ماقتاارال اۋدانىندا الەۋمەتتىك مەديسينالىق ساقتاندىرۋ جۇيەسىندەگى وزگەرىستەر تۋرالى سەمينار ءوتتى. اۋدان اكىمىنىڭ ورىنباسارى بەيسەنباي تورەبەكوۆ ءتوراعالىق ەتكەن جيىنعا «الەۋمەتتىك مەديسينالىق ساقتاندىرۋ قورى» كەاق تۇركىستان وبلىسى بويىنشا فيليالىنىڭ باس ساراپشىسى لاۋرا ساپاربەكوۆا، كەنتتەر مەن اۋىلدىق وكرۋگ اكىمدەرى، اۋداندىق دەربەس ءبولىم باسشىلارى، اۋداندىق اۋرۋحانالاردىڭ باس دارىگەرلەرى، مەكتەپ ديرەكتورلارى جانە ەسەپشىلەر قاتىستى.
العاش بولىپ سوزگە شىققان ل.ساپاربەكوۆا مىندەتتى الەۋمەتتىك مەديسينالىق ساقتاندىرۋ جۇەسىندەگى وزگەرىستەر تۋرالى بايانداما جاساپ، جاڭا جۇيەنىڭ پايداسى تۋرالى كەڭىرەك ءتۇسىندىرىپ بەردى.
«جاڭا جۇيەنىڭ ارقاسىندا ازامات ءوز تاڭداۋى بويىنشا ەلىمىزدىڭ اۋماعىنداعى كەز كەلگەن ەمحانادا تەگىن مەديسينالىق كومەك الا الادى. ەمحاناعا قاجەتتى قارجىنى تولىعىمەن قور وتەيدى. كەز كەلگەن ءدارىحانادا ۇسىنىلاتىن دارىلىك زاتتار قول جەتىمدى بولادى. سونداي-اق، ازامات ساقتاندىرۋ جۇيەسى ارقىلى اۋدارىلعان جارنالار مەن مەديسينالىق ۇيىمداردا كورسەتىلگەن قىزمەتتەر تۋرالى اي سايىنعى اقپاراتتى الۋ مۇمكىندىگىنە يە بولادى. ساپاسىز قىزمەت كورسەتىلسە نەمەسە قۇقىقتارى بۇزىلسا، قور ارقىلى ءوز مۇددەسىن قورعاي الادى» - دەدى ل.ساپاربەكوۆا.
جيىن بارىسىندا اۋدان ماماندارى تاراپىنان باس ساراپشىعا بىرنەشە سۇراقتار قويىلىپ، وعان زاڭ اياسىندا ءتيىستى جاۋاپتار بەرىلدى. سونداي-اق، سەميناردى قورىتىندىلاعان اۋدان اكىمىنىڭ ورىنباسارى ب.تورەبەكوۆ مىندەتتى مەديسينالىق ساقتاندىرۋ بويىنشا اۋدان تۇرعىندارى اراسىندا ءتۇسىندىرۋ جۇمىستارى جالعاسىن تاباتىنىن اتاپ ءوتتى.
ماقتاارال اۋدانى اكىمىنىڭ باسپا ءسوز قىزمەتى
