ءار ادام ءوزىنىڭ قانشا جىل ءومىر سۇرەتىنىن بىلمەيدى. الدا نە كۇتىپ تۇرعانى دا بەيمالىم. ءار ادامنىڭ ءبىر ايتارى بارى – انىق. وتىزعا كەلىپ وردا بۇزباسام دا، وڭدى-سولىمدى ءبىراز تانىپ، اق-قارانى ءبىر كىسىدەي اجىرا الاتىن جاسقا كەلدىم. ەگەر ماعان ون جىل بۇرىن بىرەۋ دەنساۋلىعىڭدى كۇت دەپ ايتسا، ءدال قازىرگىدەي «كىشىگىرىم» قيىندىقتار بولماس ەدى. ەگەر بىرەۋ ون جىل بۇرىن ماعان كىتاپتار وقىپ ال، "ءويت-بۇيت" دەپ ازىن-اۋلاق كەڭەستەرىمەن بولىسسە، ءبىرىن ەسكەرمەسەم دە، ءبىرىن ەسكەرەتىنىم، ول ەندى انىق.
ەندەشە، "بۇگىندە ىزىمنەن كەلە جاتقان سىڭلىلەرىمە پايداسى تيەر" دەپ، ءوزىم باستان وتكىزگەن، تاجىريبەدەن وتكەن، ويىمدا جۇرگەن كەڭەستەرىممەن ءبولىسۋدى ءجون سانادىم...
- دەنساۋلىعىڭدى كۇت. اسىرەسە، ءتىسىڭدى. دەنىڭنىڭ ساۋ بولعانى - وزىڭنەن وزگە ەشكىمگە كەرەك ەمەس.
- كوز كورىپ، قولعا ءىلىنىپ، ءتىس باتقاندى جەي بەرمە. تالعاپ، تاڭداپ جە. دەنىڭنىڭ ساۋلىعى تىكەلەي نە جەيتىنىڭە بايلانىستى.
- ءبىلىم ال. ىزدەن. تالما. قاي زاماندا دا تەك ءبىلىمدى وزادى.
- ماۋباس بولما. ۇيىقتايتىن جاستا ەمەسسىڭ. ۇيقىعا ۋاقىت تابىلار، ءبىراق ۋاقىت سەنى كۇتپەيدى.
- ءتىل ۇيرەن. ول ءبىلىم كوپ نارسەگە ەسىك اشادى.
- ءوزىڭدى، مۇمكىندىگىڭدى ءتۇرلى سالادا بايقاپ كور. ءوزىڭدى تابۋعا، ىشكى «مەنىڭدى» قاناعاتتاندىرۋعا تىرىس. بالكىم، امالسىزدان ۇستاز بولىپ جۇرگەن كەرەمەت ساۋلەتكەر شىعارسىڭ؟
- كەڭ بول. جاقسىلىق تا، جاماندىق تا قايتادى. كەيدە ءتىپتى ەسەلەنىپ...
- "جاقسى جار ءناسىپ ەت" دەپ، جاقسى جار بولۋعا نيەتتەنىپ ءجۇر. لايىقتى جىگىت كەزدەسىپ، ۇسىنىس جاساپ جاتسا، باس تارتپا. ەرتە تۇرمىس قۇرۋ - قىز بالا ءۇشىن قاي تۇرعىدان دا جاقسى!
- سپورتپەن شۇعىلدان. تىم قۇرىعاندا، كۇندە تاڭەرتەڭ 10-15 مينۋت جاتتىعۋ جاساۋدى ادەتكە اينالدىر.
- ءدىندى تىكەلەي ومىرىڭە ارالاستىر. قۇلشىلىعىڭدى تۇزەسەڭ، تىرشىلىگىڭ تۇزەلەرى حاق!
- تەك جۇمىرتقا قۋىرا ءبىلۋ – تىم از. قاشان، قانداي ادامعا تۇرمىسقا شىقساڭ دا، ول جاننىڭ تاماق جەيتىنى – ايدان انىق. دايىنداي بىلەتىن تاعامداردىڭ ءتىزىمىن كوبەيت.
- جان-جاقتى بول. اس بولمەسىندەگى داستارقاننىڭ ءبىر شەتىندە كومپيۋتەرىڭ قوسىلىپ، ءبىر شەتىندە قامىرىڭ جايىلىپ، ورىندىعىڭدا توقىماڭ تۇراتىن كەلىنشەك بولۋىڭ كەرەك... ايەل قىرىق جاندى دەگەن سول.
- كوكەيىڭدە جۇرگەن كىتاپتاردى وقىپ ال. كەيىن ۋاقىتىڭ بولمايدى. جەكە كىتاپحاناڭدى تولتىرا بەر... ءتۇبى كەرەك بولادى.
- اكە-شەشە، باۋىرلاردى ءجيى ىزدە، ءجيى كەزدەس. «ءبىر تۋماق بار، ءبىر جۇرمەك جوق». كەيىن ولەردەي ساعىناتىن بولاسىڭ... ءتىپتى قاراپايىم وتباسىلىق كەشكى استى دا... جالعاندا سەنى بار كۇيىڭدە تۋعانىڭنان ارتىق ەشكىم جاقسى كورمەيدى. قالعانىنىڭ ءبارى ءتۇبى «ساتىپ» كەتەدى.
- كوشتەن قالما. تەحنيكانىڭ قاي ءتۇرى بولسىن ۇيرەنۋگە، يگەرۋگە تىرىس.
- ارزان كوپ زاتتان كورى، ساپالى ءبىر زات الۋدى ۇيرەن. كورسەقىزار بولما.
- اقشاڭدى ۇنەمدەپ، جيناپ ۇيرەن. قاي زاماندا دا كەرەك ادەت.
- ءار جىلى تۋعان ەلدىڭ كورىكتى ءبىر جەرىنە بارۋدى ماقسات قوي. شەتەلگە كەيىن جولداسىڭمەن باراسىڭ.
- وز-وزىڭە كۇتىم جاساۋدى بۇگىننەن، ءدال قازىردەن باستا. ەرتەڭگە قالدىرا بەرمە. ەرتەڭ بۇگىننەن سوڭ كەشەگە اينالادى. دەمەك، ورالمايدى... جىل سايىن قارتايىپ بارا جاتقانىڭ - اقيقات.
- وسى جازىلعاندارعا ءاتۇستى قاراماي، ءبارىن بولماسا دا، بىرەن-سارانىن جادىڭدا ساقتاپ ال. سوندا "نەگە وسىنى دەر كەزىندە ماعان ەشكىم ايتپاعان" دەگەن كىشىگىرىم وكىنىشتە بولمايسىڭ. سوندىقتان، بارىنە بۇگىننەن تالپىن...
ماقپال سەمباي
پىكىر قالدىرۋ