ولجاس سۇلەيمەنوۆ جيەن نەمەرەسىنىڭ ولىمىنە قاتىستى تاعى دا حات جازدى، دەپ جازادى Qamshy.kz اقپارات اگەنتتىگى zakon.kz سايتىنىڭ دەرەگىن نەگىزگە الىپ. 

سوت وتىرىسى كەزىندە ولجاس سۇلەيمەنوۆتىڭ جاڭا حاتى وقىلدى. ول ماليكا مۇحيتوۆانىڭ جازاسىن جەڭىلدەتىپ، باس بوستاندىعىنان ايىرماۋىن سۇرادى. سونداي-اق ول حاتتى جازعان كەزدە ەسكەندىردىڭ اتا-اناسىمەن اقىلداسپاعانىن ايتقان. 

♦ماليكانىڭ سوتتاعى سوڭعى ءسوزى: ەسكەندىردى تۇسىمدە كوردىم

«26 جەلتوقساندا مەنىڭ جيەن نەمەرەم ەسكەندىر سۇلەيمەنوۆتىڭ ولىمىنە قاتىستى اپەللياسيالىق سوت وتىرىسى وتەدى. مەنىڭ قىزىم، ەسكەندىردىڭ اناسى  لەيلا سۇلەيمەنوۆا مەن سەرگەي حانعا بۇل جايتتىڭ ۇزاققا سوزىلۋى فيزيكالىق جانە پسيحولوگيالىق تۇرعىدان اسەر ەتىپ جاتىر. اسىرەسە قىزىما. وسى ۋاقىتقا دەيىن مەنەن مۇحيتوۆانىڭ تۋىستارى كەشىرىم بەرۋىمدى ءوتىنىپ ءجۇردى. مەن جول اپاتىنىڭ قاساقانا جاسالماعانىن بىلەمىن. ونىڭ تۋىستارى وتباسىنىڭ ۇلكەنى مەن بولعاندىقتان مەنىمەن كەزدەسۋدى قالادى. ولارمەن كەزدەسكەننەن كەيىن بىرنەشە اي بويى مەن جيەن نەمەرەمنىڭ ولىمىنە سەبەپكەر بولعان قىزدىڭ تاعدىرى تۋرالى ويلانا باستادىم. وسىنداي سەزىممەن مەنىڭ جازعان حاتىم، مۇحيتوۆانىڭ جازاسىن جەڭىلدەتۋ تۋرالى ءوتىنىشىم 20 جەلتوقساندا وتكەن سوت وتىرىسىنا جونەلتىلگەن بولاتىن. الايدا بۇل حات استانا قالاسىنا جەتپەي تۇرىپ-اق الەۋمەتتىك جەلىگە تارالىپ كەتتى. سونداي-اق جازعان حاتىم مەنىڭ تۋعان تۋىستارىمنىڭ اراسىندا ۇلكەن رەزونانس تۋدىردى. ارينە، حاتتى جازباس بۇرىن قىزىم مەن سەرگەيمەن اقىلداسۋىم كەرەك ەدى. مەنىڭ تاراپىمنان قاتەلىك كەتتى. الايدا سوت مەنىڭ جازانى جەڭىلدەتۋگە قاتىستى ايتقان ءوتىنىشىمدى جەكە ادامنىڭ كوزقاراسى رەتىندە قابىلدايدى دەپ سەنەمىن. سونداي-اق مەنىڭ جاساعان مالىمدەمەم ەسكەندىردىڭ اتا-اناسىنىڭ كوزقاراسىمەن سايكەس كەلمەيدى. بۇل مەنىڭ جەكە پىكىرىم. قۇرمەتپەن ولجاس سۇلەيمەنوۆ»، — دەپ جازىلعان حاتتا. بۇل حاتتى سوت وتىرىسى كەزىندە ادۆوكات الميرا شايحين وقىپ بەردى.

♦ولجاس سۇلەيمەنوۆ ماليكا مۇحيتوۆانى كەشىردى

ەسكە سالا كەتسەك، بەلگىلى اقىن، جازۋشى ولجاس سۇلەيمەنوۆتىڭ نەمەرەسى 27 جاستاعى ەسكەندىر سۇلەيمەنوۆ استانادا جول اپاتىنان كوز جۇمعان ەدى.  جول اپاتى ماڭگىلىك ەل – كەرەي جانىبەك حاندار كوشەلەرىنىڭ قيىلىسىندا بولعان. جاس جىگىت موتوسيكل جۇرگىزىپ كەلە جاتقان. ەسكەندىر سۇلەيمەنوۆتى قىزىلوردا وبلىسى ىشكى ىستەر دەپارتامەنتىنىڭ باستىعى، پوليسيا پولكوۆنيگى قايرات ءمۇحيتوۆتىڭ قىزى ماليكا مۇحيتوۆا قاعىپ كەتكەن. 29 جاستاعى ماليكا مۇحيتوۆا سوت وتىرىسىندا مارقۇمنىڭ اتا-اناسىنان جىلاپ كەشىرىم سۇرادى. ءوزىنىڭ كىناسىن تولىعىمەن مويىنداپ، زارداپ شەككەن تاراپقا ماتەريالدىق شىعىندى تولەۋگە دايىن ەكەنىن مالىمدەدى.

♦ەسكەندىر سۇلەيمەنوۆتىڭ قالىڭدىعى: حاتىم سول كۇيى وقىلماي قالدى

24 قازاندا وتكەن سوت وتىرىسىندا زارداپ شەككەن تاراپ سوتتالۋشىدان 14 ميلليون تەڭگە مولشەرىندە ماتەريالدىق شىعىن ءوندىرۋدى تالاپ ەتكەن ەدى. الايدا كەيىن مارقۇمنىڭ وتباسى ول تالاپ-ارىزدى قايتارىپ الدى.

9 قاراشادا وتكەن ءجارىسسوز بارىسىندا مەملەكەتتىك ايىپتاۋشى الىشەر بارايەۆ ايىپتالۋشى ماليكا مۇحيتوۆانى ەكى جىلعا باس بوستاندىعىنان ايىرۋدى جانە ءۇش جىل كولىك جۇرگىزۋگە تىيىم سالۋدى سۇراعان ەدى.

مارقۇمنىڭ اتا-اناسى قازاقستاندىقتارعا ۇندەۋ جاساپ، سوتتالۋشىنىڭ شىن وكىنگەنىنە سەنبەيتىنىن ايتتى. الايدا 20 جەلتوقساندا ولجاس سۇلەيمەنوۆ ماليكا مۇحيتوۆانىڭ جازاسىن جەڭىلدەتۋدى سۇراپ حات جازعان بولاتىن.