بەس جاسىندا ۇلكەن ساحناعا شىعىپ، جەتى جاسىندا جەكە كونسەرتىن بەرگەن، قازاقتىڭ كىشكەنتاي مايكل دجەكسونى اتانعان كىشكەنتاي ەرمەك بۇگىندە مەكتەپپەن قوش ايتىسىپ، الماتى قالاسىنداعى پ.چايكوۆسكيي اتىنداعى مۋزىكالىق كوللەدجدىڭ گيتارا بولىمىندە ءبىلىم الىپ جاتقان ستۋدەنت. سوڭعى كەزدە ساحنادا كوپ كورىنبەي كەتۋىنىڭ ءبىر سەبەبى – داۋىسىنىڭ وتپەلى كەزەڭنەن ءوتىپ، وزگەرىسكە ۇشىراپ جاتقاندىعى. مۇنداي كەزەڭدە داۋىسقا قاتتى كۇش تۇسىرۋگە بولمايدى. كوپشىلىككە كورىنبەي كەتكەن ستۋدەنت ەرمەك بالجىگىتپەن اڭگىمەلەسكەن ەدىك. ەندەشە، مارحابات...
–سونىمەن، ستۋدەنت بولعان قالاي ەكەن؟!.
–ستۋدەنت بولۋدىڭ ءوزى ءبىر ەرەكشە كەزەڭ ەكەن. اتا-انانىڭ موينىنداعى جاۋاپكەرشىلىگىن ازايتىپ، ءوز بەتىڭشە بولاشاعىڭدى باعدارلاپ، جاڭا ادامدارمەن تانىسىپ، دوستارىڭ كوبەيىپ، جاڭا ءبىر ورتاعا تاپ بولۋ سياقتى جايتتاردىڭ بارلىعى - ءوزىڭدى ۇلكەن ءبىر ازامات سەزىندىرىپ، ومىرگە دەگەن كوزقاراسىڭدى وزگەرتپەي قويمايدى ەكەن.
ازىرگە ءوزىمنىڭ قانداي ستۋدەنت ەكەنىمدى بىلمەيمىن، الايدا قانداي ستۋدەنت بولعانىمدى بولاشاق ايتار... دەگەنمەن، بالا كۇنىمنەن ارمانداعان ونەردىڭ ناعىز قايناعان ورتاسىنا ءتۇستىم. اركىم ءوز قالاعان ىسىمەن اينالىسقانعا نە جەتسىن! بالكىم، مەنى باقىتتى ستۋدەنت دەي بەرسەڭىز بولاتىن شىعار...
–اكەڭ - قانات يبراگيموۆ اعامىز دا كومپوزيتور، ونەر ادامى ەكەنى كوپشىلىككە ءمالىم. جالپى وتباسىڭ قانداي؟ اكەڭ قاتال ما، اناڭ قاتال ما؟ كىمگە جاقىنسىڭ؟
–ءبىز وتباسىمىزدا ۇشەۋمىز: اكەم – قانات، انام – ءلايلا جانە مەن.
اكەم بۇرىن مەن تۋرالى بەرگەن سۇحباتىنىڭ بىرىندە: «مەن قاتال اكەمىن. ولاي ايتقان سەبەبىم: ەرمەكتى كوپشىلىك تانيتىن بولعاندىقتان، ونى كورگەن ادامداردىڭ ءبارى كوبىنە وعان ريزاشىلىعىن ءبىلدىرىپ، قوشەمەت كورسەتىپ جاتادى. دەمەك، ەلدىڭ ەركەسى بولعان بالا، ۇيدە دە ەركە بولسا، ونى بولاشاقتا ەر ازامات رەتىندە ەلەستەۋدىڭ ءوزى قيىن عوي» – دەگەن ەدى. سول كىسىنىڭ قاتالدىعىنىڭ ارقاسىندا مۋزىكانىڭ دا قىر-سىرىن تەرەڭ مەڭگەردىم دەپ ايتا الام. اكەم ونەرگە ءاتۇستى قاراي سالاتىن ادام ەمەس. مەنى دە سوعان ابدەن تاربيەلەگەن. مەنىڭ ءار باسقان ىزىمە مۇقيات قارايدى، ياعني اكەم قاتال ادام. ءوزى قاتال كىسىگە سىرىڭدى ايتۋ دا قيىن عوي. كوبىنەسە ايتارىمدى انام ارقىلى جەتكىزەم...
–ءۇش جىل بۇرىن «بالا داۋىسى» بايقاۋىنا قاتىسقانىڭنان حاباردارمىز. باسقا قانداي اۋىز تولتىرىپ ايتارلىقتاي بايقاۋلارعا قاتىستىڭ؟
–العاش بەس جاسىمدا استاندا وتكەن رەسپۋبليكالىق "ايگولەك" بالالار بايقاۋىندا ءبىرىنشى ورىن يەگەرى؛ "تاي جارىس" رەسپۋبليكالىق انشىلەر بايقاۋىنىڭ باس جۇلدەگەرى؛ 2011 جىلى (2011، 2012 جىل ما ەدى، انىق ەسىمدە قالماپتى) كتك تەلەارناسىندا وتكەن رەسپۋبليكالىق "تالانت-شوۋ" تەلە-جوباسىنىڭ باس جۇلدەگەرى؛ "جۇلدىزدى ءسات" رەسپۋبليكالىق بايقاۋىنىڭ ءبىرىنشى ورىن يەگەرى اتاندىم.
