مەملەكەت باسشىسى مينيسترلەر مەن اكىمدەرگە كۇندىز-تۇنى جۇمىستى ويلاۋعا كەڭەس بەردى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. قازاقستان پرەزيدەنتى نۇرسۇلتان نازاربايەۆ ۇكىمەت وتىرىسىنىڭ سوڭىندا مينيسترلەر مەن اكىمدەردى ماقتاپ، ولارعا سەنەتىنىن ايتتى.

ۇكىمەتتىڭ كەڭەيتىلگەن وتىرىسىنىڭ سوڭىندا مينيسترلەر مەن اكىمدەر پرەزيدەنتتەن ماقتاۋ ءسوز ەستىدى.

"بارلىعىڭدى تاڭداپ وتىرىپ تاعايىندادىم: اكىمدەردى دە، سەندەردى دە (مينيسترلەردى). سەندەر باسقا مەملەكەتتىك قىزمەتكەرلەردى تاعايىندادىڭدار. سوندىقتان ءبىزدىڭ ءبىر-بىرىمىزدىڭ الدىمىزداعى جاۋاپكەرشىلىگىمىز بىردەي. مەن ءارقايسىڭدى، قانداي قابىلەتتەرىڭ، بىلىمدەرىڭ مەن تاجىريبەلەرىڭ بار، بارلىعىن بىلەمىن. بۇگىنگى ۇكىمەت قانداي ماقسات بولسا دا، ىستەي الادى، قولىنان كەلەدى. ءبىراق ءوزىن-وزى قامشىلاپ، جۇمىس ىستەتكىزۋ كەرەك. كۇندىز-تۇنى جۇمىستى ويلاۋ كەرەك"، — دەدى نازاربايەۆ وتىرىستى قورىتىندىلاپ. 

♦ەلباسى: سەندەر، مينيستر ەمەس، قورقاقسىڭدار...

وسى ورايدا مەملەكەت باسشىسى قازاقتىڭ ماقالىن كەلتىردى. 

"ايتقاننىڭ اۋزى جامان، جىلاعاننىڭ كوزى جامان" دەگەن ءسوز بار. مەن سەندەردى رەنجىتەيىن دەپ سۇراپ وتىرعان جوقپىن، سەندەرگە سەنگەننەن كەيىن ايتىپ وتىرمىن"، — دەدى ەلباسى. 

نازاربايەۆ ۇكىمەت پەن اكىمدەرگە بىرىگىپ، حالىقتىڭ تابىسىن كوتەرىپ، ءال-اۋقاتىن جاقسارتۋدى تاپسىردى.

"قاي وڭىردە حالىقتىڭ تۇرمىسى، جالاقىسى وسسە، سول ايماق جاقسى. مىنە، وسىنداي كريتەريي قويۋ كەرەك. ول ءۇشىن ستراتەگيالىق مەملەكەتتىك باعدارلامالار، اسىرەسە، ۇلت جوسپارى، جولداۋلار مەن باسقا دا مىندەتتەردىڭ  ساپالى ءارى ءتيىمدى ورىندالۋى ۇكىمەتتىڭ باستى مىندەتى بولۋى ءتيىس. بىلىمدەرىڭ دە، جىگەرلەرىڭ دە، باعدار دا بار، ونى ورىندايتىن رەسۋرستار دا بار"، — دەپ تۇيىندەدى ءسوزىن پرەزيدەنت.