كراسنويارسك قالاسىندا ءوتىپ جاتقان قىسقى ۋنيۆەرسيادا ويىندارىندا قازاقستان قورجىنى تاعى ءبىر مەدالمەن تولىقتى. ەليزابەت تۇرسىنبايەۆا مانەرلەپ سىرعاناۋدان كۇمىس جۇلدە جەڭىپ الدى دەپ حابارلايدى Qamshy.kz اقپارات اگەنتتىگى ق ر ۇوك رەسمي سايتىنا سىلتەمە جاساپ.

قىسقا باعدارلامادان سوڭ جەرلەسىمىز ءتورتىنشى ورىنعا تابان تىرەگەن. ەركىن باعدارلامانى ەش قاتەسىز ورىنداعان ول جالپى ەسەپتە ەكىنشى ورىنعا كوتەرىلدى.

تۇرسىنبايەۆا ءوزىنىڭ ەكى رەكوردىن جاڭارتتى. ەركىن باعدارلامادان العاش رەت 147.20 ۇپاي يەلەنسە، قوسسايىس قورىتىندىسى بويىنشا 214.77 ۇپايعا قول جەتكىزدى.

التىن جۇلدەنى جاپوندىق ماي ميحارا (220.68)، قولانى رەسەيلىك ستانيسلاۆا كونستانتينوۆا (205.91) جەڭىپ الدى.

تاعى ءبىر قازاقستاندىق سپورتشى ايزا مامبەكوۆا 124.41 ۇپايمەن 17ء-شى ورىندى قاناعات تۇتتى.

ۇسىنعان: ماقپال سەمباي