تالدىقورعاندا الاكول كولى جاعالاۋىنداعى «Qoqtem Grand Resorts» بەس جۇلدىزدى ءقوناقۇيى تانىستىرىلىمىنا ارنالعان باسپا ءسوز كونفەرەنسياسى ءوتتى. ءىس-شاراعا الماتى وبلىسى تۋريزم باسقارماسىنىڭ جەتەكشىسى جانار الشىمبايەۆا، الماتى وبلىسى كاسىپكەرلەر پالاتاسى ادامي كاپيتالدى دامىتۋ ءبولىمىنىڭ باسشىسى الماگۇل وڭعاربايەۆا،  «Qoqtem Grand Resorts» ءقوناقۇي كەشەنىنىڭ باسقارۋشى ديرەكتورى الماجان باقتۇرازوۆا، سونىمەن قاتار تۋروپەراتورلار مەن ب ا ق وكىلدەرى قاتىستى. 

 ءقوناقۇي جەكە قارجىعا سالىنعان. ءقوناقۇيدىڭ اشىلۋى وسى جازعا جوسپارلانعان، الايدا كەشەن الدىن الا برونداۋدى ىسكە قوستى. كوپفۋنكسيالى ءقوناقۇي كەشەنى 450 ورىنعا شاقتالعان. كەشەندە 102 ءنومىر بار، ونىڭ ىشىندە 97ء-سى – ستاندارتتى، 4ء-ى – ليۋكس، 1 –پرەزيدەنتتىك ليۋكس ءنومىرى. كەشەن قولدانىسقا بەرىلگەن سوڭ 80 تۇراقتى جۇمىس ورنى اشىلادى. كەشەننىڭ جالپى اۋماعى 16 گەكتار.

«ءقوناقۇي كەشەنى بەس قاباتتان تۇرادى. جازعى تەرراساسى بار كافە، بالالار الاڭقايى، سپورت الاڭدارى اشىلادى. جايلى نومىرلەر مەن جاقسى سەرۆيس قوناقتاردىڭ كوڭىلدەرىنەن شىعادى دەگەن ويدامىن»، – دەپ اتاپ ءوتتى ءقوناقۇي كەشەنىنىڭ باسقارۋشى ديرەكتورى الماجان باقتۇرازوۆا.

الماتى وبلىسى تۋريزم باسقارماسىنىڭ جەتەكشىسى جانار الشىمبايەۆا الاكول كولى جاعالاۋىنداعى ينفراقۇرىلىمدى جاقسارتۋ بويىنشا قولدانىپ جاتقان شارالار تۋرالى اقپارات بەردى. ونىڭ ايتۋىنشا، بيىل كول جانىنداعى اقشي اۋىلىندا شاعىن بازار اشىلىپ، ال قوناقۇيلەرىندە كادەسىيلار ساتىلاتىن بولادى.

«بولشەك ساۋدا نۇكتەلەرىن قۇرۋ ماقساتىندا قازىرگى ۋاقىتتا الاكول اۋدانىنىڭ باسشىلىعى ۋاقىتشا نىسانداردىڭ قۇرىلىسى باستالاتىن جەر تەلىمىن قاراستىرىپ قويدى. بۇل ساۋدا ورىندار كاسىپكەرلەرگە ۇسىنىلادى. سونىمەن قاتار، قوناقتاردى ورنالاستىراتىن جەرلەردە كادەسىيلار ساتىلاتىن بولادى. وسىعان دەيىن كادەسىيلاردى كاسىبي وندىرەتىن ءبىر كومپانيامەن كەلىسىمگە كەلدىك»، – دەدى جانار الشىمبايەۆا.

تۋريزم سالاسىندا مامانداردى دايىنداۋ، سەرۆيس ساپاسى ماسەلەسىن الماتى وبلىسى كاسىپكەرلەر پالاتاسى ادامي كاپيتالدى دامىتۋ ءبولىمىنىڭ باسشىسى الماگۇل وڭعاربايەۆا كوتەردى. سپيكەر «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاما شەڭبەرىندە  كومپانيا جۇمىس ماماندارىن دايىنداۋمەن اينالىسا الاتىنىن ايتتى.

«بۇگىندە وبلىس اۋماعىندا 26 كومپانيا مامانداردى دايىنداۋ بويىنشا وقۋ ورتالىقتارىن قۇردى، سونىڭ ىشىندە 20 وقۋ ورنى كاسىپورىن جانىنان قۇرىلعان. الايدا، ولاردىڭ ىشىندە تۋريزم بويىنشا وقۋ ورتالىعى جوق. ال تۋريستىك سالا ءۇشىن كادر جانە سەرۆيس ماسەلەسى وزەكتى»، – دەدى الماگۇل وڭعاربايەۆا.

 ارى قاراي «جەتىسۋ» اۆياكومپانياسىنىڭ اۆيا تاسىمالدار قىزمەتىنىڭ اعا ديسپەچەرى گۇلميرا قاسەنوۆا قوناقتارعا الاكول كولىنە ۇشۋ باعدارلاماسى تۋرالى اقپارات بەردى. ونىڭ ايتۋىنشا، 2017-2018 جىلدار ارالىعىندا كولگە بارعان جولاۋشىلاردىڭ سانى ارتقان. 2017 جىل ىشىندە ءۇشارال اۋەجايىنا 1880 جولاۋشى ۇشقان، ال بەرى  2148 جولاۋشى كەلگەن. ال 2018 جىلى كولگە ۇشۋعا 4419 جولاۋشى، كولدەن كەلۋ 3641 جولاۋشىنى قۇراعان.

 «بيىل ءاستانا-ۇشارال، ءۇشارال-الماتى باعىتى بويىنشا ۇشاقتار التى اي بويى اپتاسىنا 4 رەت ۇشاتىن بولادى. بيلەت قۇنى – 16 000 تەڭگە. ءالماتى-ۇشارال-الماتى باعىتى بويىنشا رەيس التى اي بويى اپتاسىنا 6 رەت بولادى. قۇنى – 10 000 تەڭگە. رەيستەردى  Scat اۆياكومپانياسى جۇزەگە اسىرادى»، – دەدى گۇلميرا قاسەنوۆا.

بيىل ءتالدىقورعان-ۇشارال-تالدىقورعان (بيلەتتىڭ جوسپارلانعان  قۇنى – 12 000 تەڭگە)، ءالماتى-ۇشارال-الماتى (بيلەتتىڭ جوسپارلانعان  قۇنى – 18 000 تەڭگە) باعىتى بويىنشا رەيستەردى «جەتىسۋ» اۆياكومپانياسى اپتاسىنا ءۇش رەت جۇزەگە اسىرادى.

ءىس-شارا بارىسىندا  «Complete Service» كومپانياسىنىڭ ىشكى تۋريزم دەپارتامەنتىنىڭ جەتەكشىسى راۋشان سارتايەۆا سۋبسيديالاۋ، سانيتاريالىق ايماقتاردى جاقسارتۋ، قوناقۇيلەر قۇزىرەتتىلىگىن ارتتىرۋ جانە اقپاراتتىق تۋرلاردى وتكىزۋ ماسەلەلەرى تۋرالى اڭگىمەلەپ بەردى.

ۇسىنعان: گۇلىم جاقان