بيىلعى جىلدىڭ مامىر ايىندا اقتوبەگە 150 جىل تولادى.  وسىعان وراي تانىمال قازاق ءانشىسى ديماش قۇدايبەرگەن كونسەرت قويادى دەپ جازادى Qamshy.kz اقپارات اگەنتتىگى Sputniknews.kz سايتىنىڭ دەرەگىن نەگىزگە وتىرىپ. 

بۇگىن ءوڭىر باسشىسى بەردىبەك ساپاربايەۆتىڭ توراعالىعىمەن وتكەن وتىرىستا مەرەكەلىك شارالاردىڭ الدىن الا جوسپارى قارالدى، سولاردىڭ ىشىندە الەمگە تانىمال اقتوبەلىك ديماش قۇدايبەرگەننىڭ دە كونسەرتى بار دەپ حابارلايدى وبلىس اكىمىنىڭ باسپا ءسوز قىزمەتى. 

سونىمەن بىرگە وبلىس اكىمى بيىلعى جىلى حالىقارالىق، رەسپۋبليكالىق، وڭىرلىك جانە وبلىستىق دەڭگەيدەگى كوپتەگەن شارالار وتەتىنىن جانە ۇيىمداستىرۋشىلار كوڭىل كوتەرەتىن باعدارلامالارمەن شەكتەلمەيتىنىن اتاپ ءوتتى.

«باستىسى – بۇل كەيىن قالا تۇرعىندارى مەن قوناقتارىنا وسى كۇندى ەسكە سالاتىن، وبلىس ورتالىعىنىڭ ءارى قاراي دامۋىنا قىزمەت ەتەتىن جاڭا الەۋمەتتىك جانە وندىرىستىك نىسانداردىڭ اشىلۋى. ەشبىر اقتوبەلىك بۇل ۇلكەن شارادان تىس قالماۋى ءتيىس»، –  دەدى ساپاربايەۆ.

اقتوبەگە 150 جىلدىعىنا وراي وڭىردە تۇرعىن ۇيلەر، جاڭا مەكتەپتەر مەن بالاباقشالار، ساياباقتار مەن گۇل باقتارى پايدالانۋعا بەرىلمەكشى. 

بۇدان بولەك، اقتوبەدە بوگەنباي باتىرعا، ەسەت باتىر مەن اقتوبە كەڭەسىنىڭ ءبىرىنشى ءتوراعاسى ۆاسيليي زينچەنكوعا ەسكەرتكىشتەر اشىلادى.