تانىمال پسيحياتر ومىردەگى ەڭ ماڭىزدى 22 ەرەجەنى تۇجىرىمدادى. شىندىعىندا، بۇل ەرەجەلەردى وقي وتىرىپ ويعا باتاسىز. كوپتەگەن ادامدار ءمىنسىز قارىم-قاتىناس قۇرۋدى، ءوز قيالىنداعى جۇمىستى تابۋدى، جالپى ايتقاندا قوعامدا باقىتتى ءومىر ءسۇرۋدى ارماندايدى. ءبىراق ءبىر عانا ماقساتتى ورىنداۋ ءۇشىن كوپتەگەن كۇش-جىگەر ءارى ۋاقىت، ءتوزىم مەن تاباندىلىق قاجەت.

بىرەۋلەر كەرەگەسى بەرىك وتباسى قۇرسا، ەندى بىرەۋلەر كاسىبىن ورگە دومالاتادى، تاعى بىرەۋلەرى الەمدى ارالاپ، ساياحات جاساپ، سودان ءلاززات الادى.

ميحايل ليتۆاك پراكتيكالىق پسيحولوگيا تۋرالى 30 شاقتى كىتاپ جازعان جازۋشى ءارى پسيحولوگ. ونى شەتەلدىكتەر الەمدەگى ساۋساقپەن سانارلىق كاسىبي پسيحولوگتىڭ قاتارىنا قوسادى. ول وسىعان دەيىنگى ومىرلىك تاجىريبەسىن نەگىزگە الا وتىرىپ ەڭ ماڭىزدى دەگەن 22 قاعيدانى تۇجىرىمدادى. اتالمىش قاعيدالاردى Qamshy.kz اقپارات اگەنتتىگى قازاق تىلىنە ءتاجىمالاپ وقىرمان نازارىنا ۇسىنادى. 

باقىت ماقسات بولا المايدى

باقىتتىڭ ارتىنان جۇگىرۋدى توقتاتىڭىز. ءسىز باقىتتى باسقا ءبىر بەيتانىس ادامنان نەمەسە ماتەريالدىق قۇندىلىقتاردان تابا المايسىز. باقىت ءسىزدىڭ ىشكى دۇنيەڭىزبەن تىكەلەي بايلانىستى. ءسىز ومىردەن ءلاززات الا باستاعان كەزدە عانا باقىتتى بول الاسىز. ءسىز ءوز بويىڭىزداعى تالانتتى، دارىندى دامىتىپ، ءوز جەتىستىكتەرىڭىز بەن ماقساتتارىڭىزعا قايتادان نازار سالىپ كورىڭىز. بويىڭىزداعى قاسيەت پەن دارىندى ماقساتقا اينالدىرساڭىز عانا باقىتتى بولا الاسىز.

كوپشىلىكتىڭ پىكىرىنە قۇلاق اسۋدى دوعارىڭىز

ەگەر ءسىز ءوزىڭىزدىڭ جاقسى، اقىلدى جانە بارلىق جاقسىلىققا لايىقتى ادام دەپ ەسەپتەپ، سوعان بەك سەنىمدى بولساڭىز سىزگە باسقا ادامداردىڭ پىكىرى قاجەت تە بولمايدى.

ەشتەڭە سۇراماڭىز جانە ەشكىمنەن ەشتەڭە كۇتپەڭىز

ەگەر ءسىز شىن مانىسىندە جەتىستىككە جەتكىڭىز كەلسە، باسقا ادامداردان رۇقسات سۇراماڭىز. كەرىسىنشە ءسىز ءوز ءومىرىڭىزدى تولىقتاي ءوزىڭىز عانا باقىلاپ وتىرۋعا تىرسىڭىز.

تەورەتيك بولماڭىز

قىزۋ جۇمىستىڭ اراسىندا ءپىسىپ، جەتىلگەن ادام بولىڭىز. تەوريالىق بىلىمگە عانا ەمەس،پراكتيكالىق بىلىمگە، ىس-ارەكەتكە جاقىن بولىڭىز.

