الەم قازىرگى قازاق ادەبيەتىمەن تانىسادى. «جاھانداعى زاماناۋي قازاقستاندىق مادەنيەتى» جوباسى اياسىندا قازىرگى قازاق ادەبيەتى انتولوگيالارىن بۇۇ-نىڭ 6 تىلىنە اۋدارۋ جۇمىسى جالعاسۋدا، دەپ حابارلايدى Qamshy.kz اقپارات اگەنتتىگى.

اتالمىش جوبا اياسىندا قازىرگى قازاق ادەبيەتىن بۇۇ-نىڭ 6 تىلىنە اۋدارۋعا بايلانىستى «ۇلتتىق اۋدارما بيۋروسى» وتكىزگەن كەزەكتى جيىن الماتى قالاسىندا ءوتتى. جيىندا ۇلىبريتانيا، يسپانيا، رەسەي، فرانسيا جانە قىتايدان كەلگەن اۋدارماشىلار مەن ارىپتەس ۇيىمداردىڭ وكىلدەرى جۇمىس بارىسى جايلى باياندامالار جاساپ، اۆتورلارمەن پىكىر ءبولىستى.

وسى جۇمىسقا قاتىسىپ جاتقان ۇلىبريتانيا، يسپانيا، فرانسيا، رەسەي جانە جۇڭگو اۋدارماشىلارى مەن ادەبيەتشىلەرى، اۋدارما جانە باسپا ۇيىمدارىنىڭ وكىلدەرى شىعارمالارى قازىرگى قازاق ادەبيەتى انتولوگياسىنا ەنگەن اۆتورلارمەن كەزدەسۋ ءۇشىن قازاقستانعا ارنايى ساپارمەن كەلگەن.

جيىندى اشقان «ۇلتتىق اۋدارما بيۋروسى» قوعامدىق قورىنىڭ ديرەكتورى راۋان كەنجەحان ۇلى ءوز سوزىندە بۇل – جىلدار بويى كۇتكەن جوبا ەكەندىگىن ايتىپ، ونىڭ ماڭىزدىلىعىنا توقتالىپ ءوتتى.

«بۇل جوبا ق ر پرەزيدەنتى نۇرسۇلتان نازاربايەۆتىڭ باستاماسىمەن جۇزەگە اسىپ جاتقان «رۋحاني جاڭعىرۋ» باعدارلاماسى باعىتتارىنىڭ ءبىرى. جوبا تاۋەلسىزدىك جىلدارىنداعى قازاق ادەبيەتى مەن مادەنيەتى، مۋزىكاسى مەن بەينەلەۋ ونەرىن، حورەوگرافيا، كينو جانە تەاتر سالاسىنداعى جەتىستىكتەردى الەمگە تانىتۋدى ماقسات ەتەدى. سونىڭ ىشىندە، اتالعان جوبا اياسىندا قازىرگى قازاق پروزاسى مەن پوەزيا جيناقتارىن 6 تىلگە اۋدارۋ قولعا الىندى.

بۇل جوبا بارشامىزعا ۇلكەن جاۋاپكەرشىلىك جۇكتەيدى. قولعا الىنعان جۇمىستان بارىنشا ساپالى ناتيجە كورسەتىپ، بۇكىل دۇنيە ءجۇزى وقىرمانداردىڭ كوڭىلىنەن شىعۋ ءۇشىن الەم بويىنشا ەڭ بەدەلدى ۇيىمدار مەن اۋدارماشىلاردى جۇمىسقا تارتقىمىز كەلدى. بۇگىندە بۇل جۇمىستىڭ بەل ورتاسىنا تاياپ قالدىق»، - دەپ ايتىپ ءوتتى راۋان كەنجەحان ۇلى.

ايتا كەتەيىك، اعىلشىن تىلىنە اۋدارىلعان شىعارمالار تەك ۇلىبريتانيا ءۇشىن عانا ەمەس، اعىلشىن تىلىندە سويلەيتىن اقش، اۆستراليا، جاڭا زەلانديا جانە كانادا سەكىلدى ەلدەردىڭ دە وقىرماندارىنا ۇسىنىلاتىن بولادى.

