الماتىلىق كەلىنشەك باسىنان وتكەن ادام سەنگىسىز وقيعانى ايتىپ بەردى، دەپ جازادى Qamshy.kz اقپارات اگەنتتىگى 

ءومىر مەن ءولىمنىڭ اراسىندا، دارىگەرلەردىڭ تىلىمەن ايتقاندا، كلينيكالىق ءولىم دەگەن كەزەڭ بولادى. ول كەزدە ادامنىڭ ءبىر ساتكە تىنىسى توقتاپ، جۇرەگى تىنشيدى.

اللانىڭ قۇدىرەتىمەن وسىنداي كەزدە كەيبىر ادامداردىڭ جۇرەگى قايتادان سوعىپ، بويىنا جان بىتەدى. قازاقتار وندايدا "ارعى جاققا بارىپ كەلدى، ارۋاعى مىقتى ەكەن، قايتارىپ الدى" دەپ كۇبىرلەسىپ جاتادى. بۇل ءوزى ومىردە ىلۋدە ءبىر رەت كەزدەسەتىن سيرەك قۇبىلىس.

سونداي سيرەك قۇبىلىستى باسىن وتكەرگەن الماتىلىق – گۇلىم اقسارى (ءاتى-جونى وزگەرتىلىپ الىندى).

گۇلىمنىڭ ايتۋىنشا، 2005 جىلى الماتى قالالىق №12 اۋرۋحانادا وتا جاساعان دارىگەرلەر ونى "ءولدى" دەپ جالاڭاش كۇيى سۇيرەمەلى توسەگىمەن دالىزگە شىعارىپ تاستاعان ەكەن.

"ورنىمنان تۇرسام دالىزدە جاتىرمىن. اناندايدا جۇرگەن مەيىربيكەلەردىڭ ءبىرى مەنىڭ تۇرعانىمدى كورىپ، تۇرا جۇگىردى. ەكىنشىسى قاسىم كەپ، قولىمنان ۇستادى. "سەنى ءولدى دەگەن" دەدى سوسىن. ءبىر ۋاقىتتا بوتاداي بوزداپ اپكەم كەلدى. ايعاي-شۋ شىعاردى. ءسويتىپ مەنى اقىلى بولىمگە اۋىستىرتقىزدى"، - دەيدى الماتالىق كەلىنشەك قىز كۇنىندە باسىنان وتكەن وقيعانى ەسكە الىپ.

گۇلىمنىڭ ايتۋىنشا، ونىڭ اياق-استىنان ءتىرىلىپ كەتكەنىنە، اسىرەسە دارىگەرلەر قاتتى اشۋلانىپتى.

"سوقىرىشەگىم جارىلعان عوي. سونىڭ سوقىرىشەك ەكەنىن بىلمەي، ءىشىمدى ارى-بەرى قوپارىپ، اقىرى ول جارىلىپتى. ودان سوڭ "بۇل ءبارىبىر ادام بولمايدى" دەپ، وتا كەزىندە ىشەكتى دە اياماي كەسىپ، ءىشىمدى ءبۇرىپ قالاي بولسا سولاي تىگە سالعان.

ءبىر سوزبەن ايتقاندا، باسىنان باستاپ اياعىنا دەيىن دارىگەرلىك قاتە تۇنىپ تۇر. تىرىلگەن سوڭ ولار، ارينە قاتتى شوشىدى. اقىلى بولىمگە اۋىستىرىپ، دۇرىستاپ قاراعانداي بولدى"، - دەيدى ول.

سول كەزدە دۇرىس جاسالماعان وتانىڭ زاردابىن ءالى تارتىپ جۇرگەنىن ايتقان گۇلىم ەكىنشى رەت قالاي ولىپ-تىرىلگەنىن دە بايانداپ بەردى.

"اتىلعان وق قۇساپ زۋلاپ كەلەدى ەكەم. قالاي تەز جۇگىرەتىن بوپ كەتكەنمىن دەپ تاڭعالىپ قويامىن. ءبىر ۋاقىتتا تومەنگە قاراسام استىمدا ادامدار ءجۇر. سويتسەم مەن اۋرۋحانانىڭ توبەسىندە ۇشىپ ءجۇر ەكەم. شوشىپ كەتتىم.

جان ۇشادى دەگەن وسى ەكەن عوي دەپ ويلاپ قويامىن. نە كەرەك زىرىلداپ پالاتالارعا بىرىنەن سوڭ بىرىنە كىرە باستادىم. اقىرى بىرىنەن ءوزىمدى تاۋىپ الدىم. ناقتىراق ايتقاندا، دەنەمدى تاپتىم"، - دەيدى ول الماتىداعى №3 پەرزەنتحانادا 2011 جىلى تۇڭعىشىن بوسانعان كەزدى ەسكە الىپ.

كەلىنشەكتىڭ ۇشىپ جۇرگەن جانى قانشا تالپىنسا دا، دەنەسىنە قونا الماپتى.

"دارىگەرلەر قاۋمالاپ تۇر. باس دارىگەر بولۋى كەرەك: "الما، تۇرسىن" دەپ جاتىر. سوعان قاراعاندا اپپاراتقا قوسقان سەكىلدى. ەندى نە ىستەۋىم كەرەك دەپ شىر-پىرمىن. دەنەمنىڭ قاسىنا بارىپ جاتامىن. اينالسوقتاپ ارى-بەرى جۇرەمىن. ءبىراق ونىمنان تۇك شىقپادى.

ءبىر ۋاقىتتا توبەگە قاراسام ءبىر بوپەنىڭ ساۋساقتارى كورىنىپ تۇر ەكەن. جالما-جان ۇشىپ بارىپ سول ءسابيدىڭ ساۋساقتارىنان ۇستادىم. وسى كەزدە دەنەممەن سەلك ەتىپ وياندىم. قولىمدا جاڭا تۋعان قىزىم جاتىر ەكەن. قۋانعانىمنان تۇنشىعىپ جىلاپ جىبەردىم"، - دەگەن كەلىنشەك سودان باستاپ نامازعا جىعىلعانىن ايتادى.

سويتسە، دارىگەرلەر ناركوزدان سوڭ ونى وياتا الماعان. ءبىر تاۋلىك بويىنا ويانباعان كەلىنشەكتىڭ كۇيەۋىنە ءبىر مەدبيكە ءتىپتى: "دايىندالا بەرىڭىز" دەپ ەستىرتىپ ۇلگەرىپتى.

"تۇرعان سوڭ بىردەن كۇيەۋىمە تەلەفون سوقتىم. قايدا ءجۇرسىڭ دەسەم، "سەن شىنىمەن گۇلىمسىڭ بە" دەيدى. قاتتى اشۋىم كەلدى. سويتسەم ول ءىشىپ الىپتى كۇيىكتەن. كۇيەۋىم مەنى ءولدى دەپ ويلاپتى" ، - دەيدى ول.

وسى جايتتاردان سوڭ گۇلىم ءتۇس ارقىلى ومىردە بولاتىن كەيبىر جايتتى الدىن الا ءبىلىپ وتىراتىن قاسيەتكە يە بولعانىن ايتادى.

"ءتۇس كورەمىن. جوريمىن. سول تۋرا كەلەدى. ءبىراق مۇنىمدى ەشكىمگە ايتقان ەمەسپىن. ويتكەنى وعان وزگە تۇگىلى ءوزىم دە سەنبەيمىن، ونشا ءمان بەرمەيمىن"، - دەيدى ول.

ۇسىنعان: نازەركە لابيحان