شىمكەنتتە ەرلى-زايىپتى 3 جاسار قىزىنىڭ بالاباقشادا زورلانعانىن ايتىپ، پوليسياعا ارىزداندى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

3 جاسار ءبۇلدىرشىننىڭ اكەسى (ەتيكالىق سەبەپتەرگە بايلانىستى ءاتى-جونى جازىلعان جوق) جاعا ۇستاتارلىق وقيعانىڭ 25 جەلتوقساندا شىمكەنتتەگى قاراتاۋ اۋدانىندا ورنالاسقان بالاباقشادا بولعانىن ايتتى. 

سول كۇنى قىزىن بالاباقشادان ۇيىنە اكەلگەن اناسى ونىڭ ءىش كيىمىنەن قان ءىزىن بايقاعان. بالانىڭ اتا-اناسى بىردەن پوليسياعا شاقىرىپ، ارىزدانعان. 

"كەلىنشەگىم قىزىمنىڭ ءىش كيىمىنەن قان ءىزىن كورگەندە، شوشىپ كەتتى. قىزىم وقيعانىڭ قالاي بولعانىن ايتىپ جاتىر. ال بالاباقشا قىزمەتكەرلەرى مۇنداي سۇمدىق بولعان جوق دەپ، مۇنى بالانىڭ ءوزى قۇراستىرىپ وتىر دەيدى. 3 جاسار قىز ونداي نارسەنى قايدان ءبىلسىن؟"، — دەيدى اشىنعان اكە.

ونىڭ ايتۋىنشا، جانتۇرشىگەرلىك وقيعا كەزىندە تاربيەشى جۇمىس ورنىندا بولماعان. قىزدىڭ اتا-اناسى پوليسەيلەرمەن بىرگە بالاباقشاعا بارىپ، بەينەباقىلاۋ كامەرالارىنىڭ جازباسىن تەكسەرىپ شىعىپتى.

"بالاباقشاعا ورناتىلعان كامەرادا قىزىمنىڭ تەك جىلاپ وتىرعانى كورىنىپ تۇر. بالاباقشا دالىزىندەگى ۆيدەولاردى كورە المادىق"، — دەيدى ەر ادام. 

سول ءتۇنى كىشكەنتاي قىزدى اناسى دارىگەرگە الىپ بارىپ، سوت-مەديسينالىق ساراپتامادان وتكىزىپتى. ساراپتاما قورىتىندىسى ءبىر اي ىشىندە دايىن بولادى. 

شىمكەنت قالالىق پوليسيا دەپارتامەنتىنىڭ باسپا ءسوز حاتشىسى اسەل سادەنوۆا اتالعان ءىس قاراتاۋ اۋداندىق پوليسيا باسقارماسىندا تىركەلگەنىن راستادى.

قىلمىستىق كودەكستىڭ 124-بابى ("جاس بالالاردى ازعىندىق جولعا ءتۇسىرۋ") بويىنشا سوتقا دەيىنگى تەرگەۋ باستالعان. ءتيىستى ساراپتامالار تاعايىندالدى.

"قىلمىستىق كودەكستىڭ 201، 147-بابىنا سايكەس سوتقا دەيىنگى تەرگەۋ دەرەكتەرى جاريا ەتىلمەيدى"، — دەدى سادەنوۆا. 

ايتا كەتسەك، 3 جاسار قىز ەرلى-زايىپتىنىڭ ورتاڭعى بالاسى ەكەن. بۇدان باسقا تاعى ەكى بالا تاربيەلەپ وتىر.