بۇل مۇزبالاقتىڭ ءاتى-جونى - ماقسۇت جۇمايەۆ. 1977 جىلى باتىس قازاقستان وبلىسىندا دۇنيەگە كەلدى.
2011 جىلى تامىز ايىندا بيىكتىگى 8000 مەتردەن اساتىن 14 شىڭنىڭ ءبارىن باعىندىرعان دۇنيە جۇزىندەگى 27ء-شى الپينيست اتاندى. 2007 جىلى 30 ساۋىردە ارىپتەسى ۆاسيليي پيۆسوۆپەن بىرگە جەر شارىنداعى ەڭ بيىك شىڭ ەۆەرەستكە سول قاپتالىنان شىقسا، 2018 جىلى 18 مامىر كۇنى ەۆەرەستىڭ ۇشار باسىنا وڭتۇستىك جاعىنان ورمەلەپ جەتتى. ەۆەرەستكە وڭتۇستىك قاپتالدان شىعۋ قيىننىڭ قيىنى. بۇگىنگە دەيىن دۇنيە ءجۇزى بويىنشا ەۆەرەست شىڭىنا سولتۇستىك جانە وڭتۇستىك بەتكەيدەن تابان تىرەگەن ونشاقتى الپينيست بار ەكەن. سولاردىڭ قاتارىندا قازاق جىگىتىنىڭ بولعانى – الاش جۇرتى ءۇشىن زور مارتەبە. رەكوردقا كەلسەك، قازاق مۇزبالاقتارىنان 14 «سەگىزمىڭدىقتىڭ» شىڭىنا تابان تىرەگەن ازىرگە جالعىز ماقسۇت ەكەنىن ايتا كەتەيىك. بىلە بىلگەنگە، ماقسۇتتىڭ كوكپەن تالاسقان ءاربىر شىڭعا ساتىمەن شىعىپ، امان-ەسەن ورالۋىنىڭ ءوزى ۇلكەن ولجا.
ارينە، توبەسىنەن جەرگە قاراساڭ، كوزىڭ بۇلدىراپ، باسىڭ اينالاتىن 8 مىڭ مەتر تۇگىلى، بيىكتىگى 800 مەتر توبەگە القىنباي جەتۋ قيىن. ماقسۇت بولسا، ورلەگەن سايىن داۋىلى مەن بورانى ۇيتقي سوعاتىن، مۇز قۇرسانىپ، قار جاستانعان ون ءتورت «سەگىزمىڭدىقتى» اۋىزدىقتاۋ ءۇشىن تالاي مارتە باسىن بايگەگە تىگىپ، سان رەت بەينەت كەشتى. مىسالى، قاراقورىمداعى 8611 مەترلىك چوگوري شىڭىنا ۇزەڭگىلەسى ۆاسيليي پيۆسوۆپەن بىرگە بەس رەت شابۋىلداپ، بەسەۋىندە ماڭدايى تاسقا تيگەندەي كەرى قايتتى.
2003 جىلى تامىزدا تابيعاتتىڭ الاي-تۇلەي مىنەزى ماقسۇتتاردى چوگوريدىڭ القىم تۇسىنان — 8200 مەتردەن كەرى قايتۋعا ءماجبۇر ەتتى.
2005 جىلى تامىزدا قۇرامىندا جۇمايەۆ بار قازاقستاندىق ءتورت مۇزبالاق چوگوريدىڭ ۇشار بيىگىنە قول سوزىم قالعاندا بازالىق لاگەردە قۇرال-جابدىقتارى ۇرلانىپ، سونىڭ سالدارىنان 8550 م. مەجەدەن ات باسىن تومەنگە بۇرۋعا ءماجبۇر بولدى.
2007 جىلى تامىز-قىركۇيەكتە جۇمايەۆ-پيۆسوۆ جۇبى 8400 مەترگە ءساتتى كوتەرىلىپ، ءارى قاراي ءۇش كۇن بويى قالعان 211 مەترلىك جالاما شىڭنان تابان تىرەيتىن تىرەۋ، قول قارمايتىن ىلگەك تاپپاي، ابدەن بولدىرىپ، كەرى قايتادى.
2009 جىلى شىلدە-تامىز ايىنىڭ توعىسىندا جۇمايەۆ-پيۆسوۆ جۇبى جانە رەسەيلىك سەرگەي بوگومولوۆ چوگوري شىڭىنا نەبارى 100 مەتر جەتپەي قالىڭ قار قۇرساۋىنا تاپ بولىپ، امالسىز كەرى شەگىندى.
2010 جىلى شىلدە-تامىز كەزىندە كۇن رايىنىڭ بۇزىلۋىنا وراي ماقسۇت پەن ۆاسيليي تاعى دا كوزدەگەن ماقساتتارىنا جەتە المادى.
اقىرى، قايسار جىگىتتەر قاتارىنان بەس رەت جالىنان ۇستاتپاعان چوگوري شىڭىنا 2011 جىلى تامىزدا تۋ تىكتى. بۇل ماقسۇتتار تارتقان تاۋقىمەتتىڭ ءبىر پاراسى عانا.
20 جاسىندا 3680 مەترلىك ۇلكەن الماتى شىڭىنا شىعىپ، اسقار تاۋعا ورمەلەۋدىڭ قىزىعىنا اربالعان ماقسۇت ساعىنتاي ۇلى 23 جاسىندا ءۇشىنشى رازريادتى الپينيست بولعانىنا قاراماي ورتالىق شيشا پانگما «سەگىزمىڭدىعىنا» وتتەگىسىز ورمەلەپ جەتتى. وسى جەڭىستەن كەيىن ورىمدەي مۇزبالاق قازاقستان قۇراماسىنا بەكىدى.
كەيىن TreeGenە لابوراتورياسى ماقسۇت جۇمايەۆتىڭ گەنەتيكالىق پاسپورتىن جاساعاندا ونىڭ تابيعاتىنا ەڭ جاقىن سپورت ءتۇرى — الپينيزم ەكەنىن تايعا تاڭبا باسقانداي تاڭبالاپ بەرىپتى.
ءححى عاسىرداعى قازاق سپورتشىلارىنىڭ اراسىندا ەڭ مارتەبەلى، ەڭ جۇرەك جۇتقان ساڭلاقتىڭ ءبىرى وسى ماقسۇت جۇمايەۆ دەسەك، ارتىق ايتقاندىق بولماس.
قىدىربەك رىسبەك
پىكىر قالدىرۋ