اقتوبەدە وتكەن پرەزيدەنت شىرشاسىندا بالالاردىڭ بارلىق ارماندارى ورىندالدى.

اقتوبەدە ءوتىپ بارا جاتقان جىلى جەتىستىكتەرىمەن ەرەكشەلەنگەن اتا-انا قامقورىنسىز قالعان، مۇمكىندىگى شەكتەۋلى جانە جەتىم بالالار، بارلىعى 202 بالدىرعان ءۇشىن پرەزيدەنت شىرشاسى ءوتتى.

وبلىستاعى بالالارعا ارنالعان بيىلعى جاڭاجىلدىق قويىلىم «جارقىرا، قازاقستان! جارقىرا، تۋعان جەر!» دەپ اتالدى. مەرەكەلىك شاراعا وبلىس ورتالىعى مەن بارلىق اۋدانداردان كەلگەن بالالار قاتىستى.

شىرشانىڭ شامدارى جاعىلىپ، ەل پرەزيدەنتى نۇرسۇلتان نازاربايەۆتىڭ قۇتتىقتاۋىنان كەيىن وبلىس اكىمى بەردىبەك ساپاربايەۆ مەملەكەت باسشىسىنىڭ اتىنان ءار بالاعا سىيلىقتار تابىس ەتتى.

* پرەزيدەنت تاپسىرماسىمەن بىزدەر - جەرگىلىكتى اتقارۋشى بيلىك ورگاندارى بالالارىمىز ساپالى ءبىلىم الىپ، سپورتپەن شۇعىلدانىپ، ونەرمەن اينالىسىپ، جان-جاقتى دامۋلارى ءۇشىن بارلىعىن جاساپ جاتىرمىز. وتكەن جىل ءبىزدىڭ وبلىستا بالا جىلى بولعانىن وزدەرىڭىز دە بىلەسىزدەر. وسى جىلدىڭ ىشىندە قانشاما بالالارعا ارنالعان مەكتەپكە دەيىنگى مەكەمەلەر، سپورتتىق جانە ويىن الاڭدارى سالىندى، ءىت-سىنىپتار اشىلدى، دارىندى بالالاردىڭ دەنى بيىلعى جازدا شەتەلدە دەمالدى. وسىنىڭ ءبارى بالالارىمىز وزگە وڭىرلەردە، باسقا ەلدە تۇراتىن قاتارلاستارىنان قالماي، وي-ورىستەرىن كەڭەيتۋلەرى ءۇشىن. الايدا، ەڭ باستىسى، ءبىزدىڭ پرەزيدەنت ايتقانداي، تۋعان قازاقستانىمىزدىڭ اتىن شىعاراتىن لايىقتى ازامات بولىپ ءوسۋ ءۇشىن وسى يگىلىكتەردىڭ بارلىعىن پايدالانا وتىرا، ۇزدىك ءارى جاقسى وقىپ، ۇلكەندەردى تىڭداۋعا جانە ولاردى قۇرمەتتەۋگە تيىسسىزدەر،- دەدى بەردىبەك ساپاربايەۆ.

ايتا كەتەيىك، بالالار اياز اتاعا جازعان حاتتارىنداعى سىيلىقتارىنىڭ بارلىعىن الدى. ولار ۆەلوسيپەد، گيروسكۋتەر، پلانشەت، تەلەديدار، نوۋتبۋك جانە ت.ب. سۇراعان. ءار حاتتا كىتاپتارعا، نەگىزىنەن ەنسيكلوپەديالارعا سۇرانىس بار ەكەنىن ەسكەرۋ كەرەك. جەتىنشى سىنىپتا وقيتىن اسەل تىگىن ماشيناسىن، ەكى جاس مۋزىكانت – مەيرامبەك پەن كارىم قولدان جاسالعان دومبىرا سۇراسا، العا اۋدانىنىندا تۇراتىن بەسىنشى سىنىپ وقۋشىسى ساندۋعاش فوتواپپاراتتى بولدى.

بالالارعا ارنالعان جاڭاجىلدىق شىرشا مەرەكەلىك تۇسكى اسپەن جالعاسىپ، مۇراجايعا قىدىردى، اقتوبەدەگى باس شىرشانى تاماشالادى.

بۇدان باسقا، بيىل وڭىردە «بالالارعا قۋانىش سىيلا» اتتى اۋقىمدى اكسيا ءوتىپ، سونىڭ اياسىندا مەملەكەتتىك ورگانداردىڭ، بيزنەس قوعام وكىلدەرى اياز اتامەن جانە اقشاقارمەن بىرگە ەرەكشە ءبىلىم بەرۋدى قاجەت ەتەتىن 3626 بالانى قۇتتىقتاپ، سىيلىقتار تارتۋ ەتەدى. اقتوبەدەگى

جەكپە-جەك سارايىندا قازاقستان رەسپۋبليكاسى پرەزيدەنتى اتىنان جاڭاجىلدىق شىرشا ۇيىمداستىرىلدى.

«جارقىرا، قازاقستان! جارقىرا، تۋعان جەر!» دەگەن اتپەن وتكەن مەرەكەلىك سالتاناتقا وبلىس ورتالىعى مەن اۋدانداردان 202 بالا شاقىرىلىپتى. ولار — وقۋدا، سپورتتا تابىستارعا جەتىپ، ءوز ونەرلەرىمەن تانىلىپ جۇرگەن بالالار. كەڭ زالداعى جاسىل شىرشانى اينالا توپتاسقان بالالار الدىمەن اليسا ەسىمدى قىزدىڭ عاجايىپتار ەلىنە جاساعان ساپارىنا «ورتاقتاستى»، ەرتەگىلەر مەن مۋلتفيلمدەر كەيىپكەرلەرىنىڭ كەيپىنە ەنگەن اعا-اپالارىنىڭ جەتەگىندە بي بيلەپ، قىزىقتى ويىندار وينادى، جۇمباقتار شەشتى.

