قاپتاعان الەۋمەتتىك جەلىلەردىڭ ءبىرى -فەيسبۋكتىڭ ءبىر تۇسىندا "و چەم ۆى دۋماەتە؟" دەيدى. نە ويلاسام دەپ ويلاپ وتىرمىن...
ساياساتتى ويلاۋعا ميىم جەتپەيدى. جەتسە دە، جەتپەيدى.
حالقىمدى ويلايىن دەسەم... حالقىمدى ويلاعان سوڭ، ول ويىڭدى ىسكە اسىرماساڭ، تەك ويلاپ قانا جۇرگەندەردىڭ سانىن ارتتىرىپ نە كەرەك؟ ونسىز دا ولار كوپ "قوي". جانە ول ويىڭ وزىڭە ەمەس، حالقىڭا پايدالى بولماسا، حالقىمدى ويلادىم دەپ بىرنارسە ىستەۋ - بەكەرشىلىك.
تابيعاتتى، ونىڭ قالاي قۇرىپ بارا جاتقانىن ويلاسام با ەكەن الدە؟ الايدا، ءۇي گ ۇلى مەن اۋلا گۇلىنەن باسقا ەگىپ، ءوسىرىپ كورمەگەن مەن تابيعاتتى ويلاپ جەتىستىرمەسپىن. اعاش ەگىپ، ورمان جاساماسام دا، تىم قۇرىعاندا تابيعاتقا زيانىم تيمەسە، سول دا بولسا پايدام شىعار.
جەتىم-جەسىرلەردى ويلاسام با ەكەن؟ ولاردى ويلاپ، كورىپ، ءبىلىپ، ەت-جۇرەگىم ەزىلىپ، ەشكىم جوقتا ەكى تامشى كوز جاسىمدى سىعىپ الۋدان باسقا ەش پايدام جوق. باسىنان سيپاپ، اللادان اماندىقتارىن، اداسپاۋلارىن تىلەپ، جىلى ءسوز ايتقانىم تيتتەي دە بولسىن سەپ بولسا، سولاي جاساي بەرەمىن. ودان ارىعا ازىرگە دارمەنىم جەتپەيدى. راس ءسوز.
جۇمىستى ويلاسام با ەكەن؟ نەسىن ويلايمىن ءبىراق. ون ەكى مۇشەم ساۋ بولسا، جۇمىستىڭ ءتۇر-تۇرى بار ءقازىر. شاش تاراپ، باس ۋقالاۋشىدان باستاپ، ەتىك سۇرتۋشىگە دەيىن. ءبىر ءمانىسى بولار. اش قالدىرماس جاراتقان. بارعا شۇكىر، جوققا سابىر.
ولگەنىڭشە بىتپەيتىن، ساعىزشا سوزىلعان پروبلەمالاردى ويلاسام با ەكەن؟ ونى ويلاپ قايتپەكپىن؟ ونسىز دا ولار وزدەرىن ويلاماي قالۋىڭا جول بەرمەس. "مەن مۇندا" دەگەندەي اراكىدىك باس كوتەرىپ تۇرادى. پروبلەماڭ بار بولسا، ءومىر ءسۇرىپ جاتىرسىڭ دەگەنى، ءسىرا. ءبارىمىزدىڭ باسىمىزدا جاقسى-جامان پروبلەمالار تەڭ بولىپ تۇرا بەرسىن. بۇيىرعان عۇمىردى سۇرە بەرەيىك... ءماندى... قۇمساعاتىمىزدىڭ قۇمى تاۋسىلعانشا...
اناۋ ءبىر ادامداردى ويلاسام با ەكەن. ءتايىرى، ءوزىمدى ويلامايتىن ادامدى ويلاپ، ۋاقىت كەتىرىپ نەم بار، ءا؟ ودان دا مەنى دە ويلايتىن ادامداردى ويلاپ، ىزدەپ، كورىسىپ تۇرمايمىن با؟ ازىرگە ەشكىمگە كەرەكسىز، ىزدەۋسىز قالعانداردىڭ قاتارىندا جوقپىن، شۇكىر.
