جۋرناليستيكانى ارمانداپ كەلگەن بويجەتكەن ب ا ق تابالدىرىعىن اتتاعاندا قاتتى قورقادى. "وسى جۇمىستى الىپ كەتە الامىن با؟" دەگەن ۇرەيمەن ءومىر سۇرەدى. جۇمىس جاسايدى. جان-جاعىنا جالتاقتاپ قاراپ، مەيىرىم مەن قولداۋ كۇتەدى. وڭ-سولىن تانىماعان، الايدا تالانتى، تالابى بار كەلبەتتى قىزعا جانى اشيتىن، ماقتاۋ ءسوزىن ايامايتىن "اعالار" پايدا بولا باستايدى. اعاشكالار ەمەس، "اعالار". ۇيدەگى ۇلكەن اعاڭ قۇساپ، قامقورلىق تانىتادى. يدەيا تاستايدى، اقىل-كەڭەسىن ايامايدى. قىز دا "اعا، اعا" دەپ اڭقىلداعان سايىن "اعانىڭ" جانى كىرەدى. ءسويتىپ بىرتىندەپ-بىرتىندەپ، قۇداي بەرگەن اكتەرلىك شەبەرلىكتى پايدالانا وتىرىپ اعالىق ماسكاسىن شەشىپ، ءوزىنىڭ شىن بەينەسىن، شىن نيەتىن كورسەتە باستايدى.

مىنە، وسىندايدا اباي بولۋ قاجەت!
1. ءفليرتتى سەزگەن بويدا ازىلگە سالىپ، بەتىن قايتارىپ تاستاڭىز.
2. ىمدى تۇسىنبەسە، قاباعىڭىزدى شىتىپ، اشۋلانىڭىز. 
3. ودان دىم شىقپاسا، مۇلدەم سويلەسپەي قويىڭىز. ول ادام جوقتاي كەيىپ تانىتىڭىز.

♦"قارىنداسىم" دەپ ءجۇرىپ قىرىندايتىندار كوبەيىپ بارادى

اعالارمەن اشىق ۇرىسۋعا كەڭەس بەرمەيمىن. ولاردىڭ كوبىسى شىعارماشىلىق ادامدارى، اقىن جاندى ەكەندەرى تۇسىنىكتى شىعار. ول قارىنداسىنا قىرىنداپ جۇرگەنىن ءوزى نورما دەپ ءتۇسىنۋى مۇمكىن. ماقسات - قيالىنىڭ بىت-شىتىن شىعارۋ، ءبىراق بازارداعى قاتىنداي سالعىلاسپاۋ. قىزدىڭ قاھارىنا ۇشىراعان "اعا" ءوزى-اق جىم بولادى. ۋاقىت وتكەن سايىن وز-وزىنەن ۇيالىپ، قىزارىپ، ازاپ شەگەدى.

جۋرناليستيكاعا ەندى كەلگەن قىزدار "اعالارعا" قاتىستى مىنانداي تاكتيكا ۇسىنۋعا كەڭەس بەرەمىن:

1. شاقىرعان جەرلەرىنە بارماۋ؛
2. جەكە دارا قالماۋ؛
3. قارىزعا اقشا الماۋ؛
4. سۇراماسا شاي قۇيماۋ؛
5. سەبەپسىز كۇلمەۋ؛
6. اشىق-شاشىق كيىنبەۋ؛
7. كوزدەرىنشە بويانباۋ.

جازيرا بايدالىنىڭ Instagram پاراقشاسىنان الىندى