قازاقستاندىق كاسىپقوي بوكسشى رۋسلان مادييەۆ (12-1، 5كو) گەنناديي گولوۆكينگە وكپەلى ەكەنىن ايتتى دەپ حابارلايدى Qamshy.kz اقپارات اگەنتتىگى prosports.kz سايتىنا سىلتەمە جاساپ. 

رۋسلان ءقازىر قاراعاندىدا جاتتىعىپ ءجۇر. ايتۋىنشا، ءدال ءقازىر اقش-تا جۇدىرىقتاسۋعا قۇقى جوق. ويتكەنى پروموۋتەرلەر GGG Promotions كومپانياسىمەن كەلىسىمشارتىم جوق دەگەن قاعاز تالاپ ەتىپ جاتقان كورىنەدى.

– ەندىگى ارەكەتىڭىز قانداي؟

– جارتى جىل جۇدىرىقتاسپادىم. ءبىراق بابىمدامىن، كەز كەلگەن ۋاقىتتا شارشى الاڭعا شىعۋعا دايىنمىن. GGG Promotions ءالى دە ەشتەڭەگە قول قويعان جوق.

– ناۋرىزدىڭ سوڭىندا الماتىدا ۇلكەن بوكس كەشى وتەدى. بۇعان قاتىسۋىڭىز مۇمكىن بە؟

– قازاقستاندا جەكپە-جەك وتكىزسەم، ەشتەڭە بولمايتىن شىعار، ءبىراق امەريكادا جۇدىرىقتاسا المايمىن. سەبەبى مەنى سوتتاۋى مۇمكىن.

– دەمەك، الماتىدا جۇدىرىقتاسا الاسىز با؟

– ءيا، جارىس ۇيىمداستىرۋشىلارىمەن سويلەسۋ كەرەك. ەگەر كەلىسىمگە كەلسەك، شارشى الاڭعا شىعا الامىن. جاتتىعۋ ءبىر بولەك، رەسمي جەكپە-جەككە ەشتەڭە جەتپەيدى.

– مەنىڭ بىلۋىمشە، سىزدە GGG Promotions-پەن كەلىسىمشارت بولعان جوق؟

– ءيا، كەلىسىمشارت بولعان جوق. جاقىندا گولوۆكين سۇحبات بەرىپ، ءوز كومپانياسىندا ەشقانداي بوكسشىمەن كەلىسىمگە وتىرماعانى تۋرالى ايتقان بولاتىن.

– كەلىسىمشارت بولماسا، ولاردىڭ ءسىزدى شارشى الاڭعا شىعارماۋعا قانداي قۇقىعى بار؟

– امەريكادا بارلىق پروموۋتەرلەر سوتتاردان قورقادى. سوندىقتان ولار تاۋەكەلگە بارعىسى كەلمەيدى. ولارعا مەنىڭ GGG Promotions-پەن كەلىسىمشارتىم جوق دەگەن قاعاز كەرەك. ءبىراق گەنناديي ماعان بۇل قاعازدى تەك 100 مىڭ دوللار تولەسەم عانا بەرەتىنىن ايتتى. بۇل مەن ءۇشىن تۇسىنىكسىز جاعداي. سەبەبى مەن بەس جىل تەگىن جۇمىس اتقاردىم دەسە دە بولادى. ءقازىر ءبىر تيىن دا بەرمەيمىن. گولوۆكيننەن مۇندايدى كۇتپەدىم.   

– جالپى Big Bear-گە قالاي كەلدىڭىز؟

– سوڭعى جەكپە-جەگىم تۋرالى ايتقىم كەلەدى. بۇل بوكس كەشىن Golden Boy Promotions ۇيىمداستىردى، مەنى قارسىلاس رەتىندە GGG Promotions-تەن ساتىپ الدى. بۇل اقشادان مەن ەشتەڭە كورمەدىم دەسەم دە بولادى. ەندى ولار مەنەن تاعى اقشا سۇراپ جاتىر.

ال Big Bear-گە مەن العاش رەت بەس جىل بۇرىن كەلدىم. گەنناديي مەنى شاقىرعان بولاتىن. جاي عانا جاتتىعۋ ويىمەن بارعانمىن. سوسىن مەن كاسىبي جەكپە-جەكتەرگە شىعارا باستادى، بىرنەشە كەزدەسۋدەن كەيىن چەمپيوندىق بەلدەۋگە تارتىسامىن دەپ ويلادىم. ءبىراق قاتەلەستىم. بەس جىل ءوتتى، ءبىراق چەمپيوندىق كەزدەسۋ بەرمەدى. قارسىلاستارىم مىقتى بولعانىمەن بۇل جاي عانا رەيتىنگىلىك كەزدەسۋلەر بولدى. بۇعان قوسا ماعان باپكەرىم ۇنامادى. ءقازىر قىزىعۋشىلىق تانىتىپ جاتقان بىر-ەكى پروموۋتەر بار، ءبىراق ولار قاعازدى تالاپ ەتۋدە.

– گولوۆكيننىڭ كومانداسىنا قايتا ورالۋىڭىز مۇمكىن بە؟

– جوق.

