وبلىس اكىمى بەردىبەك ساپاربايەۆ بايعانين اۋدانىنداعى قاراتوبە كەن ورنىنداعى پروبلەمالىق ماسەلەلەردى شەشۋ بويىنشا كەڭەس وتكىزدى.

ەكولوگيا دەپارتامەنتىنىڭ، تابيعي رەسۋرستار جانە تابيعات پايدالانۋدى رەتتەۋ، يندۋستريالدى-يننوۆاسيالىق دامۋ باسقارمالارىنىڭ، توتەنشە جاعدايلار دەپارتامەنتىنىڭ، «زاپكازنەدرا» ايماقتىق ينسپەكسياسىنىڭ، سونداي-اق بايعانين اۋدانى اكىمدىگىنىڭ باسشىلارى كەن ورنىنداعى اعىمداعى جاعداي، ەكولوگيالىق قاۋىپسىزدىكتى قامتاماسىز ەتۋ بويىنشا قابىلدانعان جانە قاجەتتى شارالار تۋرالى باياندادى. بۇگىنگى كۇنى جاعداي تۇراقتى، تۇرعىندارعا جانە ەكولوگيا قاۋىپسىزدىگىنە قاتىستى قاتەر جوق. كەڭەس قورىتىندىسى بويىنشا وبلىس باسشىسى جاۋاپتى مەملەكەتتىك ورگاندارعا جەرگىلىكتى اتقارۋشى بيىلىكپەن بىرگە كەن ورنىندا كۇن سايىن مونيتورينگ جۇرگىزۋدى تاپسىردى.

- قاراتوبە كەن ورنىنداعى احۋال ەرەكشە باقىلاۋدا. ءبىراق كوپتەگەن ءتۇيىندى ماسەلەلەردىڭ شەشۋى ورتالىق مەملەكەتتىك ورگانداردىڭ قۇزىرەتىندە. سوندىقتان بۇل ماسەلەنىڭ شەشىمى بويىنشا ءبىز قىسقا مەرزىمدە ءبىرقاتار ناقتى ۇسىنىستاردى دايىندايتىن بولامىز، — دەپ اتاپ كورسەتتى وبلىس اكىمى.

«قاراتوبە» مۇناي كەن ورنىنىڭ وپەراتورى — «قاراتوبە ينتەرنەشنل ويل كومپاني» ج ش س قىزمەتىنىڭ زاڭدىلىعى تۋرالى ءىس 2009 جىلدان بەرى ءارتۇرلى سوت ساتىلارىندا، ونىڭ ىشىندە پاريجدەگى اربيتراجدىق سوتتا قارالدى. سول ۋاقىتتان بەرى كەن ورنى ءىس جۇزىندە يەسىز قالدى، سوڭعى جىلدار اۋماعىندا اپاتتى ۇڭعىمالاردان تۇراقتى تۇردە مۇناي قۇيىپ الۋ دەرەكتەرى ورىن الىپ كەلدى.