قازاقستاندىق سپورتشى شاۆكات راحمونوۆ UFCء-دىڭ ۇسىنىسىنان نە سەبەپتى باس تارتقانىن ءتۇسىندىردى دەپ جازادى Qamshy.kz اقپارات اگەنتتىگى vesti.kz سايتىنىڭ دەرەگىن نەگىزگە الىپ. سونداي-اق شاۆكات راحمونوۆ سپورتتاعى سوڭعى جاڭالىقتارعا قاتىستى دا ءوز پىكىرىن ءبىلدىردى. 

— كونوردىڭ ارالاس جەكپە-جەكتەن كەتكەنىن بىلەتىن شىعارسىز. كونور نە سەبەپتى اياق استىنان كارەراسىن اياقتادى؟ قالاي ويلايسىز؟

— مەنىڭ ويىمشا بۇل كونوردىڭ ءوز شەشىمى. ول كەز كەلگەن ۋاقىتتا ارالاس جەكپە-جەككە قايتا ورالۋى مۇمكىن. ءوزى قالاعان ۋاقىتتا وكتاگونعا شىعا الادى. قازىرگى تابىسى ءوزىنىڭ وتباسىن تولىق قامتاماسىز ەتۋگە جەتىپ ارتىلادى. سوڭعى مالىمدەمەسى كەزەكتى پيار ما، الدە شىنىمەن شارشاعاندىقتان سپورتتان كەتتى مە بەلگىسىز. ۋاقىت كورسەتەدى. 

— ءسىز ءوزىڭىزدى كىمگە كوبىرەك ۇقساتاسىز؟ حابيبكە مە، كونورعا ما؟

— مەن كونور دا، حابيب تە بولمايمىن. مەن قازاقستاننىڭ سپورتشىسى شاۆكات راحمونوۆپىن. 

— UFC-دە ونەر كورسەتۋىڭىزگە نە كەدەرگى؟

— مەن ءوزىمدى ءالى دە شىڭداۋىم كەرەك. جۇدىرىقتاسۋدى، جەكپە-جەك كەزىندە ءتۇرلى تەحنيكالاردى ۇيرەنۋىم كەرەك. ازىرگە كوپ ۋاقىتىمدى جاتتىعۋعا ارناعىم كەلەدى. UFC - ەڭ جوعارعى دەڭگەي دەپ ەسەپتەيمىن. 

— ءسىزدىڭ سالاڭىزداعى ەڭ مىقتى سپورتشى دەپ كىمدى ايتا الاسىز؟

— ماعان كامار ۋسمان ۇنايدى. ول وتە مىقتى سپورتشى. جارتىلاي سالماقتاعى الەم چەمپيونى اتانعان. 

— ءوزىڭىز ايتقان سپورتشىمەن جەكپە-جەككە شىققىڭىز كەلە مە؟

— مەن UFC-دە ونەر كورسەتكەن كەزدە ول وكتاگونعا شىعادى ما؟ بۇل جاعىن ۋاقىت كورسەتەر. مۇمكىن كەزدەسىپ قالارمىز. جەكپە-جەك بولسا ەكەۋمىز دە ءتۇرلى دەڭگەيدە ونەر كورسەتەتىنىمىز انىق. مەن قورىقپايمىن، ءبىراق مۇنداي جەكپە-جەك ءۇشىن ءبىراز ۋاقىت تەر توگۋ كەرەك. 

— ءسىز نە سەبەپتى UFCء-دىڭ ۇسىنىسىنان باس تارتتىڭىز؟

— بۇل ۇسىنىستىڭ جاسالعانىنا كوپ ۋاقىت وتكەن جوق. ال 30 ناۋرىزدا الماتى قالاسىندا مەن جەكپە-جەككە شىعۋىم كەرەك بولدى. بۇل جاريالانىپ قويعان بولاتىن. سونداي-اق م-1 تيتۋلدىق جەكپە-جەگىن مەن كوپتەن بەرى كۇتىپ جۇرگەن ەدىم. سول سەبەپتى بىزگە ۇسىنىلعان بىر-ەكى جەكپە-جەكتەن باس تارۋىمىزعا تۋرا كەلدى. اسىعىستىقتىڭ قاجەتى جوق. ازىرگە جەكپە-جەكتىڭ ءوز ەلىمدە وتكەنىن قالايمىن. 

— M-1 تيتۋلى — UFC-گە اپارار جول ما؟

— بۇل ۇيىم 20 جىلدان بەرى جۇمىس ىستەپ كەلەدى. الەمدەگى ەڭ ۇزدىك پروموۋشەندەردىڭ ءبىرى. بۇل جەردەن بارلىق سپورتشى UFC-گە بارا الادى. 

— الداعى جەكپە-جەك نەسىمەن ەرەكشەلەنەدى؟

بۇل جەكپە-جەك ءوز ەلىمدە وتۋىمەن ەرەكشەلەنەدى. مۇنىڭ ءوزى ماعان ارتىلعان جاۋاپكەرشىلىك دەپ ەسەپتەيمىن. ازداعان قوبالجۋ بار. مەن ءوز جەرلەستەرىمە ۇلكەن سىي جاساعىم كەلەدى. 

— جەڭىسكە جەتۋ ءۇشىن قانداي ءتاسىلدى قولداناسىڭ؟

— قاي ءتاسىلدىڭ ىڭعايى كەلەدى سونى ىسكە اسىرۋعا تىرىسامىن. مۇمكىن نوكاۋت، مۇمكىن قىلعىندىرۋ ءتاسىلىن قولدانارمىن. ءتىپتى  جەڭىسكە جەتۋ ءۇشىن 5 راۋند قاجەت بولۋى مۇمكىن. (كۇلدى) 

ەسكە سالا كەتسەك، راحمونوۆ پەن پريكازويدىڭ جەكپە-جەگى 30 ناۋرىزدا "الماتى-ارەنادا" وتەتىن بولادى.  

اۋدارعان: اسەل بولات قىزى