اۆدارمادا اتا-انا مەن بالا ءوزارا گاگاۋز تىلىندە سويلەسۋى ءۇشىن جاڭا ەكسپەريمەنت ويلاپ تاپتى. مەكتەپ تابالدىرىعىن اتتاعان بالا ءوزىنىڭ انا ءتىلىن ەركىن مەڭگەرگەن بولسا، ونىڭ اتا-اناسىنا قوسىمشا 10 000 لەي (600 اقش دوللارى) قارجى تولەنەتىن بولادى. بۇل جايىندا Qamshy.kz اقپارات اگەنتتىگى Avdarma.md سايتىنىڭ دەرەگىنە سۇيەنىپ حابارلايدى.

ەلەنا كاراميت ەسىمدى دەپۋتاتتىڭ بۇل باستاماسىنا اۋىل مەسەناتتارى دا  قولداۋ ءبىلدىرىپتى. جاڭا ەكسپەريمەنت 2019 جىلدىڭ سوڭىنا دەيىن جالعاساتىن بولادى.

مەكتەپ تابالدىرىعىن ءالى اتتاماعان بالالار جانە باسقا دا جاسوسپىرىمدەردىڭ گاگاۋز ءتىلىن بىلمەۋى – بۇل ەلدە كۇن تارتىبىندە تۇرعان ماسەلە رەتىندە قاراستىرىلۋدا.

مەكتەپكە العاش بارعان بالانىڭ گاگاۋز ءتىلىن بىلمەۋىنىڭ سەبەبىن جەرگىلىكتى مۇعالىمدەر وتباسىندا انا تىلىندە قارىم-قاتىناستىڭ ازدىعىنان ەكەندىگىن ايتادى. بۇگىندە وسى پروبلەمانى شەشۋگە كوپ كوڭىل ءبولىنىپ، بالاباقشالار مەن اۆتونوميالى مەكتەپتەردە گاگاۋز تىلىندە بالالارمەن قارىم-قاتىناس جاساۋدى دامىتىپ، سول ءۇشىن جاعداي جاساۋ كوزدەلۋدە.

بۇگىندە ءتىل ماسەلەسى گاگاۋز قوعامىندا قىزۋ تالقىلانا باستاعان. گاگاۋز حالىقتىڭ كەڭەسىنىڭ دەپۋتاتتارى ءبىراۋىزدان «گاگاۋز ءتىلىن قولدانۋ اياسىن كەڭەيتۋ تۋرالى» شەشىم قابىلداپ، 2019 جىلدىڭ باسىنان بۇل زاڭ ءوز كۇشىنە ەندى.

«2017 جىلى ءبىزدىڭ ليسەيگە  35 بالا ءبىرىنشى سىنىپقا كەلگەن بولاتىن، ولاردىڭ ىشىندە تەك 3ء-ى عانا گاگاۋز ءتىلىن ەركىن مەڭگەرگەن. ءبىز دەپۋتاتتارمەن بىرلەسە وتىرىپ ءبىر جارىم جىل بويى بۇل ماسەلەنىڭ شەشىمىن قاراستىردىق، كەيىننەن گاگاۋز تىلىنە بايلانىستى جاڭا زاڭ قابىلداۋ قاجەت دەپ شەشتىك. ادامدارمەن سويلەسۋ بارىسىندا ولار ءوز وتباسىلارىندا گاگاۋز تىلىندە بىر-بىرىمەن قارىم-قاتىناس جاسامايتىندىعى بەلگىلى بولدى. سوندىقتان، كەلەشەك ۇرپاق انا ءتىلىن ەركىن مەڭگەرۋى ءۇشىن وعان قولايلى جاعداي تۋىنداۋ قاجەتتىگىن تۇسىندىك»، - دەپ ايتىپ ءوتتى دەپۋتات ەلەنا كارميت.

ونىڭ ايتۋىنشا، دەپۋتاتتىڭ باستاماسىنا اۆدارما اۋىلدارىنىڭ مەسەناتتارى قولداۋ ءبىلدىرىپ، ءوز وتباسىندا بالالارىنا گاگاۋز ءتىلىن ۇيرەتكەن اتا-اناعا قوسىمشا جاردەماقى بەرۋ قاراستىرىلىپتى.

«بالالار مەكتەپ تابالدىرىعىن اتتاعاننان كەيىن ولارمەن گاگاۋز تىلىندە اۋىزشا سۇحبات قۇرامىز. بالانى جاسىن ەسەپكە الا وتىرىپ، ونىڭ گاگاۋز ءتىلىن قانشالىقتى مەڭگەرگەنىن قاراپ، ونىڭ اتا-اناسىنا 10 000 لەي كولەمىندە سىياقى تولەيتىن بولامىز. ءبىزدىڭ بۇل تاجىريبەمىز ءوز ناتيجەسىن بەرىپ، گاگاۋز ءتىلىنىڭ قولدانىلۋ اياسىن كەڭەيتەدى دەپ سەنەمىز. بۇل – ءبىزدىڭ كەلەشەك ۇرپاعىمىزدىڭ الدىنداعى باستى مىندەتىمىز»، - دەپ ايتىپ ءوتتى ەلەنا كاراميت.

ۇسىنعان: نازەركە لابيحان