الماتى وبلىسىنىڭ سارقان اۋدانىندا زاماناۋي تاۋ-شاڭعى بازاسى اشىلدى. قىسقى ءتۋريزمدى دامىتۋعا باعىتتالعان جوبا بولاشاقتا جىل ون ەكى اي جۇمىس ىستەيتىن بولادى.

اۋدانداعى العاشقى تاۋ-شاڭعى بازاسى جوڭعار الاتاۋى باۋرايىندا 20 گەكتار اۋماقتا ورىن تەپتى. مۇندا ۇزىندىعى 735 مەتر بولاتىن شاڭعى تراسساسى جانە 120 مەترلىك تيۋبينگ تراسساسى سالىندى. ەكى جەردە تاۋعا ەمىن-ەركىن كوتەرىلەتىن ارنايى بۋگەلدى قوندىرعىلار بار. ودان بولەك كونكيمەن سىرعانايتىن مۇز ايدىنى دا پايدا بولدى.

مامانداردىڭ ايتۋىنشا شاڭعى بازاسىندا وبلىستىق جانە رەسپۋبليكالىق قىسقى سپورت تۇرلەرىنەن جارىستار ۇيىمداستىرۋعا ابدەن بولادى. جاڭا نىساندى ىسكە قوسقان ينۆەستور سارقان اۋدانىنىڭ جاس جەتكىنشەكتەرى شاڭعى تەۋىپ ۇيرەنىپ، شىمىر بولىپ وسەدى دەگەن سەنىمدە. جەرلەستەرىنە وسىنداي تاماشا كەشەندى تارتۋ ەتكەن مامبەتالى اتەشوۆ تەرەكتى وزەنىندەگى سۋ ەلەكتر ستانسياسى قۇرىلىسىنان كەيىن پايدا بولعان سۋقويمانى كولگە اينالدىرىپ، ءىشىن بالىققا تولتىرىپ، حالىقتىڭ جازعى ۋاقىتتا دا دەمالۋىنا جاعداي جاساۋدى ماقسات ەتىپ وتىر. سونداي-اق شاڭعى بازاسى نەگىزىندە 40 ورىندىق قوناق ءۇي سالىنباق.

"بۇدان بىلاي جەرلەستەرىمىز شاڭعى تەبۋ ءۇشىن تاۋ ىزدەپ شىمبۇلاققا سابىلمايتىن بولدى"،- دەيدى سارقان اۋدانىنىڭ اكىمى مارات رازبەكوۆ.

شاڭعى بازاسى نەگىزىندە  جاقىن ماڭداعى اۋىل مەكتەپتەرىندە شاڭعى سەكسياسىن اشۋ ماسەلەلەرى دە قاراستىرىلۋدا.

بەلسەندى دەمالىس ورنىنىڭ سالتاناتتى اشىلۋى دەنساۋلىق فەستيۆالىنە ۇلاستى. اۋدان تۇرعىندارى ارقان تارتۋ، قول كۇرەستىرۋ، بۇقا تارتىس، گىر كوتەرۋ سىندى سايىستاردا ب ا ق سىنادى. ۇجىمدار مەن كاسىپورىندار ۇزدىك داستارحان مازىرىنەن جارىسىپ، ساحنادا ءوز ونەرلەرىن كورسەتتى.