– سوڭعى كەزدەرى وندا الي احمەدوۆ جاتتىعىپ ءجۇر. دەمەك ول دا كەلىسىمشارتسىز ءجۇر مە؟

– بىلمەيمىن، ءبىراق ءوز باسىم ەشقانداي كەلىسىمشارتقا قول قويعان جوقپىن.

– ءبىر جەكپە-جەك ءۇشىن ورتاشا سىياقىڭىز قانشا بولدى؟

– ەكى – ەكى جارىم مىڭ دوللار. سوڭعى ون راۋندتىق ەكى كەزدەسۋ ءۇشىن بەس مىڭ دوللار الدىم. بۇل، مىنە، وتكەن جىلى. بۇعان دەيىن ورتاشا سىياقىم ەكى مىڭ دوللاردى قۇراعان.

– دەمەك، گولوۆكين ءسىزدىڭ «بوستاندىعىڭىز» ءۇشىن 100 مىڭ دوللار سۇراپ جاتىر ما؟ 

– بوكسشى كەلىسىمگە قول قويعان كەزدە زاڭگەر قاسىمىزدا بولۋى كەرەك. قەلىسىمشارتتىڭ ءبىر كوشىرمەسە مەندە، ەكىنشىسى پروموۋتەردە بولۋى ءتيىس. ءبىراق بىزدە مۇنداي ەشتەڭە بولعان جوق. ءتىپتى اۋىزشا كەلىسكەن جوقپىز. ەگەر دە رەسمي تۇردە كەلىسىمگە وتىرسام، بۇل سومانى قايتارار ەدىم. باسىندا گولوۆكين «سەنىكى دۇرىس، بوكسشى رەتىندە وسكىڭ كەلسە، ساعان باسقا باپكەر كەرەك» دەگەن. نە بولسا دا، دوس بولىپ قالامىز دەدى. ارتىنشا ماعان «100 مىڭدىق» ەسەپشوتتى كورسەتتى. بۇل قاعازدا ونىڭ ماعان ەش نارازىلىعى جوق ەكەنى تۋرالى جازىلىپ تۇردى. 

– دەمەك بۇل قاراجاتقا ءسىزدىڭ جاتتىعۋىڭىز، تاماعىڭىز، ۇشۋ بيلەتتەرى جاتاتىن شىعار.

– بۇل قاعازدا ءبىز رۋسلانعا كەرەمەت جاتتىعۋ لاگەرىن ۇسىندىق، بيلەتتەر، دارى-دارمەكتەر ساتىپ بەردىك دەلىنگەن جانە سوڭىندا جازۋ – 100 مىڭ دوللار.

– بۇل ماسەلەنى شەشۋ جولدارى بار ما؟

– ءبىرىنشى سۇحباتتان كەيىن ولار مەنىمەن حابارلاساتىن شىعار دەپ ويلادىم. ءبىراق ماعان ەشكىم حابارلاسپادى. ماكس پەن گەنانى ۇلكەن اعالارىم رەتىندە كوردىم، ولاردىڭ ىستەپ جاتقانى مىناۋ... مەنىڭ كارەرامدى قۇرتتىپ جاتىر دەسەم دە بولادى.

– گولوۆكينمەن سوڭعى رەت قاشان سويلەستىڭىز؟

– ەكى اي بۇرىن.

– امەريكادا ما؟

- جوق. مەن قازاقستانعا كەلگەنىمە جارتى جىل بولدى. سوڭعى كەزدەسۋدەن كەيىن وتانىما بىردەن ورالدىم.

– سوڭعى قارسىلاسىڭىز پابلو سەزار كانو سىزبەن بولعان جەكپە-جەكتەن كەيىنگى كەزدەسۋدە الەم چەمپيونى اتاندى. بۇل ءسىز ءۇشىن كۇتپەگەن جاڭالىق بولدى ما؟

– جوق. ماعان ءبارى لينارەس ونى سىندىرىپ تاستايدى دەگەن. مەن اسىقپاڭدار، حورحە جاقىندا عانا سالماق دارەجەسىن اۋىستىردى دەپ جاۋاپ بەردىم، كانونى جەڭۋ وڭاي ەمەس ەكەنىن ايتقان بولاتىنمىن. ناتيجەسىندە كانو لينەرەستى نوكاۋتقا ءتۇسىردى.

– ءسىز كانومەن قارىمتا كەزدەسۋ وتكىزۋىڭىز مۇمكىن بە؟

– ءبىرىنشى كەزدەسۋدەن كەيىن ءوز كومانداما ريەۆانش وتكىزگىم كەلەتىنىن ايتتىم. ولار ماعان كەرەك ەمەس، ول جاراقاتىنان جارتى جىل ەمدەلەدى دەپ جاۋاپ بەردى. قانشا ۋاقىت ءوتتى، ول جەكپە-جەك وتكىزىپ، چەمپيون اتاندى. مەن بولسام ول ۋاقىت ارالىعىندا بىردە-بىر جەكپە-جەك وتكىزبەدىم. ولاردىڭ ريەۆانش ۇيىمداستىراتىن نيەتى بولمادى، سوندىقتان دا مەن GGG Promotions-تەن كەتتىم.