قالانىڭ ورتالىق الاڭىندا كيىز ۇيلەر قالاشىعى بوي كوتەرىپ، كوشەلەر مەرەكەگە ساي بەزەندىرىلمەك. سونىمەن قاتار ساۋدا ورتالىقتارىندا مەرەكەلىك جەڭىلدىكتەر ۇيىمداستىرۋ كوزدەلىپ وتىر.

بۇل جونىندە وسكەمەننىڭ اكىمى جاقسىلىق ومار ۇلىستىڭ ۇلى كۇنىن اتاپ وتۋگە ارنالعان كەڭەستە ايتتى.

قالا ورتالىعىندا كيىز ۇيلەر قالاشىعى بوي كوتەرىپ، وندا 20-21 ناۋرىزدا ارنايى شارالار وتكىزىلىپ، 22 ناۋرىز كۇنى جالپىحالىقتىق مەرەكەلەۋگە ۇلاسادى دەپ جوسپارلانۋدا. مەيرامنىڭ نەگىزگى كۇنىندە ورتالىق الاڭدا ۇلى دالانىڭ 7 قىرىن اشىپ كورسەتەتىن 7 كيىز ءۇي قۇرىلادى. اتاپ وتەرلىگى، كيىز ۇيلەردىڭ بارلىعى ەسىكتەرىن ايقارا اشىپ، ەتنوگرافيالىق كورمە فورماتىندا جۇمىس ىستەيتىن بولادى.

قالا باسشىسى كەڭەسكە قاتىسقان كاسىپكەرلەردى ءوز نىساندارىنا مەرەكەلىك بەزەندىرۋ جۇرگىزىپ، ناۋرىز مەيرامىنا وراي جەڭىلدىكتەر جاساۋعا شاقىردى.

بيزنەس قۇرىلىمدارىن ىنتالاندىرۋ ماقساتىندا قالالىق اكىمدىك ۇزدىك مەرەكەلىك بەزەندىرىلگەن نىسانداردىڭ اراسىندا بايقاۋ جاريالاماق.