جاستار جىلىنىڭ اياسىندا قوستانايدا "Zhas project" جوباسى ءوز جۇمىسىن باستادى. قوستاناي وبلىسىنىڭ اكىم ورىنباسارى مارات جۇندىبايەۆ ەلباسىنىڭ سوزدەرىن ارقاۋ ەتە وتىرىپ، توبىلدىق جاستارعا ارناپ ءسوز سويلەگەن كەزدە ىڭعايسىز جاعداي ورىن الىپتى.

"جاستار ءبىزدىڭ ءۇمىتىمىز، ەرتەڭگى تىرەگىمىز. سىزدەرگە ۇلكەن مىندەت جۇكتەلدى. قازاقستاننىڭ بەدەلىن وسىرىپ... ءوسىرىپ، زور تابىستارعا جەتۋگە تىلەكتەسپىز" دەپ قالدى مىنبەردەن جۇندىبايەۆ مىرزا.

وسى ءبىر قىسقا عانا ۆيدەو تەز ارادا الەۋمەتتىك جەلىدە شارلاپ، قاتتى تالقىعا ۇشىرادى. اكىم ورىنباسارىن سىناپ، ايىبىن بەتىنە باسىپ، ءتىپتى مازاق قىلعاندار بارشىلىق. دەگەنمەن مىڭنىڭ اراسىنان مارات جۇندىبايەۆقا قولداۋ تانىتقاندار دا كوزگە ءتۇستى.

مىنا ءبىر پىكىردى وقىرمان نازارىنا ۇسىنامىز: "قازاق بالاسى: بۇندايعا كۇلمەيدى ، قايتا ۇيرەنىپ جاتقانىنا دەمەۋ بولىپ تۋرالاپ جىبەرۋ كەرەك. ءار قاتەسىنە كۇلە بەرسەڭدەر، ەرتەڭ ەشقايسىسى ۇيرەنبەي قويادى ۇيالىپ. ودان كەيىن كۇلگەن ادامدار وزدەرىڭ تۋا سالا تازا سويلەپ كەتتىڭدەر مە ؟ ولار اداسىپ، باسقا تىلدە سويلەسىپ، ەندى انا ءتىلىن ۇيرەنەيىپ جۇرگەندە دەمەۋ بەرىڭدەر. جوعارىداعى كومەنتتەردى وقىساڭ، ءبارى سۋدان تازا، سۇتتەن اق . جىعىلعان ادامعا كۇلمەي، قايتا ورنىنا كوتەرىپ، تۇرعىزىپ جىبەرەتىن قازاق ەدىك. وكىنىشتى، مايدالانىپ بارامىز".

تالاي الاش قايراتكەرىن دۇنيەگە اكەلگەن قاسيەتتى توبىل-تورعاي ءوڭىرى بۇگىندە ابدەن ورىستانىپ كەتكەن دەۋدەن اۋلاقپىز. سەبەبى سوڭعى جىلداردا قوستاناي ءوڭىرىنىڭ بەلسەندىلىگى ارتقان. مەملەكەتتىك ءتىلدىڭ مارتەبەسىن وسىرۋگە ارنالعان شارالار كوپتەپ ۇيىمداستىرىلىپ جاتىر. دەسە دە اتقارىلعاننان بۇرىن اتقارىلاتىن شارۋالار شاش-ەتەكتەن.

ءبىر ايتا كەتەرلىگى، مارات قونىسباي ۇلى 1974 جىلى دۇنيەگە كەلگەن ازامات. 1997 جىلى ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە تاريح ماماندىعى بويىنشا ءبىلىم العان. سودان سوڭ 2002 جىلى قازاق قۇقىقتانۋ جانە حالىقارالىق قاتىناستار ينستيتۋتىن قۇقىقتانۋ ماماندىعى بويىنشا، 2009 جىلى حالىقارالىق بيزنەس ۋنيۆەرسيتەتىن «مەملەكەتتىك جانە جەرگىلىكتى باسقارۋ» ماماندىعى بويىنشا ءتامامداعان. ساياسي عىلىمدار كانديداتى. قوستاناي وبلىسىنىڭ اكىمى ارحيمەد مۇحامبەتوۆتىڭ ورىنباسارى بولماس بۇرىن ليساكوۆسك قالاسىن باسقارعان.

مارات جۇندىبايەۆ مىرزا مىنا ءبىر كەلەڭسىز جاعدايدان كەيىن ەل-جۇرت جاعامنان الدى دەمەي، مۇنىمىزدى قامشىلاۋ دەپ تۇسىنسە قانداي عانيبەت بولار ەدى. سەبەبى وزگە جۇرتتىڭ تىلىندە سايراۋ، ارينە، كەرەمەت، الايدا ءوز انا ءتىلىڭدى ءبىلۋ نە بىلمەۋ ازاماتتىققا سىن.