قازاقستاندىق فيگۋريستىڭ اناسى وكسانا تەن مارقۇم دەنيس تەننىڭ ولىمىنە بايلانىستى سوت زالىندا تۇسىنىكتەمە بەردى. وكسانا تەن ۇلىنىڭ تاپسىرىسپەن ولتىرىلگەنىنە سەنىمدى.

«العاشقى سەكۋندتان باستاپ-اق مۇنىڭ جاي عانا اۆتوۇرلىق ەكەنىنە سەنبەدىم. بۇل مەنىڭ انالىق سەزىمىم عانا ەمەس، ينتۋيسيام. بولعان جايتپەن نەگە كەلىسە الماي تۇرعانىم سىزدەردى قىزىقتىرعان بولار. دەنيستى وڭايلىقپەن اشۋلاندىرا المايسىڭ. ول ءۇشىن ونى ارانداتۋ كەرەك. كۇدىكتىلەر دە ءدال سولاي ىستەدى»، - دەدى وكسانا تەن.

اناسىنىڭ ايتۋىنشا، تەرگەۋ پروسەسى جاقسى ءوتتى، الايدا ءولىمنىڭ اياقاستى بولعانىنا ول سەنبەيدى.

سوت الماتى قالاسىندا وسىمەن ەكىنشى كۇنى ءوتىپ جاتىر. سوت پروسەسى قازاق تىلىندە جۇرۋدە. ءتوراعالىق ەتۋشى سۋديا – كەڭشىلىك ءابدىلدينوۆ.

دەنيس تەننىڭ ءولىمى

ەلدىڭ ماقتانىشى، قازاقستاندىق فيگۋريست دەنيس تەن 2018 جىلدىڭ 19 شىلدەسىندە قايتىس بولدى. دەنيس ءوزىنىڭ كولىگىندەگى اينانى ۇرلاماق بولعان ەكى ۇرىنى بايقاپ قالادى. ۇستاماق بولعاندا، ولاردىڭ ءبىرى سانىنا پىشاق تىعىپ جىبەرەدى. كوپ قان جوعالتقان دەنيس تەن اۋرۋحانادا قايتىس بولادى. دەنيستىڭ جاسى نەبارى 25-تە ەدى.

فيگۋريستىڭ ءىسى بويىنشا بۇگىندە ءۇش كۇدىكتى انىقتالىپ وتىر: ولار - ارمان قۇدايبەرگەن، نۇرالى قياسوۆ جانە جانار تولىبايەۆا.