مەملەكەت باسشىسىنىڭ تاپسىرماسىن جۇزەگە اسىرۋ اياسىندا اقتوبە وبلىسىندا جەءتىم بالالارعا قاتىستى ماسەلەلەر ءتيىمدى شەشىلۋدە. ايماقتا اعىمداعى جىلدىڭ قاڭتار ايىندا وسىدان 10 جىل بۇرىن 585 بالا تۇرعان جالعىز بالالار ءۇيى جابىلدى. بۇل بالالار ءۇيىنىڭ تاربيەلەنۋشىلەرى سانىنىڭ كۇرت تومەندەۋىنە بايلانىستى. تەك وتكەن جىلى وبلىستا 128 بالا وتباسىنا ورنالاستىرىلدى، ونىڭ ىشىندە 85 بالا قامقورلىقتا جانە قورعانشىلىقتا، 26 -  بالا پاتروناتتىق تاربيەدە، 17 – بالانى اسىراپ الدى، دەپ جازادى Qamshy.kz اقپارات اگەنتتىگى.

اقتوبەدە جەتىمدىكتىڭ الدىن الۋ، ومىردە قيىن جاعدايعا تاپ بولعان بالالاردى قولداۋ ماقساتىندا "ايالا" ورتالىعى اشىلدى. وندا كامەلەتكە تولماعانداردى بەيىمدەۋ ورتالىعىنىڭ 19 تاربيەلەنۋشىسى مەن العا بالالار ءۇيىنىڭ 14 تاربيەلەنۋشىسى ورنالاسقان.

وبلىس اكىمى بەردىبەك ساپاربايەۆ جاڭا مەكەمەدە بولىپ، جەتىم جانە اتا–اناسىنىڭ قامقورلىعىنسىز قالعان بالالاردىڭ ءومىر ءسۇرۋ جانە تاربيەلەنۋ جاعدايىمەن تانىستى، ورتالىقتىڭ باسشىلىعىمەن، پەداگوگيكالىق ۇجىمىمەن جانە تاربيەلەنۋشىلەرىمەن كەزدەستى.

«بالالار - قازاقستاننىڭ بولاشاعى، سوندىقتان ءبىز، ۇلكەندەر، سىزدەردى لايىقتى تاربيەلەپ، دامىتۋ ءۇشىن ءبارىن جاساۋىمىز كەرەك. ءبىزدىڭ وبلىستا بارلىق شارالار قابىلدانىپ جاتىر. 2018 جىل «باقىتتى بالا» جىلى بولىپ جاريالاندى. سىزدەر اتا-اناسىز قالعاندارىڭىز ءۇشىن كىنالى ەمەسسىزدەر. ءبىراق سىزدەر وزدەرىڭىزدىڭ قاتارلاستارىڭىز سەكىلدى جاقسى تاربيە مەن ءبىلىم الۋعا تالپىنۋلارىڭىز كەرەك. ەگەر سىزدەر جاقسى وقىپ، سپورتپەن، ونەرمەن اينالىسساڭىزدار، تاربيەلى بولساڭىزدار، ومىردە مىندەتتى تۇردە ءوز ورىندارىڭىزدى تاۋىپ، قازاقستاننىڭ لايىقتى ازاماتى بولاسىزدار. ءبىزدىڭ ماقساتىمىز – سىزدەرگە بارلىق جاعدايدى جاساۋ. بولاشاقتا بىردە-بىر بالا مەملەكەتتىڭ قامقورلىعىنسىز جانە قولداۋىنسىز قالماۋى ءتيىس. ەلباسىنىڭ الەۋمەتتىك ساياساتى وسىعان باعىتتالعان»، - دەدى وبلىس باسشىسى ورتالىقتىڭ تاربيەلەنۋشىلەرىمەن اڭگىمە بارىسىندا.

وبلىس اكىمى مەكەمەگە سپورتتىق جاتتىعۋ جابدىقتارىن سىيلاپ، بالالارعا سىيلىقتار مەن تاتتىلەر تابىس ەتتى.

ورتالىقتا بالالاردى تاربيەلەۋگە جانە وقىتۋعا، بوس ۋاقىتتارىن ءتيىمدى ۇيىمداستىرۋعا جانە مەديسينالىق، پسيحولوگيالىق قولداۋ كورسەتۋ ءۇشىن قاجەتتى جاعدايلار جاسالعان. بالالارعا ماماندىق تاڭداۋدا، ءوز بەتىنشە ءومىر سۇرۋگە دايىندالۋدا پەداگوگتار مەن پسيحولوگتاردىڭ  كومەگى كورسەتىلەدى. ورتالىققا 3 جاستان 18 جاسقا دەيىنگى بالالاردى قابىلدانادى.

2017 جىلى اقتوبەدە «ءسابي» قايىرىمدىلىق قورىنىڭ قاراجاتىنا سالىنعان «مەيىرىم» الەۋمەتتىك بەيىمدەۋ ورتالىعى ءوز جۇمىسىن باستادى. بۇگىندە قازاقستاندا بالاماسى جوق كەشەندە بالالار ءۇيءىنىڭ 16 مەن 29 جاس ارالىعىنداعى 102 تۇلەگى تۇرادى جانە سوندا جۇمىس ىستەيدى. 3 گەكتار جەر تەلىمىنە الاڭى 43 شارشى مەتر بولاتىن، جاڭا جيھازدارمەن جانە قاجەتتى كوممۋنيكاسيالارمەن جابدىقتالعان جايلى پاترەلەرى بار ءتورت ەكى قاباتتى تۋنحاۋس سالىنعان.

كەشەن اۋماعىندا ءوقۋ-وندىرىس الاڭدارى، شاشتاراز، گۇل دۇكەنى، جىلىجاي، ەتىك جوندەۋ جانە تىگىن سەحتارى بار. ول جەرلەردە ءتاربيەلەنۋشىلەر كاسىپكە وقىتىلىپ، ەڭبەكاقىلارىن الا وتىرا جۇمىس تاجىريبەسىنەن وتەدى جانە ەڭبەك ەتە الادى. ينۆەستور جوبانى جۇزەگە اسىرۋ ءۇشىن 1،4 ملرد تەڭگە بولگەن.

سونداي-اق، «باقىتتى بالا» وڭىرلىك جوباسى اياسىندا بىلتىر جەرگىلىكتى بيلىكتىڭ قولداۋىمەن 136 جەتىم بالا باسپانالى بولدى. كاسىپكەرلەر اتا-انا قامقورىنسىز قالعان بالالاردىڭ تۇرعىن ءۇي جيناق شوتىنا 80 ملن تەڭگەدەي اۋداردى.

بۇگىندە وبلىس بويىنشا جەتىم جانە اتا-انا قامقورىنسىز قالعان بارلىعى 1011 بالا بار. ولاردىڭ 799-ى قامقورلىقتا جانە قورعانشىلىقتا، 106 بالا پاتروناتتىق تاربيەدە، 106 بالا وتباسى تيپىندەگى نەمەسە باسقا دا بالالارعا ارنالعان مەكەمەلەردە.

ۇسىنعان: نازەركە لابيحان