بۇل تۋرالى «نۇر وتان» پارتياسى ءتوراعاسىنىڭ ءبىرىنشى ورىنباسارى پارتيا جانىنان قۇرىلعان بالالار قۇقىعىن قورعاۋ جونىندەگى رەسپۋبليكالىق كەڭەستىڭ العاشقى وتىرىسىندا ايتتى، دەپ جازادى Qamshy.kz اقپارات اگەنتتىگى.

– كەڭەس ەلباسىنىڭ تىكەلەي تاپسىرماسىمەن قۇرىلىپ وتىر. جالپى بۇل ماسەلە ءبىرازدان بەرى كوتەرىلىپ، وسىعان دەيىن دايىندىق جۇمىستارى جۇرگىزىلىپ كەلگەنىن اتاپ وتكەن ءجون. باستى ماقسات – بالالاردىڭ قۇقىعى مەن مۇددەسىن جان-جاقتى قورعاپ، ولاردىڭ قاجەتتىلىكتەرىن قامتاماسىز ەتۋ. وسى باعىتتا ۇكىمەتپەن، جەرگىلىكتى اتقارۋشى ورگاندارمەن جانە ۇكىمەتتىك ەمەس ۇيىمدارمەن بىرلەسىپ جۇمىس ىستەيمىز. بۇل ىسكە جەتەكشى ساياسي كۇش رەتىندە پارتيانىڭ بارلىق الەۋەتى، ياعني ءماجىلىس پەن بارلىق دەڭگەيدەگى ءماسليحاتتارداعى پارتيا فراكسيالارى، ايماقتىق جانە اۋماقتىق پارتيا فيليالدارى جۇمىلدىرىلادى. ءار فيليالدا جاۋاپتى ادام بەكىتىلىپ، كەڭەس جۇمىسىنىڭ جۇيەلى تۇردە جۇرگىزىلۋىن قامتاماسىز ەتەدى، – دەدى ماۋلەن اشىمبايەۆ.

سونىمەن قاتار ول كەڭەستىڭ قىزمەت اياسىن كەڭەيتۋ ماسەلەسىنە دە نازار اۋداردى.

– بالالار قۇقىعىن قورعاۋمەن بىرگە كەڭەس قىزمەتىنىڭ اياسىن كەڭەيتىپ، كوپ بالالى وتباسىلارعا قولداۋ كورسەتۋ، جۇمىس ىستەيتىن كوپ بالالى انالارعا لايىقتى جاعداي جاساۋ سياقتى وزەكتى ماسەلەلەردى دە قامتۋدىڭ ماڭىزى زور. وسى باعىتتا دا ءتيىمدى ۇسىنىستار دايارلاۋىمىز كەرەك، – دەدى پارتيا ءتوراعاسىنىڭ ءبىرىنشى ورىنباسارى.

ءوز كەزەگىندە اتالعان كەڭەس ءتوراعاسىنىڭ ورىنباسارى، «بالالار قۇقىعىن قورعاۋ» قوعامدىق قورىنىڭ قۇرىلتايشىسى دينارا زاكييەۆا قازىرگى تاڭدا بالالار قۇقىعىن قورعاۋ جۇمىستارى كوبىنە سالدارمەن كۇرەس سيپاتىندا جۇرگىزىلىپ كەلە جاتقانىن ايتتى.

– ءبىز كوبىنە كەلەڭسىزدىكتەردىڭ سالدارىمەن كۇرەسىپ كەلەمىز. سوندىقتان كەڭەستىڭ جۇمىسىندا ەڭ الدىمەن الدىن الۋ شارالارىنا باسىمدىق بەرىپ، الدىمىزعا وسى باعىتتا كەشەندى ءىس جۇرگىزۋدى باستى مىندەت ەتىپ قويىپ وتىرمىز. وسى رەتتە جاڭادان قۇرىلىپ وتىرعان كەڭەستىڭ ناقتى جۇمىس ىستەيتىن ورگان بولاتىنىن ەرەكشە اتاپ وتكىم كەلەدى. كەڭەس ەلىمىزدىڭ بارلىق وڭىرىندەگى «نۇر وتان» پارتياسىنىڭ فيليالدارى جانىنان ءوز جۇمىسىن باستاپ، ءار بالانىڭ قاۋىپسىزدىگى مەن جايلى ءومىرىن قامتاماسىز ەتۋگە ۇلەس قوسادى، – دەيدى دينارا زاكييەۆا.

جاڭا كونسۋلتاتيۆتىك-كەڭەسشى ورگان قۇرامىنا پارلامەنت ءماجىلىسىنىڭ دەپۋتاتتارى، مەملەكەتتىك ورگاندار مەن ۇكىمەتتىك ەمەس ۇيىم وكىلدەرى، سالالىق ساراپشىلار جانە قوعام قايراتكەرلەرى مۇشە بولدى. كەڭەس مۇشەلەرىنىڭ شەشىمىمەن ونىڭ ءتوراعالىعىنا «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ سايلاندى.

جيىن بارىسىندا «Taiburyl» قوعامدىق قورى قامقورشىلار كەڭەسىنىڭ ءتوراعاسى مۇرات ابەنوۆ، «ءار بالا وتباسىمەن بىرگە بولۋى كەرەك» قوعامدىق قوزعالىسىنىڭ جەتەكشىسى شولپان بايبولوۆا، «Best for Kids» قوعامدىق قورىنىڭ ۆيسە-پرەزيدەنتى ەمين اسكەروۆ، يۋنيسەف-تىڭ بالالار قۇقىعىن قورعاۋ جونىندەگى باعدارلاماسىنىڭ ۇيلەستىرۋشىسى تاتيانا ادەرحينا جانە باسقا دا جيىنعا قاتىسۋشىلار ءسوز الىپ، بالالار قۇقىعىن قورعاۋ ماسەلەسىنە قاتىستى ءوز ۇسىنىستارىن جەتكىزدى.

جيىندى قورىتىندىلاعان «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ەلىمىزدىڭ جارقىن بولاشاعى ءۇشىن بۇل ءىستىڭ ماڭىزى زور ەكەنىن ايتىپ، بارلىق مۇددەلى تاراپتاردى بىرلەسىپ جۇمىس ىستەۋگە شاقىردى.