الماتى قالاسىندا وتكەن جىلدىڭ 29 جەلتوقسانىندا جانتۇرشىگەرلىك جول اپاتى بولىپ، ءۇش ادام قازا تاپقان بولاتن. بۇكىل ەلدى ەسەڭگىرەتكەن بۇل وقيعاعا Gelendwagen ماركالى كولىك مىنگەن كاسىپكەر يلياس كار سەبەپكەر بولعان. ول 120 كم/ساع جىلدامدىقپەن باعدارشامنىڭ قىزىل تۇسىنە ءوتىپ كەتىپ، Mitsubishi كولىگىن سوعىپ وتكەن ەدى. جانتۇرشىگەرلىك جول اپاتىندا قازا تاپقان اكتريسا شولپان ەلگەزەكوۆا مەن ونىڭ قۇربىسى دينارا حاميتوۆا جانە تاكسي جۇرگىزۋشىسىنىڭ تۋىستارى اپاتقا كىنالى دۇنگەن ازاماتىن سوتقا بەرىپ، تەرگەۋ جۇمىستارى ءبىر ايدان اسا ۋاقىت جۇرگىزىلىپ، جاقىندا ونىڭ سوتى باستالدى، دەپ جازادى Qamshy.kz اقپارات اگەنتتىگى.

سوت وتىرىسىندا بارلىق تاراپ تىڭدالىپ، وقيعانىڭ ءمان-جايى انىقتالۋدا. ءتىلشى ريشات اسقاربەك ۇلى ءوزىنىڭ Facebook پاراقشاسىندا كىنالى ازاماتتىڭ سول ءتۇنى ايەلىمەن جانجالداسىپ قالعانىن جازادى.

"بۇگىن سوت تەرگەۋىنەن بەلگىلى بولعان ءمان-جايدىڭ ءبىرى تومەندەگىدەي.

ولار "گراند وپەرا" مەيرامxاناسىنان شىققان سوڭ، سىرتتا 5 ادام بولىپ، توپتاسىپ اڭگىمەلەسىپ تۇرادى. يلياس كاردىڭ تۋىسقان ءىنىسى ايەلىمەن جانە جۇرگىزۋشىسىمەن، سوسىن يلياس ءوز ايەلىمەن شەتكەرى شىعادى. ءبىر ۋاقىتتا ءبىزدىڭ باس كەيىپكەر جۇبايىمەن سوزگە كەلىپ، ونى كەۋدەسىنەن يتەرىپ جىبەرىپ، الگى قارعىس اتقىر كولىككە ءمىنىپ، قۇيىنداتىپ كەتىپ قالادى. ونىڭ ءبارى بەينەباقىلاۋ كامەراسىنا جازىلىپ قالعان. "شاباندوز" قابانباي باتىر-ناۋرىزباي باتىر كوشەلەرىنىڭ قيىلىسىنان شىعىپ، اباي-سەيفۋللينگە دەيىنگى قاشىقتىقتى 4 مينۋتتا ءجۇرىپ وتكەن. ارى قارايعى جاعداي بارىمىزگە ءمالىم...