حرومتاۋ اۋدانىنىڭ اۋىلدارىنا گاز جەتكىزىلىپ، بالاباقشا مەن دارىگەرلىك امبۋلاتوريا اشىلدى، ال جاعدايى تومەن تۇرعىندارعا جەرلەستەرى قايىرىمدىلىق كومەكتەرىن كورسەتتى.

گازبەن قامتۋ — 93 پايىز

وبلىس اكىمى بەردىبەك ساپاربايەۆ حرومتاۋ اۋدانىنا جۇمىس ساپارى بارىسىندا اقجار سەلولىق وكرۋگىندە بولىپ، تۇرعىنداردى كوگىلدىر وتىن يگىلىگىن كورۋ قۋانىشتارىمەن قۇتتىقتادى، سونداي-اق ءدوڭ اۋىلىنداعى جاڭا دارىگەرلىك امبۋلاتوريا مەن بالاباقشانى كوردى، وڭعار سەلوسىندا شارۋا قوجالىعىنىڭ جۇمىسىمەن تانىسىپ، اسىلتۇقىمدى مال شارۋاشىلىعى كورمەسىندە بولدى، سونىمەن بىرگە مۇقتاج اۋىل تۇرعىندارىنا اقشا سەرتيفيكاتتارىن تاپسىردى. وبلىس باسشىسى اقجار سەلولىق وكرۋگىندە بولعان ساتىندە گاز جەلىسىنىڭ قوسىلۋ سالتاناتىنا قاتىستى. سەلولىق وكرۋگكە قاراستى جازىق ستانسياسىندا جۇرگىزىلگەن قۇنى 105 ميلليون تەڭگە تۇراتىن اۋىلىشىلىك گاز جەلىسىنىڭ قۇرىلىسى بيىلعى جىلى ماۋسىم ايىندا باستالعان بولاتىن. ونىڭ جالپى ۇزىندىعى 13،5 شاقىرىمدى قۇرايدى.

— وكرۋگ قۇرامىنا كىرەتىن جازىق ستانسياسىندا 290 ادام تۇرادى. اۋىلعا كوگىلدىر وتىننىڭ جەتكىزىلۋى تۇرعىندار ءۇشىن وتە ماڭىزدى — جىلۋ بەرۋ ماسەلەسىن شەشتى، — دەدى اقجار سەلولىق وكرۋگىنىڭ اكىمى قايرات تاشەنوۆ. — وسى ەلدى مەكەندەگى جەتپىستەن استام ءۇي گازبەن قامتاماسىز ەتىلەتىن بولادى. بۇعان دەيىن كومىر، اعاش الۋعا ءار وتباسى جىلىنا 100 مىڭ تەڭگە شاماسىندا قارجى جۇمسايتىن. گاز جۇرگىزگەنى ءۇشىن ءار وتباسى 150 مىڭ تەڭگە تولەيدى، سودان كەيىن اي سايىن تۇتىنىلعان گاز ءۇشىن ەسەپتەسەتىن بولادى. ارينە، بۇل بۇرىنعىداي كومىرگە جۇمساپ كەلگەن قارجىنىڭ قاسىندا سالىستىرۋعا دا كەلمەيدى.

— مەملەكەتتىڭ ءبىرىنشى كەزەكتەگى مىندەتى — ەلدى مەكەندەردى سۋمەن، جارىقپەن، گازبەن، بالاباقشامەن جانە مەكتەپپەن قامتاماسىز ەتۋ. ءبىزدىڭ وبلىسىمىزدا بۇل مىندەتتى بارىنشا ورىنداۋعا ۇمتىلۋدامىز، — دەپ اتاپ كورسەتتى اۋىل تۇرعىندارىمەن كەزدەسۋ بارىسىندا بەردىبەك ساپاربايەۆ. — حرومتاۋ اۋدانى قازىرگى ۋاقىتتا گازبەن 93 پايىز قامتىلىپ وتىرعانىن ايتقىم كەلەدى. بۇل — جاقسى كورسەتكىش. اۋدانداعى بارلىق ءىرى ەلدى مەكەندەر گاز جەلىسىنە قوسىلدى، ەندى قالعان اۋىلداردى گازبەن قامتاماسىز ەتەتىن بولامىز. اقساقالدار اۋىلداستارى اتىنان وبلىس اكىمىنە كورسەتكەن قامقورلىعى ءۇشىن شىن جۇرەكتەن العىس ايتتى. سودان كەيىن وبلىس باسشىسى ارداگەرلەرگە پوسەلكەلىك گاز جەلىسى تەتىگىن ىسكە قوسۋدى ۇسىندى.