ەڭ ۇلكەن ءتارجىماشىلار توبىنىڭ كەمبريدجدەن كەلگەنىنەن حاباردار ەتتى. يسپان تىلىنەن ءتارجىمالايتىن پروفەسسور حواكين ەنريكە توركەمادا سانچەس، فرانسۋز تىلىنە اۋدارۋمەن تانىلعان اقىن كريستينا زەيتۋنيان-بەلوۋس، رەسەيلىك جازۋشى ماكسيم زامشيەۆ، پوەتيكالىق اۋدارما سالاسىنىڭ مامانى الەكساندرا شيەۆەليەۆا، جەتى ءتىل بىلەتىن ەلەكتروحيميالىق عىلىمداردىڭ دوكتورى فيليپ ريگو، قازاقستان مەن رەسەيگە ورتاق ادەبيەتشى، اقىن ۆلاديمير بويارينوۆ، جۇڭگو ەلىندەگى تانىمال قازاق قالامگەرى اكپار ءماجيت، قازاقستاننىڭ ۇلىبريتانياداعى ەلشىلىگىندە كەمبيردجدىك اۋدارماشىلارمەن تىكەلەي جۇمىس ىستەيتىن ءاسيا باعداۋلەت قىزى اۋدارماداعى كەيبىر قاتەلىكتەر مەن جۇمىس بارىسىندا تۋىنداعان قيىندىقتارعا توقتالىپ ءوتتى.

قازىرگى قازاق ادەبيەتىن 6 تىلگە اۋدارۋ جۇمىسىنا ءار ەلدەن قانداي ۇيىمدار مەن اۋدارماشىلار اتسالىساتىنى جايىندا ايتىپ وتەيىك.

قازاق ادەبيەتى جيناقتارىن اعىلشىن تىلىنە اۋدارۋ، باسىپ شىعارۋ جانە تاراتۋ جۇمىسى كەمبريدج ۋنيۆەرسيتەتى باسپاسىنىڭ قاتىسۋىمەن ىسكە اسۋدا. اتالمىش ۋنيۆەرسيتەت باسپاسى جوباعا تاجىريبەلى اۋدارماشىلار مەن بەدەلدى ادەبيەتشى مامانداردى تارتقان. بريتاندىق ارىپتەستەر «مادەني يندۋكسيا» تاجىريبەسىن قولدانۋدى ۇسىندى. وسى ساپار بارىسىندا انتولوگيا جوباسىنا قاتىسۋشى شەتەلدىك ماماندار قازاقستاندىق اۆتورلارمەن اۋدارماعا بايلانىستى تۋىنداعان سۇراقتارىن تالقىلاپ قانا قويماي، قازاقستان مادەنيەتى، تاريحى جانە قازىرگى تىنىس-تىرشىلىگىمەن تەرەڭ تانىساتىن بولادى.

قازىرگى قازاق ادەبيەتى انتولوگياسىن يسپان تىلىندە سويلەتۋگە يسپانيا مادەنيەت مينيسترلىگى قولداۋ كورسەتىپ، ايگىلى «سەرۆانتەس ينستيتۋتى» كەڭەسشى رەتىندە قاتىسادى. جوباعا ەۋرازيا جانە ورتالىق ازيا ەلدەرى ادەبيەتىن اۋدارۋعا ماماندانعان تاجىريبەسى مول اۋدارماشىلار تارتىلعان.

انتولوگيانىڭ فرانسۋز تىلىندەگى نۇسقاسىن دايىنداۋعا پاريج قالاسىنىڭ مەرياسى جانە فرانسيا ۇلتتىق كىتاپ ورتالىعى قاتىسسا، ورىس تىلىندە ءماتىن اۋدارماسى مەن ادەبي رەداكسياسى جۇمىسىن ۇيلەستىرۋگە رەسەي جازۋشىلار وداعىنىڭ ماسكەۋلىك ۇيىمى، ال جيناقتى باسىپ شىعارۋ مەن تاراتۋعا م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ باسپاسى اتسالىسادى.

قازاق ادەبيەتىنىڭ جيناقتارىن جۇڭگو تىلىنە اۋدارۋ، باسىپ شىعارۋ جانە تاراتۋمەن جۇڭگو حالىق رەسپۋبليكاسىنىڭ «ۇلتتار باسپاسى» اينالىسادى.

جيناقتاردى اراب الەمىنە ەگيپەت اراب رەسپۋبليكاسىنىڭ مادەنيەت جانە ءبىلىم ورتالىعى تانىستىراتىن بولادى.

مىنە، وسىنداي سەرىكتەس-ۇيىمدار اۋدارما، باسىپ شىعارۋ، تاراتۋ-ناسيحاتتاۋ جۇمىستارىنا 50-دەن اسا مامان تارتىپ، قازىرگى تاڭدا اعىلشىن، فرانسۋز، ورىس جانە يسپان تىلدەرىندەگى جولما-جول اۋدارما جۇمىسى اياقتالدى. ال جۇڭگو جانە اراب تىلدەرىندەگى جولما-جول اۋدارما جۇمىسى ءالى ءجۇرىپ جاتىر.