋدى سۇرادى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. سوتتا جابىرلەنۋشى تاراپ سپورتشىنىڭ تاپسىرىسپەن ولتىرىلگەنىن ايتتى.

تەننىڭ وتباسىنىڭ قورعاۋشىسى نۇرلان وستەمىروۆ سوتتان ءىستى قوسىمشا تەرگەۋگە جىبەرۋدى سۇرادى. جابىرلەنۋشى تاراپ ىسكە قاتىستى پروسەسسۋالدىق بۇزۋشىلىقتار بار جانە قىلمىس تاپسىرىسپەن جاسالدى دەپ ەسەپتەيدى. 

"ءبىز قىلمىستىڭ سىبايلاستارىن انىقتاۋ ءۇشىن ءىستى پروكۋرورعا قوسىمشا تەرگەۋگە جىبەرۋدى سۇرايمىز. 39 تومدى قامتىعان ءىس ماتەريالدارىمەن تانىسۋ بارىسىندا، جالپى سانى 14 ۇيلەسپەۋشىلىكتى انىقتادىق، ولار مۇنىڭ تاپسىرىس بويىنشا جاسالعان قىلمىس ەكەنىن كورسەتەدى. كومەكشىلەر مەن ارانداتۋشىلاردى جاۋاپقا تارتۋ كەرەك. ءبىز كەلتىرىپ وتىرعان دالەلدەرگە كوڭىل بولىنبەي وتىر"، — دەدى وستەمىروۆ. 

وكسانا تەن بۇل پىكىرمەن تولىقتاي كەلىسەتىنىن ايتتى.

ال ايىپتاۋشىلار وكسانا تەننىڭ قورعاۋشىسىنىڭ ارىزىنىڭ قايتارىلعانىن ايتتى. قۇدايبەرگەن مەن قياسوۆتىڭ قورعاۋشىلارى ءىستى قايتا قاراۋعا نەگىز جوق ەكەنىن جەتكىزدى.