بۇدان سوڭ بالالار ۇلكەن ەكران ارقىلى ەلباسى قۇتتىقتاۋىن تىڭدادى.

نۇرسۇلتان نازاربايەۆ ءوز سوزىندە:

— بۇل — وزدەرىڭدى جاڭا كۇنگە جەتەلەيتىن، جاڭا ءۇمىت سىيلايتىن ەرەكشە مەيرام. وسى مەرەكەلىك باسقوسۋدى بالالار اسىعا كۇتەدى. ءبىز ءۇشىن قاشاندا بالالاردىڭ قۋانىشىنان ارتىق ەشتەڭە جوق. ەلىمىزدە بالالاردىڭ الاڭسىز ءارى باقىتتى ءومىر ءسۇرۋى ءۇشىن ءبىز بارلىق جاعدايدى جاسايمىز. سانالى تاربيە مەن ساپالى ءبىلىم الۋعا ۇمتىلعان ءجون. ۇستازدارىڭىزدى سىيلاپ، ولاردىڭ ەڭبەگىن باعالاي بىلىڭدەر! بالداۋرەن بالالىق شاقتا باقىتقا بولەنە بەرىڭدەر! جاڭا جىل قۇتتى بولسىن! جاڭا جىلدا ىزگى ارمان-تىلەكتەرىڭ ورىندالسىن! — دەپ، بالالارعا اق تىلەگىن جولدادى.

ەلباسى قۇتتىقتاۋىنان كەيىن، بالالاردىڭ قالاۋىمەن كەڭ زالدىڭ ورتاسىنداعى جاسىل شىرشانىڭ شامدارى جاعىلىپ، ول ءتۇرلى ءتۇستى ساۋلەلەرگە بولەندى. بالالار وبلىس اكىمى بەردىبەك ساپاربايەۆ پەن وبلىستىق ءماسليحات حاتشىسى ءسانيا قالدىعۇلوۆامەن بىرگە جاسىل شىرشانى اينالا ءجۇرىپ، ءان سالدى. بالالاردى وبلىس اكىمى بەردىبەك ساپاربايەۆ تا قۇتتىقتادى:

— اينالايىن، بالالار، جاڭا ءوز قۇتتىقتاۋىندا ەلباسى اتاپ وتكەندەي، سەندەر بۇل مەرەكەنى اسىعا كۇتەسىڭدەر. ءبىز الەمدەگى باسقا ەلدەردىڭ، باسقا حالىقتاردىڭ بالالارىندا بار مۇمكىندىكتەردى سەندەرگە دە جاساۋعا تىرىسامىز، سەندەر دە جاقسى ءبىلىم الىپ، ونەردىڭ، سپورتتىڭ وزدەرىڭ قالاعان تۇرىمەن الاڭسىز اينالىسساڭدار دەيمىز. سول ءۇشىن دە، كورىپ وتىرعاندارىڭداي، جاڭا مەكتەپتەر، سپورت الاڭدارى، ءىت-سىنىپتار اشىلىپ جاتىر. بيىلعى جىل وبلىسىمىزدا بالالار جىلى بولىپ جاريالاندى. ءبىزدىڭ بار تىلەگىمىز — سەندەر لايىقتى ءبىلىم الىپ، ەرتەڭگى كۇنى جاقسى ازامات بولساڭدار ەكەن! ەڭ باستىسى، دەنساۋلىقتارىڭ مىقتى بولسىن! جاڭا جىل سەندەرگە كوپ قۋانىش پەن جاقسىلىقتار اكەلسىن! — دەدى وبلىس باسشىسى.

كەلەسى ساتتە ورتاعا اياز اتا شىعىپ، بالالار ءوز تىلەكتەرىن جازعان حاتتاردىڭ بىرىنەن سوڭ ءبىرىن وقي باستادى. بالالاردىڭ ارماندارى سان الۋان: شالقارلىق ديانا قۇلەكەشوۆا وسكەندە ديزاينەر بولۋدى ماقسات ەتەدى. ول ءوز حاتىندا قازىردەن باستاپ-اق تىگىن ماشيناسىمەن جۇمىس ىستەگىسى كەلەتىنىن ايتىپتى. ال ايتەكەبيلىك ايگەرىم قارقۇلوۆا قازاق اقىندارىنىڭ ولەڭدەرىن ءسۇيىپ وقيدى، سوندىقتان ول جاڭاجىلدىق سىي رەتىندە مۇقاعالي ماقاتايەۆتىڭ جىر جيناعىن الۋدى قالايتىنىن جازعان. بايعانين اۋدانىنىڭ ورتالىعىندا تۇراتىن كارىم قوشانوۆ ونەرگە جاقىن، ول جاقسى ءبىر دومبىراعا يە بولعىسى كەلەتىنىن جەتكىزىپتى. وسى جانە باسقا ءبىر توپ بالا ءوز تىلەكتەرى بويىنشا قالاعان سىيلىقتارىن وبلىس اكىمى بەردىبەك ساپاربايەۆتان الدى. جالپى، شىرشاعا قاتىسقان بارلىق بالاعا ەلباسى اتىنان قۇتتىقتاۋ حات پەن سىيلىقتار تابىستالدى.