بارلىق ۋادەلەر ورىندالدى

ءدوڭ سەلوسىنداعى جاڭا دارىگەرلىك امبۋلاتوريادا جالپى پراكتيكالىق دەڭگەيدەگى ەكى دارىگەر قىزمەت ەتەدى. جوبانىڭ جالپى قۇنى 92،4 ميلليون تەڭگەنى قۇرايدى. مەديسينالىق مەكەمە قاجەتتى قۇرال-جابدىقتارمەن، دارى-دارمەكپەن قامتىلعان. دارىگەرگە دەيىنگى جانە دارىگەرلىك قابىلداۋ، ەلەكتروكارديوگرافيا، ەكپە جاساۋ، فيزيوتەراپيا كابينەتتەرى جۇمىس ىستەيدى. امبۋلاتوريادا كۇندىزگى ستاسيونار بار، كولىك بەكىتىلگەن. مەديسينالىق مەكەمە كۇنىنە 50 ادامدى قابىلداي الادى. وبلىس باسشىسى كۇندىزگى ستاسيوناردا قانشا ادام ەمدەلەتىنىن، اۋدانداعى انا مەن بالا ءولىمى جايىن سۇراستىردى.

* بۇل ءبىزدىڭ ءبىرىنشى كەزدەسۋىمىز ەمەس، سىزدەردىڭ ءبىر دە وتىنىشتەرىڭىز ەسكەرۋسىز قالماعانىن وزدەرىڭىز جاقسى بىلەسىزدەر، — دەدى اۋىل تۇرعىندارىن جاڭا ەمدەۋ ورنىنىڭ پايدالانۋعا بەرىلۋىمەن قۇتتىقتاعان وبلىس باسشىسى. — سىزدەر سەلودا مەكتەپ، بالاباقشا، امبۋلاتوريا سالىپ بەرۋدى سۇرادىڭىزدار، ونىڭ ءبارى دە ورىندالدى. ەندى سەلو تۇرعىندارىنىڭ الدىندا مۇنداي ۇلكەن پروبلەمالاردىڭ جويىلعانىنا مەن وتە قۋانىشتىمىن.

الايدا مىنانى ەسكەرتكىم كەلەدى: اۋىلدىڭ، اۋداننىڭ كوركەيۋى ءۇشىن جەرگىلىكتى جانە وبلىستىق بيلىكتىڭ ىس-ارەكەتى جەتكىلىكسىز، وعان سىزدەر دە بەلسەنە قاتىسۋلارىڭىز كەرەك. ەڭ بولماعاندا ءوز اۋلالارىڭىزدى تارتىپكە كەلتىرىپ، ۇيلەرىڭىزدىڭ ماڭايىن كۇتىپ ۇستاپ، اعاشتاردى كوبىرەك ەگۋ قاجەت. ەمدەۋ پۋنكتتەرىمەن قامتاماسىز ەتۋ جايىنا كەلسەك، ءبىز وبلىستا 26 امبۋلاتوريا عيماراتىن سالۋدى جوسپارلادىق، قازىرگى ۋاقىتتا سونىڭ 18ء-ى قولعا الىندى. حرومتاۋ اۋدانىندا جوسپارلانعان جەتى امبۋلاتوريانىڭ التاۋى ءقازىردىڭ وزىندە پايدالانۋعا بەرىلدى. ءدوڭ سەلوسىنداعى جاڭادان پايدالانۋعا بەرىلگەن «تورە» بالاباقشاسى ەسكى مەكتەپ بازاسىندا قۇرىلىمدالدى. ونىڭ جالپى اۋماعى 1945 شارشى مەتر قۇرايدى. عيماراتتى تولىق قايتا قۇرىلىمداۋعا 70 ميلليون تەڭگە جۇمسالدى. مەكتەپكە دەيىنگى ءبىلىم مەكەمەسىن جاراقتاندىرۋعا سەنىمدى باسقارۋشى تاراپىنان تاعى 10 ميلليون تەڭگە ءبولىندى. مۇنداعى ءتورت توپتا 125 ءبۇلدىرشىن تاربيەلەنەدى. بەردىبەك ساپاربايەۆ بولمەلەردىڭ جابدىقتالۋىن قاراپ، جيھازدار ساپاسىنا نازار اۋداردى.