ءومىردى ويلاسام ءجون شىعار؟ ءاي، ءبىراق ءومىردى ويلاساڭ دا، ويلاماساڭ دا ويىڭدا عوي. كەۋدەدە جۇرەك سوعىپ، تامىردان قان جۇگىرىپ تۇرعاندا ءومىر ءوزى-اق ويدا جۇرەدى. ودان دا سول ءومىردى ءماندى، پايدالى ءسۇرۋدى ويلاۋ كەرەك شىعار؟
جۇرتتىڭ ءبارى قىزىققان دۇنيەنى ويلاسام با الدە؟ بالەنگۇلدىڭ شاپانىنداي شاپان، جۇزىگىندەي جۇزىك، كولىگىندەي كولىك بولسا دەپ... ءاي، سولار كورىمە كەڭدىك بەرىپ، و دۇنيەمە مەدەت بولسا، ويلايىن، بولماسا نەسىن ويلايمىن؟ شۇبەرەكتىڭ قاي ءتۇرى بولسا دا، جىلۋ بەرىپ، ءتانىڭدى جىلىتىپ تۇرسا، اۋىرىپ قالماسىڭا سەپ بولسا، بولدى ەمەس پە؟ ال اللانىڭ قايسى ق ۇلى بولماسىن ءقايسىبىر التىن-كۇمىسسىز-اق ادەمى ەمەس پە؟
ءولىمدى ويلاعانىم ءجون شىعار... مەن وندا نە الىپ بارامىن؟ لايىقسىز لايكتارىمدى ما؟ دايىندىعىم قانداي؟ نە تىرلىك قىلىپ ءجۇرمىن ءوزى؟ ەندىگى قانشا قالعانى بەلگىسىز كۇندەرىمدى الەۋمەتتىك جەلىلەردە لايك جيناۋمەن وتكىزسەم، نە تىرلىك بۇل سوندا؟ وزىمە ءوزىم ۇستاز بولماسام، كىم ۇستاز بولماق؟ ءوزىمدى ءوزىم تاربيەلەمەسەم، وسىعان دەيىن العان ءبىلىم، تاربيەمنىڭ بەكەر كەتكەنى مە؟ انامنىڭ باسىنا بارىپ، ءومىردىڭ راس وتكىنشى ەكەنىنە كوز جەتكىزىپ، ءولىمدى كوبىرەك ويلاسام عانا، ءار كۇنىم "دۇرىس" وتەر...
تاعى ءبىر ويلاۋىم كەرەك ول - جارىم، بالاپاندارىم. جولداسىم. سول تەڭىمنىڭ وزىمە لايىق، مەن وعان لايىق بولىپ، ومىردەن لايكسىز-اق لايىقتى ورنىمىزدى الىپ، اتا-انا تىلەگىن ورىنداپ، بىر-بىرىمىزگە دەمەۋ بولىپ، تىپ-تىنىش، جەردىڭ ءبىر بۇرىشىندا ەشكىمنىڭ بىزگە، ءبىزدىڭ ەشكىمگە كەسىرىمىز تيمەي، ەلىنىڭ ەرتەڭىن ويلار، اقىلدى، سانالى ۇرپاق تاربيەلەپ... بالا-شاعالارىمىزبەن ءومىر سۇرسەك دەپ ويلاعانىم ءجون-اۋ، ءسىرا. ناعىز ءجوندىسى وسى بولار. سوعان اللا جەتكىزسە... ە، وسى ويىم ناق كەرەگى. كوبىرەك، تەرەڭىرەك، جۇرەك تۇبىنەن، بار نيەتىممەن وسى ويدى جەتەككە الايىن... ...باسقاسى بولدى، بولىپ جاتىر، بولا بەرەدى دە، مەنىمەن دە، مەنسىز دە...
سونىمەن، فەيسبۋكقا بەرگەن جاۋابىم وسى بولدى.
ن.ع..: ....مەن تىنىستاعاننان اۋا ءبىتىپ، كۇرسىنگەننەن اسپان كۇركىرەپ، جىلاعاننان جاڭبىر جاۋىپ، كۇلگەننەن كۇن شىعا قويماس... كوپتىڭ اراسىندا قاراڭ-قۇراڭ ەتىپ، امان جۇرە بەرەيىك... ءبىز دە، ءسىز دە، كوپشىلىك...
ماقپال سەمباي
