استانادا 4 اقپان كۇنى بولعان جانتۇرشىگەرلىك وقيعادا ءبىر ءۇيدىڭ 5 قىزى تىرىدەي ءورتتىڭ قۇرساۋىندا قالعان بولاتىن. كوكتال ايدانىندا بولعان بۇل قازالى وقيعا بۇكىل جۇرتشىلىقتى ەسەڭگىرەتىپ، قابىرعاسىن قايىستىردى، دەپ جازادى Qamshy.kz اقپارات اگەنتتىگى.

نازگۇل ماعجان ەسىمدى جەلى قولدانۋشىسى ءوزىنىڭ پاراقشاسىندا 5 قىزىنان ايىرىلعان وتباسىنىڭ كورشىلەرى دە ءتىلسىز جاۋدىڭ سالدارىنان باسپاناسىز قالعانىن جازادى. تاعى ءبىر كوپ بالالى وتباسىنىڭ پاتەرى ورتكە ورانىپ، ءۇيدىڭ تەك ءتورت قابىرعاسى عانا قالعان.

سۆەتوچنايا دەگەن كوشەدە ورنالاسقان بۇل ۇيدە 4 بالاسى بار وتباسى تۇراتىن. ءورت شىققان كەزدە ۇيدەگى ادامدار سىرتقا شىعىپ ۇلگەرگەن. وتقا ورانعان ءۇيدى قايتادان قالپىنا كەلتىرۋ مۇمكىن ەمەس.

«ءورت سوندىرۋشىلەر وتتى تۇنگى ساعات 1:00 شاماسىندا ءوشىرىپ ءبىتتى. ءۇيدىڭ توبەسى تولىقتاي جانىپ كەتكەن، تەك قابىرعالارى عانا قالدى. بالالارىممەن ءتۇننىڭ ورتاسىندا كوشەدە قالدىق، بارار جەرىمىز جوق. شاراسىزدىقتان مەنى ۇرەي باستى. دەنساۋلىعىم ناشارلاپ، ەسىمنەن تانىپ قىلدىم. كورشىلەر جەدەل جاردەم شاقىرتىپتى»، - دەيدى 4 بالانىڭ اناسى ۆەنەرا نۇرقاسىموۆا.

ءقازىر بۇل وتباسىعا كورشىلەرى كومەك بەرىپ، بوس ۆرەميانكاعا كىرگىزگەن. ارينە، ۋاقىتشا...

نۇرقاسىموۆتار وتباسى جاعۋعا جارامدى زاتتاردى الىپ كەلىپ، قىس باستالعالى وت جاعىلماعان ۆرەميانكانى جىلىتۋعا تىرىسۋدا.

«جانىپ كەتكەن ءۇيىمىزدى قالىپقا كەلتىرۋ مۇمكىن ەمەس. ءقازىر ۋاقىتشا وسى ۆرەميانكانى پانالاپ وتىرمىز، ءبىراق بۇل ءۇيدىڭ پەشى تىم ءقاۋىپتى ءارى ەسكى»، - دەيدى ۆەنەرا.

بالالارىنىڭ ۇلكەنى 14 جاستا، ورتانشىلارى 9 جانە 7-دە بولسا، ەڭ كەنجەسى 5 جاستا ەكەن. ءورت بولعان كۇنگە دەيىن بالالار ۇيلەرىندە جالعىز قالىپ وتىرىپتى، ال اتا-اناسى جۇمىستا بولادى ەكەن.

ۆەنەرا نۇرقاسىموۆا «قازپوشتا» بولىمشەسىندە وپەراتور بولىپ جۇمىس ىستەيدى، ءقازىر ول ۋاقىتشا دەمالىسقا شىعۋعا شەشىم قابىلدادى. سەبەبى، قازىرگى باسپانالارىندا بالالاردى جالعىز قالدىرۋ اسا ءقاۋىپتى بولىپ وتىر.

ال كۇيەۋىنىڭ ايلىق تابىسى – 75 مىڭ تەڭگە، بۇل قاراجاتتىڭ جاڭا ءۇي الىپ نەمەسە ونى سالۋعا جەتپەيتىنى بەلگىلى.

ء-قازىر دە قايىرىمدى جاندار بار، ولار بىزگە كيىم-كەشەك پەن تاماق اكەلىپ بەرىپ جاتىر. العىسىم شەكسىز، ول ادامدارعا. ءبىراق، باسپانا ماسەلەسىن ءقازىر قاتتى ۋايىمداپ ءجۇرمىن. قازىرگى ۆرەميانكادا ءار كۇنىم قورقىنىشپەن وتۋدە. ەڭ باستىسى – ءقاۋىپسىز باسپانا بولسا ەكەن دەيمىن»، - دەيدى 4 بالانىڭ اناسى.

ۇسىنعان: نازەركە لابيحان