— سىزدەر مەملەكەت باسشىسىنىڭ 2020 جىلعا دەيىن بۇلدىرشىندەردى بالاباقشامەن تولىق قامتاماسىز ەتۋ تۋرالى تاپسىرماسى بارىن بىلەسىزدەر، ءبىزدىڭ وبلىسىمىزدا بۇل تاپسىرما ورىندالۋدا. بۇل تۇرعىداعى كورسەتكىش 97 پايىزدى قۇرايدى، — دەپ اتاپ كورسەتتى وبلىس باسشىسى.

ول اۋىل تۇرعىندارىنىڭ نازارىن جاس بۋىندى تاربيەلەۋدىڭ ماڭىزدىلىعىنا اۋداردى.

— ءبىز بالالارىمىزدى تاربيەلەۋگە ەرەكشە كوڭىل ءبولىپ، ونىمەن تىڭعىلىقتى شۇعىلدانۋىمىز كەرەك، — دەپ اتاپ كورسەتتى بەردىبەك ساپاربايەۆ. — بۇل رەتتە باستى جاۋاپكەرشىلىك اتا-انالارعا تۇسەتىنىن ۇمىتپاڭىزدار.

مال ءوسىرۋ ماڭىزدى

وبلىس باسشىسى ءدوڭ سەلولىق وكرۋگىنە قاراستى وڭعار سەلوسىندا ورنالاسقان «دانيار» شارۋا قوجالىعى جۇمىسىمەن تانىستى. ونىڭ باسشىسى سەرىك ورازىمبەتوۆ بۇل شارۋانى بيىل قولعا الدى. «سىباعا» مەملەكەتتىك باعدارلاماسىن پايدالانا وتىرىپ، 31،4 ميلليون تەڭگەگە ەدىلباي تۇقىمداس 1000 قوي ساتىپ الدى. مۇندا التى ادام جۇمىس ىستەيدى.

— بۇدان باسقا ءبىز ەكى تراكتور، ەكى ءشوپ بۋاتىن تەحنيكا ساتىپ الدىق، — دەيدى سەرىك ورازىمبەتوۆ. — بولاشاقتا شارۋانى جۇرگىزۋگە 190 ميلليون تەڭگە سالماقشىمىز.

— بۇل وتە جاقسى باستاما، — دەپ ماقتاۋ ءبىلدىردى وعان وبلىس اكىمى. — اۋىل شارۋاشىلىعىن جان-جاقتى دامىتۋ كەرەك. مۇناي، كەن، باسقا دا تابيعات بايلىقتارى تاۋسىلۋى مۇمكىن، ال ءبىزدىڭ باستى بايلىعىمىز — مال بۇرىنعى كۇيىنشە قالا بەرەدى، ءبىزدىڭ يگىلىگىمىزدىڭ ءوزى وسىندا.

وسىندا، «دانيار» شارۋا قوجالىعى اۋماعىندا اۋدان مال وسىرۋشىلەرى ءارتۇرلى شارۋاشىلىقتاردان اسىلتۇقىمدى مالدار كورمەسىن ۇيىمداستىردى.

— مال باسىن ۇلعايتۋ وتە ماڭىزدى، — دەپ اتاپ كورسەتتى بەردىبەك ساپاربايەۆ كورمەگە اكەلىنگەن مال تۇقىمدارىمەن تانىسقاننان كەيىن. — ءبىز بۇل سالانى مۇمكىندىگىنشە ينتەنسيۆتى تۇردە دامىتۋىمىز كەرەك.

ءبىلىم مەن سپورت — ەگىز

حرومتاۋ قالاسىنداعى «گورنياك» ستاديونىندا بەردىبەك ساپاربايەۆ سپورت نىسانىنىڭ جاڭا قۇرىلىمدالۋى ناتيجەلەرىمەن تانىستى. مۇندا ءدوڭ تاۋ-كەن كومبيناتىنىڭ كۇشىمەن جاتتىعۋ زالدارى بار جاڭا ەكى قاباتتى سپورت كەشەنى ىسكە قوسىلدى. ستاديون تريبۋنالارىندا جاڭا وتىرعىشتار قويىلدى، جۇگىرۋ جولدارى سالىنىپ، ستاديون الاڭى جاسىل جاساندى جابىندىمەن قىمتالدى.

