پەرىشتەلەر ۇيىمىزدە دە جۇرە مە؟

پەرىشتەلەر – نۇردان جاراتىلعان، سالماعى مەن ءپىشىنى بولمايدى. ولار تىنىشتىق پەن ماحاببات ورناعان وتباسىلاردىڭ تۇراقتى قوناعى. پەرىشتەلەرگە سەنۋ – يماننىڭ ءبىر تىرەگى بولىپ تابىلادى. ولار تۋرالى ءبىز نە بىلەمىز؟

اللا تاعالا ارداقتى پايعامبارىمىز (س.ع.س.) ارقىلى جابىرەيىل (ع.س.)، ميكايل (ع.س.)، يسرافيل (ع.س.) مەن ازىرەيىل (ع.س.) دەگەن ۇلكەن ءتورت پەرىشتەلەردەن بولەك، باسقا دا مىڭداعان پەرىشتەلەر بار ەكەنىن جەتكىزگەن.

ءار ادامدا ەكى پەرىشتە بولادى. ءبىرى ىزگى امالدارىمىزدى جازىپ وتىرسا، ەكىنشىسى كۇنالارىمىزدى جازادى. وسى جازىلعاندار نەگىزىندە جاراتۋشىمىز قيامەت كۇنى ۇكىم شىعارادى. (انىعىن اللا بىلەدى).

ءبىزدى باقىلاپ جۇرەتىن باسقا دا پەرىشتەلەر بار. مىسالى، بالا جاتىردا جاتقاندا بالانىڭ جىنىسىن، تاعدىرى مەن ءولىم ۋاقىتىن جازادى. اللانىڭ امىرىمەن ولار ءبىزدى باقىلاپ، قورعايدى. ولار ۇنەمى بىزبەن بىرگە: تىنىشتىقتا، ناماز وقىعاندا، جاقسى ىستەر ىستەگەندە...

جەل مەن بۇلتتاردى دا قاداعالاپ، ولاردى قاجەتتى جاقتارعا باعىتتايدى. ءتىپتى، ءاربىر جاڭبىردىڭ تامشىسى پەرىشتەلەردىڭ قاداعالاۋىمەن جاۋادى. ولار الاپات كۇشكە يە. ءبىراق بارلىق ىس-ارەكەتتەرىن اللانىڭ بۇيرىعىمەن عانا ورىندايدى.

اللانىڭ اتى اتالعان جەرگە جينالاتىن پەرىشتەلەر بار، ول ادامدارعا اللا ءوزىنىڭ مەيىرىمىن توگىپ، بەرەكە بەرەدى. زىكىرلەرىمىز بەن سالاۋاتتارىمىزدى جەتكىزۋشىلەر دە سولار.

قايدا جۇرسەك تە، جۇمىستا، ۇيدە، الىس ساپارعا شىقساق تا سەرىگىمىز بولادى. ۇيىقتاپ جاتقانىمىزدا ۇيقىمىزدى قوريدى. الايدا ءبىز ولاردى كورە المايمىز. ۇيىمىزگە پەرىشتەلەردىڭ كوپ كەلىپ، ءبىزدى قورعاپ جۇرۋلەرى ءۇشىن نە ىستەۋىمىز كەرەك؟

اللانىڭ بۇل كەرەمەت جاراتىلىستارى ماحاببات، سىيلاستىق، مەيىرىمدىلىك پەن تازالىق بار ۇيدە ءومىر سۇرەدى. ءبىراق، ۇرىس-كەرىس، اشۋ، قاتالدىق پەن مەيىرىمسىزدىك ورناعان ۇيدە تۇراقتامايدى. وزىمەن بىرگە بەرەكە مەن نەسىبەنى الىپ كەتەدى. مۇنداي ءۇي رۋحاني جاعىنان ارتتا قالىپ، تۇرعىندارى باقىتسىز بولادى.

ۇيدەن شىعىپ بارا جاتىپ ءبىز ءۇيدىڭ ءار بۇرىشىن مۇقيات تەكسەرەمىز. سول كەزدە پەرىشتەلەردىڭ دە ۇيىمىزدە قالاتىنىن ەستە ساقتايتىن بولساق، بارار جەرىمىزگە الاڭسىز، ءۇيدى ۋايىمداماي بارىپ كەلەمىز. ياعني،ءۇيىمىزدى اللانىڭ قورعاۋىندا قالدىرامىز.

ۇيگە كىرەردە اللانىڭ اتىن اتاپ، ۇيدەگى پەرىشتەلەرمەن سالەمدەسكەن دۇرىس. پايعامبارىمىز (س.ع.س.) سولاي ىستەگەن، ءتىپتى ادامدار تۇرمايتىن بوس ۇيگە كىرگەندە دە، سەبەبى وندا پەرىشتەلەر ءومىر سۇرەدى.

پەرىشتەلەرمەن بىرگە ءومىر ءسۇرۋ – وتباسىنىڭ جىلۋلىعىن ساقتاپ، بەرەكەدە، بىرلىكتە، باقىتتى ءومىر ءسۇرۋ، شىنايى دۇعالارمەن يماندى كۇشەيتىپ، اللاعا شۇكىرشىلىك ەتۋ دەگەن ءسوز.

جالعىز قالعانىمىزدا دا جانىمىزدا ەڭ كەرەمەت جاراتىلىس – پەرىشتەلەردىڭ بار ەكەنىن ۇمىتپاعانىمىز ءجون. ءبىز ءاردايىم بۇكىل الەمنىڭ راببىسى – اللا مەن پەرىشتەلەردىڭ نازارىندامىز…

Yesbergen Alaukhanovتىڭ فەيسبۋك پاراقشاسىنان