جوسپارلى ىس-ارەكەتتەر – ساتتىلىكتىڭ كەپىلى

ءسىز ءوزىڭىزدىڭ كۇندەلىكتى ءومىرىڭىزدى باقىلاپ، جوسپارلاپ وتىرۋدى ادەتكە اينالدىرىڭىز. بۇل دا ءبىر باقىتتىڭ كىلتى.

جانىڭىزداعى ادامدارعا سەنىمسىزدىك تانىتىپ، كۇماندانا بەرمەڭىز

جاۋىڭىز ءسىزدىڭ جانىڭىزداعى ادامدار ەمەس. ەڭ ۇلكەن جاۋىڭىز – ءوزىڭىز. سونداي-اق بۇل جاۋدى جەڭۋ دە اسا وڭاي ەمەس. وزگەلەرمەن الىسىپ ۋاقىت جوعالتقانشا، وزىڭىزبەن كۇرەسىپ، ءوز ءناپسىڭىزدى جەڭىپ،جەتىستىككە جەتىڭىز.

ءسىز بارلىعىنا ۇنايتىن دوللار ەمەسسىز

ەگەر ءسىز بارلىعىنا بىردەي ۇناۋعا تىرىسىپ، سوعان ساي ارەكەت جاساساڭىز، وڭباي قۇلايسىز. ءسىزدىڭ الدىڭىزدان مىندەتتى تۇردە ۇلكەن ساتسىزدىك پايدا بولىپ، بارلىق ادامنان كوڭىلىڭىز قالاتىنى انىق. سەبەبى بارىنە ۇناۋ – مۇمكىن ەمەس. سونداي-اق قاجەتى دە شامالى. ەستە ساقتاڭىز، بارلىعىنا جاعىنۋدىڭ سوڭى ءسىزدى ىڭعايسىز جاعدايعا قالدىرىپ، ەموسيالىق تۇرعىدان قاتتى شارشاۋعا اكەلىپ سوعادى.

سىزگە كومەك كورسەتكەن ادامعا اقشا تولەڭىز

بارلىق ادام بىردەي ەمەس ارينە. الايدا كەي ادامداردىڭ ىس-ارەكەتىنەن ءسىز ءوزىڭىزدى ىشتەي كىنالى سەزىنەتىن ساتتەر بولادى. ەگەر اينالاڭىزداعى ادامدار سىزگە كورسەتكەن كومەكتەن بىرنارسە دامەتكەنىن بايقاپ، سەزگەن بولساڭىز، ولاردان «ماعان جاساعان كومەگىڭىزدىڭ قۇنى قانشا؟»، — دەپ اشىق سۇراڭىز. ءوزارا ەسەپتەسىپ، قوش ايتىسىڭىز. الايدا ءوزىڭىز بىرەۋگە تەگىن كومەك كورسەتسەڭىز ودان ەشتەڭە كۇتپەڭىز. ال ەگەر ۇزاق ۋاقىتىڭىزدى الاتىن بولسا، اشىق اڭگىمەگە كوشىپ، بەلگىلى ءبىر كولەمدە اقشا تولەۋ كەرەكتىگىن ايتىڭىز.

شىنايى دۇنيەنى ارمانداڭىز

بولمايتىن نارسەلەردى قيالداپ ۋاقىت جوعالتپاڭىز. ەگەر قيالداۋ ۇنايتىن بولسا، شىنايى، ورىندالاتىن دۇنيەلەردى ويلاعان ءجون. ءسىزدىڭ العا قويعان ماقساتىڭىز بەن قيالىڭىز بىر-بىرىمەن ۇيلەسىم تابۋى كەرەك.