جاڭا سپورت قۇرىلىسىنىڭ جاراقتاندىرىلۋىمەن تانىسقان وبلىس اكىمى ەندى فۋتبولدان اۋداندىق كوماندانىڭ سپورتتىق تابىستارى جاقسارا تۇسەتىندىگىنە سەنىم ءبىلدىردى.

— جالپى سپورتقا ايرىقشا نازار اۋدارىپ، بالالاردى دەنە شىنىقتىرۋ ساباقتارىنا كوبىرەك تارتۋ كەرەك، — دەدى وبلىس باسشىسى.

بەردىبەك ساپاربايەۆ سونداي-اق حرومتاۋ قالاسىنداعى №3 مەكتەپتە بولدى. مۇندا ءدوڭ تاۋ-كەن كومبيناتىنىڭ جانە اۋدان اكىمدىگىنىڭ قارجىلاي قولداۋىمەن قۇرىلىمدالعان STEM-لابوراتوريالار اياسىندا

جۇمىس ىستەيتىن ىت-كلاستار، روبوتوتەحنيكا جانە بيزنەس كابينەتتەرى پايدا بولدى.

— بۇل جاڭا كابينەتتەردىڭ ىسكە قوسىلۋى ءبىز ءۇشىن قۋانىشتى. ويتكەنى ول بالالاردىڭ ينتەللەكتۋالدى دامۋى ءۇشىن قۋاتتى سەرپىن بەرەدى، — دەيدى مەكتەپ ديرەكتورى ومار وتەگەنوۆ.

1200 ورىنعا ارنالعان مەكتەپتە ءقازىر 986 بالا وقىپ، 80 ۇستاز ءدارىس بەرەدى. وبلىس اكىمى وقۋشىلارمەن سويلەسىپ، كومپيۋتەر كلاسىندا بولدى. بيزنەس-كابينەتتە شاكىرتتەر ءوز يدەيالارىمەن ءبولىستى. ولاردىڭ كوبىسى ءقازىردىڭ وزىندە ناقتى تابىس اكەلۋدە. مىسالى، ون ءبىرىنشى سىنىپ وقۋشىسى دامير البورييەۆ ۇيىمدار مەن جەكە ۇيلەرگە كوممۋنالدىق قىزمەتتەر ءۇشىن تۇبىرتەكتەر تاراتادى.

— مەن ءار تۇبىرتەك ءۇشىن 10 تەڭگە تولەم الامىن، — دەيدى جاس بيزنەسمەن. — بۇل — مەن ءۇشىن ەلەۋلى تابىس كوزى.

وسى مەكتەپتە «جۇرەك جىلۋى» اتتى قايىرىمدىلىق اكسياسى ۇيىمداستىرىلدى. اۋدان كاسىپكەرلەرى تابىسى تومەن وتباسىلارىنا ماتەريالدىق كومەك كورسەتتى، سونداي-اق از قامتىلعان وتباسىلارىنىڭ جوعارى وقۋ ورىندارىندا وقيتىن بالالارىنىڭ تولەماقىلارى جابىلدى.

— بۇل — وتە ماڭىزدى شارا، ءبىزدىڭ حالقىمىز قاي ۋاقىتتا دا ءوزىنىڭ جاقىندارىنا عانا ەمەس، سونداي-اق قۋعىن-سۇرگىنمەن جانە تاعدىر تالكەگىمەن ءبىزدىڭ ولكەمىزگە كەلگەندەردىڭ بارىنە دە كومەك جاساعان، — دەدى بەردىبەك ساپاربايەۆ. — توپتاسقاندىق پەن ءوزارا كومەك، ءبىر-بىرىمىزدى قولداۋ ارقىلى عانا ءبىزدىڭ مەملەكەتىمىز بەن ءبىرتۇتاس حالقىمىز ىلگەرى قادام باسىپ، دامي الادى. سودان كەيىن وبلىس اكىمى، ارداگەرلەر، حرومتاۋ اۋدانىنىڭ اكىمى امانعالي بەردالين قايىرىمدىلىق اكسياسىنا شاقىرىلعان سەلو تۇرعىندارىنا اقشالاي سەرتيفيكاتتار تاپسىردى.