ەستونيا پرەزيدەنتى كەرستي كاليۋلايد ءوز ەلىندە الداعى ۋاقىتتا ورىس تىلىندە ءبىلىم بەرۋدى مۇلدە توقتاتاتىنىن ءمالىم ەتتى. ونىڭ دا سەبەبى بار. ەستونيا تاۋەلسىزدىگىنىڭ 101 جىلدىعىنا ارناپ حالىقتىڭ الدىندا سويلەگەن سوزىندە ول «ەلدە ءبىرىڭعاي ءبىر ءتىلدى ءبىلىم بەرۋ جۇيەسىن ەنگىزگەن دۇرىس شەشىم» دەپ مالىمدەدى.

پرەزيدەنت كەرستي كاليۋلايدتىڭ ايتۋىنشا، «مۇنى بارلىعى دا دۇرىس ۇعىنۋى كەرەك، ءتىپتى حالىقارالىق قوعامداستىق تا وعان تۇسىنىستىكپەن قاراعانى دۇرىس".

–پارلامەنتتە حالىقتىڭ داۋىسىن الىپ،  ەل زاڭناماسىن بەكىتىپ وتىرعان پارتيالار دا ءبىرىڭعاي ءبىلىم بەرۋ جۇيەسىنە كوشۋ كەرەكتىگىن تالاپ ەتۋدە. مۇنى ەلىمىزدە تۇراتىن دياسپورالار ءتۇسىنۋى ءتيىس. ءبىلىم تەك قانا ەستون تىلىندە بەرىلۋى كەرەك.–دەدى پرەزيدەنت كەرستي كاليۋلايد.

پرەزيدەنتتىڭ پىكىرىنە سەنسەك، «ەكى تىلدە ءبىلىم بەرۋ ەلدى ەكىگە ءبولىپ وتىر. سوندىقتان بارلىعى دا ءبىرىڭعاي بولعانى ءجون».

2010 جىلى ەلدە قابىلدانعان «نەگىزگى مەكتەپ پەن گيمنازيا تۋرالى» زاڭعا سايكەس، ورىس تىلىندە وقىتىلاتىن گيمنازيالار مەن مەكتەپ وقۋشىلارىنىڭ قۇقى شەكتەلىپ وتىرعان جوق. ءبىراق ەستون پرەزيدەنتىنىڭ ايتۋىنا قاراعاندا، ءبىلىم سالاسىندا بەتبۇرىس جاساۋدىڭ ۋاقىتى كەلدى.

قازىرگى ۋاقىتتا ەستونيادا 80 -گە جۋىق ءبىلىم ورداسى بار. ولاردىڭ ءبىرازىندا ساباق ورىس تىلىندە وقىتىلادى. جالپى ورىس ۇلتىنىڭ وكىلدەرى ءتالليننىڭ ماڭايىندا، سونىمەن قاتار، ەلدىڭ سولتۇستىك-شىعىسىن مەكەن ەتەدى.

–ءبىز تاۋەلسىز مەملەكەتپىز. سوندىقتان ەستون مادەنيەتى مەن رۋحانياتىن، ءتىلىن –قورعاۋ باستى ماقساتىمىز.  كەز كەلگەن وركەنيەتتى مەملەكەت وسىلاي ءوز ساياساتىن جۇرگىزەدى. وعان بولا «ءبىز قىسىم كورىپ جاتىرمىز» دەپ ارانداتۋدىڭ كەرەگى جوق. سوندىقتان ءبىرىڭعاي ءبىر ءتىلدى ءبىلىم بەرۋ جۇيەسىنە كوشەمىز. وقۋشىلار ۇلتىنا، ناسىلىنە قاراماستان ەستون تىلىندە ءبىلىم الاتىن بولادى، –دەيدى پرەزيدەنت كەرستي كاليۋلايد.

بۇل عانا ەمەس، بالتىق جاعالاۋى ەلدەرىندە، ناقتى ايتقاندا لاتۆيادا ەل حالقىنىڭ 40 پايىزى ورىس ۇلتىنىڭ وكىلدەرى بولعانىنا قاراماستان،  ءبىلىم بەرۋ لاتىش تىلىندە جۇرگىزىلىپ كەلەدى.

سونىمەن، ەستونيا پرەزيدەنتى كەرستي كاليۋلايد تە ءوز ەلىندە ورىس تىلىندە ءبىلىم بەرۋدى قالامايتىنىن ايتتى.

...ال ءبىز. ءۇش تۇعىرلى ەلمىز!