كولين دجونس پەن پولينا يانگ 1976 جىلى تانىسقان. ال ءبىر جىل بويعى كەزدەسۋدەن كەيىن ەر ادام ىزدەگەن ادامى پولينا ەكەنىن ءتۇسىندى. ءبىراق، ايەل كوليننىڭ تۇرمىسقا شىعۋ تۋرالى ۇسىنىسىن قابىلدامادى. وسىلاي، ول جىل سايىن كوليننىڭ  وتباسىن قۇرۋ تۋرالى ۇسىنىستارىنان باس تارتا بەرگەن. ال ەندى، 42 جىلدان جانە 42 ساتسىزدىكتەن كەيىن، ولار وزدەرىنىڭ قارىم-قاتىناسىن زاڭداستىرىپ، نەكەگە وتىردى، دەپ جازادى Qamshy.kz اقپارات اگەنتتىگى Stan.kz سايتىنىڭ دەرەگىنە سۇيەنىپ.

كولين مەن پولينا العاش رەت بالالارى وينايتىن ويىن الاڭىندا كەزدەسكەن. كولين پوليناعا ءبىر كورگەننەن عاشىق بولعانىن ايتتى. العاشىندا ولار انگليانىڭ ۋەلس قالاسىندا تۇرعان، ءبىراق 14 جىل بۇرىن پولينا مالتاعا كوشىپ كەتۋگە شەشىم قابىلدايدى. وندا عاشىقتار كىشىگىرىم قوناق ءۇي اشىپ، بىرگە جۇمىس ىستەدى.

«ءبىز 43 جىل بويى بىرگە بولدىق. كوپتەگەن جۇپتار وسىلاي دەيدى، ءبىراق ولار ءبىر-بىرىن قانشا ۋاقىت كورەدى؟ جۇمىسقا بارار الدىندا ءبىر ساعات جانە جۇمىستان كەلگەننەن كەيىن ءبىر ساعات. ال ءبىز بىرگە ءومىر ءسۇرىپ جانە بىرگە جۇمىس ىستەدىك»،- دەيدى كولين.

ادامدار بارلىق ۋاقىتتى بىرگە وتكىزگەن كەزدە ءبىر-بىرىنىڭ مىنەز-قۇلقىنداعى كەمشىلىكتەردى بايقاماۋى مۇمكىن ەمەس. ءبىراق، كولين مەن پولينا زاڭدى تۇردە نەكەگە تۇرماسا دا، ءومىر بويى بىرگە تۇرىپ، ءبىر-بىرىن جاقسى ءتۇسىنىپ كەلدى. 

ءبىراق، ۋاقىت ءوز دەگەنىن الادى دەمەكشى، سوڭعى كەزدە پولينانىڭ دەنساۋلىعى سىر بەرە باستادى. سودان عاشىق جۇپ دارىگەرمەن كەڭەسۋدى شەشەدى. وكىنىشكە وراي، دارىگەرلەر ايەلدىڭ كورتيكوبازالدى دەگەنەراسياعا شالدىققانىن ايتادى، جانە بۇل دياگنوزدى ەستىگەننەن كەيىن كولين مەن پولينا ءوز وتاندارىنا ورالۋعا شەشىم قابىلدايدى.

پولينامەن بىرگە تۇرعان ۋاقىتىندا كولين وعان 42 رەت تۇرمىسقا شىعۋ تۋرالى ۇسىنىس جاساپ، 42 جىل ايەلى بولۋىن سۇراعان. ال ول ءۇمىتىن ۇزگەندە، 43ء-شى ۇسىنىستى پولينانىڭ ءوزى جاسادى. 42 جىل بويى «ءيا» دەگەن جاۋاپتى كۇتكەن كولين بۇل ۇسىنىستى ەستىگەندە تاڭعالعاننان توسەكتەن قۇلاپ كەتە جازداپتى.

سودان ولار ۇيلەنۋ تويلارىن اۋليە ۆالەنتين كۇنىندە قارتتار ۇيىندە جاساۋعا شەشىم قابىلدادى. وسىلايشا، 42 جىل بويى بىر-بىرىنەن ايىرىلماعان قارتتار اقىرى نەكەلەرىن زاڭداستىردى. ال، قارتتار ءۇيىنىڭ اكىمشىلىگى كۇيەۋ جىگىت پەن قالىڭدىققا سىيلىق جاساپ، ولاردىڭ قۇرمەتىنە قابىلداۋ ۇيىمداستىردى.

ۇسىنعان: نازەركە لابيحان