كەيدە رۋلدە وتىرىپ6 قازاق راديوسىن تىڭداپ وتىرساڭ، "باتا" دەگەن حابار ءجۇرىپ جاتادى. سول حاباردى ورتا جاستاعى ءبىر ديكتور وقيتىن. ويلاپ تۇرسام، سونداعى باتالاردىڭ ءبىرازى بۇرىنعى كەڭەستىك سارىنعا كۇيلەگەن جاساندى باتالار سياقتى كورىندى. مىسالى، سول حابار "اتادان بوتا قالعانشا، باتا قالسىن" دەپ باستالادى. مەن ويلايمىن: اۋ، "بوتا" دەگەن قازاق ۇعىمىندا كىشكەنتاي ءسابي، پەرزەنت، جاس ۇرپاقتى بەينەلەيتىن ەدى عوي. ەگەر ءوزىڭ ولگەنىڭدە ارتىڭدا بوتا قالمايتىن بولسا، ونداي باتانىڭ قۇدايعا كەرەگى بار ما؟!
بۇدان سوڭعى ءبىر ماقالى - "ارتىڭدا مال قالماسىن، تال قالسىن!" كەشەگى زۇلمات زاماندا گولوششەكين قازاقتى قويداي قىرىپ، شولاق بەلسەندىلەر "اشا تۇياق قالماسىن، اسىرا سىلتەۋ بولماسىن!" دەپ ۇرانداتىپ ەدى. اقىرىندا، ميلليونداعان قازاقتىڭ دا، ءوزىنىڭ دە باسىن جۇتتى.
مىناۋ ماقال سونىڭ ءسال جۇمسارىپ، وزگەرگەن ءتۇرى عوي. ءسىرا، اتام قازاقتىڭ مالسىز كۇنى بار ما؟! "مالى كەتسە، قازاقتىڭ جانى كەتەدى" دەمەي مە؟ بۇرىنعىنىڭ "قويان جىلعى اقسۇيەك جۇتتا تالاي بايلار قولىنا تاياق ۇستاپ قالعان" دەيتىن اڭگىمەسىن دە ەستىگەنبىز. راس-اۋ، قوراسىندا مالى جوق قازاق تالدى قايتەدى. "سۋعا كەتكەن تال قارمايتىنى" بولماسا...
اللا ادامنىڭ نيەتىنە بەرەدى دەيدى. بۇرىننان ويدا جۇرگەن كەپ ەدى. كەشەگى جۇرەكتەردى قان جىلاتقان بەيكۇنا بوتاقانداردىڭ توسىن تاقسىرەتى تىلىمىزدەگى وسى ءبىر ولقىلىقتاردى ەرىكسىز ەسكە ءتۇسىردى...
"قۇر اياققا باتا جۇرمەيدى" دەگەن ەكەن بابالارىمىز. 
ارتىڭدا كوزدەرى مولدىرەگەن بوتالارىڭ بولماسا، سول باتانى كىمگە ايتارسىڭ...
ءسوزدىڭ دە كيەسى بار. سىلدىراعان ءسوزدى بەتالدى ۇيقاستىرا بەرمەي، ويلانىپ سويلەيىك، اعايىندار!

سەرىكباي قىلىشبايدىڭ فەيسبۋكتەگى پاراقشاسىنان.