دەپرەسسيا – قاراڭعى تۇنەك ەمەس

دەپرەسسياعا سالىنىپ، ومىردەن تۇڭىلۋگە جول بەرمەڭىز. دەپرەسسيا – تىم اۋىر، ءقاۋىپتى دەرت. ءبىراق كۇيزەلىسكە تۇسكەن كەزدىڭ دە پايدالى تۇسىن اڭعارۋعا بولادى. كۇيزەلىسكە ءتۇسۋ ءسىز ءوز ءومىرىڭىز تۋرالى ويلانىپ، وتكەن كۇندەرىڭىزگە ساراپتاما جاساۋىڭىزعا مۇمكىندىك بەرەدى. وسى تۋرالى تولىقتاي ويلانىپ، تولعانىپ، ءبىر شەشىم قابىلداڭىز. تەك كۇيزەلىسكە تۇسكەن ۋاقىتىڭىز ۇزاققا سوزىلماسىن. شەشىم قابىلداعان بويدا العا جىلجىڭىز، ماقسات قويىپ، سول ماقساتقا جەتۋ ءۇشىن ايانباي ەڭبەك ەتىڭىز.

دۇشپاندارىڭىزبەن ارالاسىڭىز

دوستارمەن ارالاسىپ، سويلەسىپ، ۋاقىت وتكىزۋ وتە پايدالى ءارى جاعىمدى ەكەنى بەلگىلى. بۇعان داۋ جوق، ارينە. الايدا دۇشپانىڭىزعا اينالعان ادامدارمەن ارالاسۋ دا سىزگە پايدا اكەلەتىنىن ۇمىتپاڭىز. ءسىز ولارمەن ارالاسا وتىرىپ ءوزىڭىز تۋرالى جاڭا اقپارات بىلە الاسىز. ول سىزگە ۇناۋى دا، ۇناماۋى دا مۇمكىن. الايدا "سىن تۇزەلمەي، ءمىن تۇزەلمەيدى" دەگەندى جادىڭىزدا ۇستاڭىز. كەي كەزدە دوستاردان گورى دۇشپاننىڭ سوزىنە قۇلاق اسقان دا پايدالى.

كىتاپ – ەڭ جاقسى كەڭەسشى

جاقسى كىتاپتى وقۋ ءارقاشان پايدالى. سىزگە كوڭىل كوتەرىپ، دوستارمەن قىدىرعاننان گورى كىتاپ وقىعان الدەقايدا پايدالىراق.

ۋاقىتىڭىزدى ءتيىمدى جۇزەگە اسىرىپ، پايدالى وتكىزىڭىز

ومىردە ءار مينۋتىڭىزدى پايدالى دۇنيەگە ارناڭىز. سونداي-اق بارلىق زەيىنىڭىزدى پايدالى دۇنيەگە اۋدارىڭىز. مىنا شارشاعان، جابىرقاعان، كۇيزەلىسكە تۇسكەن الەمنەن جاقسى، پايدالى دۇنيەنى ىزدەپ، سوعان ۇمتىلىڭىز. نەگىزى كوپشىلىككە عىلىم مەن فيلوسوفياسىنىڭ پايداسى زور.

تابىسقا جەتۋگە ارنالعان قارىم-قاتىناس قۇرۋعا تالپىنىڭىز

ەگەر سىزگە رومانتيكالىق نەمەسە رەسمي قارىم-قاتىناس كەرى اسەر ەتكەنىن سەزسەڭىز، وندا باسقا نۇسقالاردى دا قاراستىرۋ كەرەك. سەبەبى ءسىزدىڭ ىشكى سەزىمىڭىز الدامايدى. وزىڭىزگە ۇنامايتىن قارىم-قاتىناس ساتتىلىك پەن تابىسقا جەتۋگە كەرى اسەرىن تيگىزەدى.

ادامداردان قورىقپاڭىز

ەگەر ءسىز بەيتانىس ادامدارمەن سويلەسۋگە قورىقساڭىز، بۇل كەمشىلىكتى مىندەتتى تۇردە جويىڭىز. ەڭ بولماسا، العاشقى سەكۋندىندا بەيتانىس ادامدارعا جىلىشىراي تانىتىڭىز، سول كەزدە بەيتانىس ادام دا ەڭ جاقىن ادامعا اينالۋى بەك مۇمكىن.

