بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسيادا وبلىستىڭ قوعامدىق دەنساۋلىق ساقتاۋ دەپارتامەنتىنىڭ باسشىسى نۇرسۇلۋ بەركىمبايەۆا مالىمدەدى.
سپيكەردىڭ ايتۋىنشا، وبلىستاعى ەپيدەميولوگيالىق جاعداي تۇراقتى، قوعامدىق تاماقتانۋ كاسىپورىندارىمەن، سۋمەن قامتاماسىز ەتۋ وبەكتىلەرىمەن بايلانىستى ينفەكسيالىق اۋرۋلار مەن تاعامنان ۋلانۋ جاعدايلارى تىركەلگەن جوق.
- جىل باسىنان بەرى مەنينگوكوككتى ينفەكسيانىڭ 6 جاعدايى تىركەلدى، ونىڭ ىشىندە 4 جاعداي 14 جاسقا دەيىنگى بالالار اراسىندا ورىن الدى. بارلىق جاعداي ەمدەلدى. تۇماۋ اۋرۋشاڭدىعى 1،5 ەسەگە، تۇرعىندار اراسىندا تۋبەركۋلەز اۋرۋشاڭدىعى 12،1%، سونىڭ ىشىندە بالالار اراسىندا 39،3% - عا، جاسوسپىرىمدەر اراسىندا 21،7% - عا تومەندەدى. اقتوبە قالاسى مەن 12 اۋداندا ساۋىقتىرۋ جانە يممۋنيتەتتى كوتەرۋ ماقساتىندا تاۋلىك بويى كۇن تارتىبىمەن قىزمەت ەتەتىن ساناتورلىق توپتار جۇمىس جاسايدى. تۋبەركۋلەز اۋرۋىن ەرتە انىقتاۋ جانە ونىڭ الدىن الۋ ماقساتىندا 121 مىڭنان استام بالاعا مانتۋ سىناماسى قويىلدى، بسج ۆاكسيناسياسى 17 مىڭنان استام جاڭا تۋعان بالاعا جۇرگىزىلدى – دەدى نۇرسۇلۋ بەركىمبايەۆا.
سونىمەن قاتار، 2018 جىلى سانيتارلىق-ەپيدەميولوگيالىق ساراپتاما جۇرگىزۋ ءۇشىن مەكەمە ماماندارى 3327 ازىق-تۇلىك ونىمدەرىنىڭ، بالالار مەن جاسوسپىرىمدەرگە ارنالعان تاۋارلاردىڭ، بالالار ويىنشىقتارىنىڭ جانە باسقا دا حالىق تۇتىناتىن تاۋارلاردىڭ سىنامالارىن ىرىكتەپ زەرتتەدى، ونىڭ ىشىندە 457 سىناما تەحنيكالىق رەگلامەنت تالاپتارىنا سايكەس كەلمەدى. زەرتتەلگەن 2671 تاماق ونىمدەرىنىڭ 350 سىناماسى، نەگىزىنەن، تاۋاردىڭ تاڭبالانۋىنا، ميكروبيولوگيالىق جانە فيزيكالىق-حيميالىق كورسەتكىشتەرگە بايلانىستى تالاپتارعا سايكەس كەلمەدى. تاماق ونىمدەرىنەن سايكەسسىزدىك بويىنشا 55% رف، بەلارۋس، قىرعىزستان جانە ت.ب ەلدەردەن انىقتالدى.
جۇرگىزىلگەن مونيتورينگ بويىنشا جەكە كاسىپكەرلەرگە 115 بۇزۋشىلىقتاردى جويۋ تۋرالى ۇيعارىم بەرىلدى، 700 كگ استام تاماق ونىمدەرى، 19 كگ بالالار ويىنشىقتارى مەن تاۋارلارى ساتىلىمنان الىنىپ، جويىلدى.
* ەرەكشە ءتارتىپ بويىنشا 1110 نىسان تەكسەرىلدى، سانيتارلىق تالاپتاردى بۇزعانى ءۇشىن 45 ملن. تەڭگەگە 1234 اكىمشىلىك قۇقىق بۇزۋشىلىق تۋرالى قاۋلى شىعارىلدى، 1 نىساننىڭ قىزمەتى توقتاتىلدى، 389 ادام جۇمىستان ۋاقىتشا شەتتەتىلدى - دەپ، قورىتىندىلادى دەپارتامەنت باسشىسى.
