قىرعىزستان فەدەراسياسى كوكپاردىڭ جاڭا ەرەجەسىنە قارسىلىق ءبىلدىردى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ.
وزبەكستاندا وتەتىن الداعى كوكپاردان الەم چەمپيوناتىندا قازاندىقتىڭ ورنىنا شەڭبەر پايدالانىلاتىن بولسا، قىرعىزستان قۇراماسى وعان قاتىسۋدان باس تارتادى، دەپ مالىمدەدى ەلدەگى كوكپار فەدەراسياسىنىڭ پرەزيدەنتى جىرعالبەك ساماتوۆ.
ەستەرىڭىزگە سالا كەتەيىك، وتكەن اپتادا استانادا بۇكىلالەمدىك كوكپار قاۋىمداستىعىنىڭ كەڭەسىندە كوكپاردىڭ حالىقارالىق ەرەجەسى بەكىتىلگەن بولاتىن. جاڭا ەرەجە بويىنشا ەندى قازاندىقتىڭ ورنىنا شەڭبەر پايدالانىلادى. سونداي-اق، حالىقارالىق جانۋارلار الەمىن قورعاۋ ۇيىمدارىنىڭ قاعيدالارىنا قايشى كەلمەۋ ءۇشىن سەركەمەن ەمەس، مۋلياجبەن ويناۋعا شەشىم قابىلداندى. الايدا ايىرقالپاقتى اعايىندار "ەرەجە قازاقستاننىڭ ىقپالىمەن بەكىتىلىپ كەتتى" دەپ ويلايتىن سەكىلدى. قىرعىزدار شەڭبەرمەن ويناۋعا ۇزىلدى-كەسىلدى قارسى بولىپ وتىر.
"بۇكىل الەم كوك بورىگە (كوكپار – رەد.) قىزىعۋشىلىق تانىتىپ وتىر. قوشپەندىلەر ويىندارىن 1،3 ميلليارد ادام تاماشالاپ ءجۇر، ولاردىڭ 90 پروسەنتىنە كوك ءبورى ۇنادى. ءبىزدىڭ كورشىمىز مۇنى قىزعانىشتان جاساپ وتىر، ولار الەمگە ءوز ويىندارىن كورسەتۋدى قالايدى. قازاقتار – باۋىرلاس حالىق، ءبىز ولاردى قولدايمىز، ءبىراق بۇل جەردە ولار ارتىق كەتتى. ءبىز تايقازاننان باس تارتپايمىز"، - دەدى ساماتوۆ.
جاستار ءىسى، دەنە شىنىقتىرۋ جانە سپورت جونىندەگى مەملەكەتتىك اگەنتتىكتىڭ ديرەكتورى قانات امانقۇلوۆ "قاۋىپسىزدىك ءۇشىن تايقازاننان باس تارتتىق دەگەندەرى جاي عانا سىلتاۋ" دەيدى.
"ءبىز تايقازاندى ءقاۋىپسىز ەتىپ جاسادىق. جالپى، سپورتتىڭ بارلىق تۇرىندە تاۋەكەل بار. مىسالى، حوككەيدە ويىنشىلار بۇيىرگە ءجيى سوعىلادى"، — دەپ مالىمدەدى امانقۇلوۆ.
ونىڭ ايتۋىنشا، قىرعىزستاندا وزبەكستانداعى چەمپيوناتتى وتكىزۋگە ارنالعان تايقازان جاسالىپ جاتىر.
جىرعالبەك ساماتوۆ تايقازاننان باس تارتۋ يدەياسىن تەك 5-10 ادام قولداپ وتىرعانىن، ال قالعاندارى بۇعان مۇددەلى ەمەس ەكەنىن ايتىپ ءوتتى.
ايتا كەتسەك، قازاقستان قۇراماسى بىلتىر دۇنيەجۇزىلىك كوشپەندىلەر ويىندارىندا جارتىلاي فينالدا وزبەكتەردەن جەڭىلدى. وسىدان كەيىن ۇلتتىق قۇراماعا "قىرعىزداردان قورقىپ، ادەيى جەڭىلدى" دەگەن سىن ايتىلدى. قازاقستاننىڭ كوكپار فەدەراسياسى تۇسىندىرگەندەي، كوشپەندىلەر ويىندارىنا تاجىريبە جيناۋ ءۇشىن جاس كوكپارشىلار جىبەرىلگەن. قازاقستان كوشپەندىلەر ويىندارىندا جالپى ەسەپتە 3-ورىن العان ەدى.
ۇسىنعان: اسەل بولات قىزى