ايەلدەردىڭ تۇسىنىكسىز لوگيكاسى تۋرالى بىرەر ءسوز

نەگىزىندە ايەلدىڭ نەمەسە ەركەكتىڭ لوگيكاسى دەپ بولەك قاراستىرۋدىڭ ءوزى لوگيكاعا قايشى. ادام نە اقىلدى، نە اقىماق بولا الادى. بار بولعانى وسى.

جالعىزدىقتان قورىقپاڭىز

ەگەر ءسىز رومانتيكالىق قارىم-قاتىناستان كەيىن جالعىز قالعان بولساڭىز قورقۋدىڭ ەش قاجەتى جوق. جالعىزدىق – ءسىزدىڭ رۋحاني تۇرعىدان كەمەلدەنۋىڭىزگە اسەر ەتە الادى. سونىمەن بىرگە وز-وزىڭىزبەن وڭاشا قالۋ سىزگە الدەقايدا پايدالى بولماق.

قۋانىشپەن ءبولىسىڭىز

ءوز باقىتىڭىزعا، قۋانىشىڭىزعا كەلگەن كەزدە ەشقاشان ەگويست بولماڭىز. ءسىز قۋانىشتى ءبولىسىپ، ءسۇيىنشىسىن سۇراعان سايىن قۋانىش ەسەلەنە تۇسەدى. سونداي-اق سەن جاقىندارىڭنىڭ قۋانىشتان بال-بۇل جانعان ساتىنە كۋا بولاسىڭ. بۇل دا ءبىر باقىت ەمەس پە؟!

ءسىزدى ەشكىم توقتاتا المايدى

قاراپايىم عانا ەرەجە بار. كەي ادامدار تەز قوزعالادى، ال ءسىز ءوز شاما- شارقىڭىز جەتكەنشە قوزعالاسىز. باستىسى – قوزعالىس. 

ءسىزدى بالاعاتتاسا دا ءمان بەرمەڭىز

ءوز ماقساتىڭىزعا جەتكەن كۇنى ءسىز تۋرالى ايتقان ورىنسىز سىن-پىكىر دە، بالاعات سوزدەر مەن عايبات سوزدەر دە ءمان-ماعىناسىن جوعالتادى. ءسىز ول تۋرالى ءتىپتى ۇمىتىپ كەتۋىڭىز مۇمكىن.

ءوز-وزىڭىزدى ماقتاپ، ماداقتاي ءبىلىڭىز

ءوز-وزىن ماقتاپ، ماداقتاي الماعان ادام بوتەن ادامداردى سىنعا الىپ، سولاردىڭ ءمىنىن تەرىپ وتىرادى. ءوزىنىڭ ايتارى بولماسا دا وسەكتەپ، عايباتتاۋعا شەبەر بولىپ الادى.

ءوزىڭىز ءۇشىن ءومىر ءسۇرۋدى ۇيرەنىڭىز

ەگەر ءسىز ءوزىڭىزدىڭ ومىرلىك قاعيدالارىڭىزدى جانىڭىزداعىلارعا ءتۇسىندىرىپ، ءوز پىكىرىڭىزدى قورعاشتاپ، اقتالساڭىز، وندا ءبىلىڭىز، ءسىز باسقا ادامدار ءۇشىن ءومىر ءسۇرىپ ءجۇرسىز. تەز ارادا وزگەرۋ قاجەت. 

بۇل قاعيدالاردى ۇستانۋ ارقىلى ءومىردى الدەقايدا جەڭىل ەتىپ، جاقسى جاعىنان وزگەرتۋگە بولادى. ارينە، بارلىق قاعيدانى بىردەن ورىنداپ، جۇزەگە ورىنداۋ قيىنعا سوعاتىنى بەلگىلى. الايدا كۇنىنە 3-4 قاعيدانى ۇستانىپ، ءوزىڭىز بەن ءناپسىڭىزدى ۇيرەتىڭىز. ءبىلىڭىز، ءسىزدىڭ ەڭ باستى جاۋىڭىز – ءوز ءناپسىڭىز. ساتتىلىك سەرىك بولسىن!