الماتى وبلىسىنىڭ قورعانىس ىستەرى جونىندەگى دەپارتامەنتى، بىرىكتىرىلگەن باسقارماسى مەن بولىمدەرىندە شاقىرۋ ۋچاسكەلەرىنە تىركەۋ جۇمىستارى قىزۋ جۇرگىزىلۋدە.

جەرگىلىكتى اسكەري باسقارۋ ورگاندارى «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» ق ر زاڭىن باسشىلىققا الا وتىرىپ، 2002 جىلى تۋىلعان جاسوسپىرىمدەردى اسكەري ەسەپكە الۋدا.

2019 جىلعى قاڭتار مەن ناۋرىز ايىنىڭ سوڭىنا دەيىنگى ارالىقتا وبلىس بويىنشا 10126 ازاماتتى شاقىرۋ ۋچاسكەلەرىنە تىركەۋ جوسپارلانعان. بۇل بىلتىرعى جىلمەن سالىستىرعاندا 5،5%-عا ارتىق. بۇگىنگى كۇنى 9 992 ادام اسكەري تىركەۋگە الىنىپ، ولارعا سالتاناتتى جاعدايدا تىركەۋ كۋالىكتەرى تابىستالدى. تىركەۋ مەرزىمى اياقتالعانعا دەيىن بۇل ءتىزىم تاعى 134 جاسوسپىرىممەن تولىعادى.

شاقىرۋ قاعازىن العان ازاماتتار ءتيىستى جەرگىلىكتى اسكەري باسقارۋ ورگاندارىندا جالپى ءبىلىمىن، دەنساۋلىعىن، اسكەري قىزمەتكە جارامدىلىق دەڭگەيىن انىقتاۋ ماقساتىندا مەديسينالىق تەكسەرۋدەن وتەدى. بۇل ءوز كەزەگىندە اسكەرگە شاقىرىلۋ جاسىنا دەيىنگى جاستاردى اسكەر قاتارىنا دايىنداۋعا، ولاردىڭ سانىن انىقتاۋعا مۇمكىندىك بەرەدى. دەنساۋلىقتارىندا كىنارات تابىلعاندار جولداما ارقىلى ءتيىستى ەمدەۋ مەكەمەلەرىندە ەم قابىلداپ، شاقىرىلۋ جاسىنا دەيىن ساۋىعىپ كەلۋ مۇمكىندىگىنە يە.

الماتى وبلىسى قورعانىس ىستەرى جونىندەگى دەپارتامەنتى باستىعىنىڭ ورىنباسارى پودپولكوۆنيك رۋسلان ابيحانوۆتىڭ ايتۋىنشا اسكەر قاتارىنا الىنىپ، وتان قورعاۋعا ءوز ۇلەسىمدى قوسسام دەگەن جاستاردىڭ كوپ بولۋى كوڭىل قۋانتادى.

– دەنىنىڭ ساۋ بولۋىنان بولەك ولاردىڭ مورالدىق-پسيحولوگيالىق جاي-كۇيلەرىن، قۇقىقتىق ساۋاتتى بولۋلارىن باستى نازاردا ۇستايمىز. تىزىمگە تىركەپ، اسكەرگە اتتاندىرۋدان بولەك جاسوسپىرىمدەرمەن اسكەري-پاتريوتتىق باعىتتاعى تاربيە جۇمىستارى ءجيى جۇرگىزىلىپ وتىرادى، - دەدى ول.

* بۇگىن مەن ءۇشىن ماڭىزدى قۇجات – تىركەۋ كۋالىگىن قولىما الدىم. دەنساۋلىعىمدا كىنارات جوق، اسكەر قاتارىنا اتتانۋعا دايىنمىن. ارميا – جىگىتتىك مەكتەبى، قيىندىقتان تايسالماي وتانىمدى، حالقىمدى قورعاۋعا ءارقاشان ءازىرمىن، - دەدى تالدىقورعان قالاسىنىڭ پوليتەحنيكالىق كوللەدجىنىڭ 1-كۋرس ستۋدەنتى ەرسۇلتان شايكەنوۆ.

سونداي-اق، پۋنكتتەرگە تىركەۋ بارىسىندا اسكەري وقۋ ورىندارىندا تۇسۋگە نيەت بىلدىرگەندەرگە ۇگىت-ناسيحات جۇمىستارى دا قوسىمشا جۇرگىزىلۋدە. اسكەري وقۋ بويىنشا ءتۇسىندىرۋ جۇمىستارى ماۋسىم ايىنا دەيىن جالعاسادى. بۇگىنگى كۇنى الماتى وبلىسىنىڭ 500-دەن استام ازاماتى ق ر قارۋلى كۇشتەرىنىڭ اسكەري وقۋ ورىندارىندا ءبىلىم الۋدا.