كەيىن ءوزىڭىز ايتقان "بالا داۋىسى" بايقاۋىنا قاتىستىم. بۇل بايقاۋدىڭ مەن ءۇشىن ورنى ەرەكشە. ول جەردە وزىمە كەرەكتى كوپ دۇنيەلەردى ۇيرەندىم. «بالا داۋىسى» جوباسىمەن ەلىمىزدىڭ ءبىرقاتار قالالارىن ارالادىم، ەلىمىزگە بەلگىلى ونەر جۇلدىزدارى: ءالي وقاپوۆ، جانار دۇگالوۆا، فاريدا نيازوۆا سەكىلدى انشىلەرمەن جۇپتاسىپ، ءان شىرقادىم.
ءتىپتى كەيىن ءوزىم كەزىندە ۇمىتكەر بولىپ قاتىسقان وسى جوبانىڭ الماتى وبلىسىندا ۇيىمداستىرىلعان ىرىكتەۋىندە ءادىلقازىلاردىڭ قاتارىندا بولىپ، تالانتتى انشىلەردى ىرىكتەۋگە ۇلەسىمدى قوستىم. قازىرگى تاڭدا ءالى دە "بالا داۋىسى" جوباسىمەن بىرگەمىن. مەنىڭ پ.چايكوۆسكيي اتىنداعى مۋزىكالىق كوللەدجگە تۇسۋىمە باعىت باعدار بەرگەن دە وسى "بالا داۋىسى" جوباسى جانە ونىڭ ديرەكتورى - مۇرات يساحانوۆ مىرزا بولاتىن.
–ەگەر ونەر جولىن تاڭداماساڭ، باسقا قاي سالانى تاڭدار ەدىڭ؟ ياعني، ءانشى بولماساڭ، كىم بولۋىڭ مۇمكىن ەدى؟
–بۇل ەندى مەن ءۇشىن وتە قورقىنىشتى سۇراق. ءازىلىم عوي. ەگەر ءانشى بولماعاندا، مۇمكىن سپورتتى قۋالاپ كەتەر مە ەدىم... الايدا، ءانسىز ءوزىمدى ەلەستە دە المايمىن.
–سەن ءۇشىن ومىردە ەڭ ماڭىزدى نە؟
–ادام بولۋ. ادام دەگەن اتقا لايىقتى ءومىر ءسۇرۋ...
–جىگىتكە جەتى ونەر از دەگەندەي، ءان ايتۋدان باسقا ءبىز بىلمەيتىن قانداي ونەرىڭ بار؟
–وتە دۇرىس ايتاسىز. ەر ازامات بولعان سوڭ، جان-جاقتى بولۋى كەرەك دەپ ويلايمىن. بۇرىنعى وتكەن بالۋان شولاق بابالارىمىز، جاڭاعى ءسىز ايتقان ءسوزدىڭ دالەلى دەپ ايتار ەدىم...
مەن قازىرگى كەزدە "GOLDEN TEAM" اتتى مما CLUB-تا ەرەجەسىز جەكپە-جەككە قاتىسىپ ءجۇرمىن. ماقساتىم - ەر ازامات بولعان سوڭ، ءوز نامىسىمدى جىگىتشە قورعاي الاتىنداي دارەجەدە ەتى ءتىرى، ناعىز قازاقتىڭ باتىرى سەكىلدى جىگىت بولۋ. «قازاقتىڭ جىگىتتەرى باتىر بولۋى كەرەك» دەگەن تۇسىنىك بالا كەزىمنەن قانىما ءسىڭىپ قالعان. بالكىم، سونىڭ دا اسەرى شىعار - سپورت دەسە ىشكەن اسىمدى جەرگە قوياتىندىعىم. اقىرى، ماقتانعان ەكەنمىن، سۋعا دا اجەپتاۋىر جۇزەتىنىمدى ايتا كەتەيىن.
–ومىرلىك ۇستانىمىڭ قانداي؟ ياعني، ۇنەمى جادىڭدا جۇرەتىن سۇيىكتى ماقال-ماتەل نەمەسە الدەبىر قاناتتى ءسوزىڭ بار ما؟
–"قانمەن دارىعاندى قاسيەتتەمەسەڭ، ءقادىرىڭ بولمايدى" دەگەندى اكەم ماعان ءجيى ايتادى...
–ءوزىڭ قاتارلاس جاسوسپىرىمدەردىڭ ساعان قانداي قىلىقتارى، ادەتتەرى ۇنامايدى؟ ولارعا ايتارىڭ بار ما؟
–ەگەر جىگىتتەرگە قاتىستى ايتار بولسام، وزىممەن قاتارلاس جاسوسپىرىمدەر ەلىمىزدىڭ بولاشاق تىرەگى عوي. الايدا سول جىگىتتەر قازىردەن بەتى-باسىن بوياپ، سىرعا تاعىپ سىزىلىپ جۇرسە، ولاردى ەلىمىزدىڭ قورعانى دەپ، ەل قالاي ايتادى؟ كەيبىر سونداي جىگىتتەرگە قاراپ قارنىم اشادى. ءاربىر قازاعىمىزدىڭ ازاماتى جىگىت دەگەن اتقا لايىقتى بولسا ەكەن دەپ تىلەيمىن!
–كىتاپپەن دوسسىڭ با؟
–ءيا. قازىرگى تاڭدا ءسابيت مۇقانوۆتىڭ "بالۋان شولاعىن" وقىپ ءجۇرمىن.
–ەرمەك، اڭگىمەڭە كوپ راحمەت! ەڭبەگىڭ جانسىن!
