الەمگە ايگىلى ءارى اقىلدى سايت Wikipedia-عا 35 مىڭ ماقالا جازىپ، وعان 3 ميلليوننان اسا تۇزەتۋلەر ەنگىزگەن كىم ەكەندىگى بەلگىلى بولدى. شەتەلدىك CBS تەلەارناسى سول اۆتور جايىندا سيۋجەت ءتۇسىرىپتى، دەپ جازادى Qamshy.kz اقپارات اگەنتتىگى.

بۇكىل ەلگە تانىمال اقىلدى سايت-ەنسيكلوپەدياداعى 35 مىڭ ماقالانىڭ اۆتورى جانە وعان ءۇش ميلليوننان اسا تۇزەتۋلەر ەنگىزگەن، 35 جاستاعى امەريكالىق ستيۆەن پريۋيتت ەكەن. ول Reddit سايتىندا بىردەن تانىمالدىلىققا يە بولدى.

پريۋيتت ۆيرگينيادا اتا-اناسىمەن بىرگە تۇرادى. ول اقش-تىڭ كەدەن جانە شەكارا قورعاۋ قىزمەتىنىڭ ارحيۆىمەن جۇمىس ىستەيدى جانە تاريحتى وتە قاتتى جاقسى كورەدى ەكەن. ءپريۋيتتىڭ ايتۋىنشا، ارىپتەستەرى ونى "ەسىنەن اداسقان" دەپ اتايتىن كورىنەدى. ءتىپتى، بىرگە تۇراتىن اتا-اناسى دا بالاسىنىڭ قىزىعۋشىلىعىن كورىپ، ونى "ەسى دۇرىس ەمەس" دەپ كۇماندانعان. پريۋيتت كۇندەلىكتى الەمدەگى ەڭ تانىمال ەلەكتروندى ەنسيكلوپەديانى رەداكسيالاۋ ءۇشىن ءۇش ساعات ۋاقىتىن جۇمسايدى ەكەن. ءبىر قىزىعى، ول ءوزىنىڭ جۇمىسىنا ءبىر تيىن دا الماي، Wikipedia سايتىندا تەگىن ىستەيدى.

اۆتوردىڭ ايتۋىنشا، Wikipedia سايتى ءۇشىن جۇمىس ىستەۋدىڭ ءوزى ونى راحاتقا بولەيدى.

-مەنىڭ انام كسرو-دا تۋىپ-وسكەن، سوندىقتان مەن اقپارات بوستاندىعىنىڭ قانشالىقتى قۇندى ەكەنىن بىلەمىن، - دەيدى پريۋيتت.

ول 2003 جىلدان بەرى اتالمىش سايتتاعى ماقالالاردى رەداكسيالاپ كەلەدى. وسى كۇنگە دەيىن ءدال ول سياقتى بۇل سايتقا ەشكىم تۇزەتۋلەر ەنگىزبەگەن. ونىڭ باقتالاسى بولادى-اۋ دەگەن اۆتور 900 مىڭ تۇزەتۋلەر ەنگىزگەن. 2017 جىلى Time جۋرنالى ءپريۋيتتى ينتەرنەتتى ەڭ ىقپالدى 25 ادامنىڭ قاتارىنا قوسقان، سونداي-اق، ول تىزىمدە دونالد ترامپ پەن كيم كارداشيان دا بار.

CBS تەلەارناسىنداعى سيۋجەت جارىق كورگەنگە دەيىن پريۋيتت بەلگىلى تۇلعا ەمەس ەدى، كەيىننەن ونىڭ تانىمالدىلىعى بىردەن ارتىپ، Reddit سايتىندا جۇلدىزعا اينالدى. اتالمىش پورتالدا ءپريۋيتتىڭ ەڭبەگىن تالقىلاعان ءتۇرلى ماتەريالدار جارىق كورە باستادى. ينتەرنەت قولدانۋشىلارى ونى قازىرگى كۇننىڭ «باتىرى» دەپ تاۋىپ، Wikipedia سايتىنا ەمەس، قارجىنى ءپريۋيتتىڭ وزىنە ءبولۋ كەرەكتىگىن ايتادى. سونىمەن قاتار، جەلى قولدانۋشىلارى الەمگە ايگىلى ەلەكتروندى ەنسيكلوپەديادا اۆتور تۋرالى بىردە-بىر شاعىن ماقالا جوق ەكەندىگىن تىلگە تيەك ەتتى.

ايتا كەتەيىك، بۇگىندە Wikipedia سايتىندا 6 ميلليونعا جۋىق ماتەريال بار. 

ۇسىنعان: نازەركە لابيحان