"balapan تەلەارناسى بىلتىر الدىنا قويعان باستى ماقساتتارىنىڭ ءبىرى - انيماسيا ساپاسى مەن سانىن ارتتىرۋ جۇمىسىن قال-قادىرىنشە جۇزەگە اسىردى. ونىڭ بارلىعى تۋرالى وسى الەۋمەتتىك جەلىلەردە جازىپ وتىردىق، سۇحبات بەرىپ، پرەزەنتاسيا وتكىزدىك. ءبىزدىڭ شىعارماشىلىق توپ "عارىشتىق جىلدامدىقپەن" جۇمىس ىستەدى. ۇلكەن ماقساتتار قويدىق. جۇمىستىڭ اۋقىمدىلىعىنان سىنىپ كەتە جازداعان ءساتىمىز بولسا دا، ءار انيماتوردى، رەجيسسەردى، سەناريستى، پروديۋسەردى قاناتتاندىرىپ، جاڭا ساپاعا، بيىككە ۇمتىلدىردىق. ءبىر جىل ىشىندە جۇزەگە اسىرىلۋى قاي تۇرعىدان دا قيىن ءارى مۇمكىن ەمەس جوبالاردى جۇدىرىقتاي جۇمىلىپ جاساپ شىقتىق. بۇل - ءبىزدىڭ بىلايعى ەلگە بىلىنبەيتىن كىشكەنتاي ەرلىكتەرىمىز.
تۇڭعىش رەت سۋپەر قاھارماندار جاسادىق. "ايدار"، "ەرتەمىر"، "دالا ويىندارىن" وندىرىسكە جىبەردىك. "قوڭىر قاز" دەگەن اتپەن قازاقتىڭ 20 كۇيىن انيماسيالادىق. "شاحمات پاتشالىعى" 32 سەريالى شاحمات ۇيرەتۋ مۋلتحيكاياسىن تۇسىردىك. 20 سەريالى "دارا تۇلعا" سەريالىن جۇزەگە اسىردىق. "بابالار ءسوزى" انيماسيالىق روليكتەرىن (30 دانا) ۇسىندىق. "كەل. شىرقايىق!" دەگەن اتپەن ونەگەلى اندەر سيكلىن (20 دانا) تۇسىردىك. "ورمان كۇزەتى" دەگەن ەكسپەريمەنتالدى سەريالىمىزدى جۇزەگە اسىردىق.
بالالار بۇل جوبالارىمىزدى اسقان ىرزاشىلىقپەن قابىلدادى. ارناداعى رەيتينگتەرىمىز الەمدىك ستۋديالاردىڭ كورسەتكىشىنەن وزدى. ءبىز بالالاردىڭ كوكەيىندەگى دۇنيەلەردى ءدوپ باسۋ ءۇشىن بارىنشا ەڭبەكتەندىك. بۇل سىننان سۇرىنبەي وتكەن سەكىلدىمىز.
ءبىراق، شىعارماشىلىق توپ كوركەمدىك، ساپالىق تۇرعىداعى كەمشىلىكتەرى ءۇشىن ءوز "سىباعالارىن" الدى. بۇل كەمشىلىكتەردى جولاي جوندەۋ، رەتتەۋ مۇمكىن ەمەس ەدى، وعان نازار سالساق، كوماندانى كۇيرەتىپ الۋ ءقاۋپى تۇردى. ويتكەنى، ساپا، كوركەمدىك - جاساپ كورگەندە عانا شىڭدالادى. مۇنداي جوبالارمەن بەتپە-بەت كەلمەگەن جاستاردى سول كوپىردەن امان الىپ ءوتۋ مىندەتى دە balapan-دا بولدى. جانە بۇل مىندەتتى ءبىز دە جان-جۇرەگىمىزبەن سەزىندىك.
ستۋديالاردى، قويۋشى رەجيسسەرلەردى تىزىمدەپ الىپ، ءوزىم بىرلەسە جۇمىس ىستەۋگە شاقىرعان سول كۇننەن بەرى انيماسيالىق كەڭىستىكتە مۇددەلەستىك، يدەيالاستىق، قاۋىمدىستىق قالىپتاستى دەپ ويلايمىن. ءبىزدىڭ بۇگىنگى ورتاق ىسكە جۇمىلعان جاۋاپكەرشىلىگىمىزگە قىزىعا قاراۋىڭىزعا بولادى.
ءبىز بيىل جاڭا ساپا، جاڭا كوركەمدىك دەڭگەي ۇسىنعىمىز كەلەدى. سوعان كىرىسىپ تە كەتتىك. جاڭا قويۋشى رەجيسسەرلار تاربيەلەۋ ءىسىن ءار ستۋديادان تالاپ ەتىپ وتىرمىن. انيماتورلاردىڭ كەلەسى بۋىنىن قاناتتاندىرۋ - ءبىزدىڭ تاعى ءبىر مىندەتىمىز. بيىل ءبىز تىڭ شەشىمدەر، ستيليستيكالىق ەرەكشەلىكتەر، تاقىرىپتىق ىزدەنىستەر تۇرعىسىنان دا ءبىر ادىم العا جىلجيمىز. فۋندامەنتالدى دۇنيەلەرگە كىرىسەمىز. ءبىراق، ۋاقىت بىزدەن ءبىر ادىم ەمەس، ون ادىم جاساۋدى تالاپ ەتىپ وتىر. ءبىز تىرىسامىز! جانە الدىمىزعا قويعان ماقساتتى ورىندايمىز دەپ سەنەمىن. بيىل ارنامىز انيماسيالىق جوبالار سانىن 10-نان 13-كە ارتتىردى. وسى ءىستىڭ بارىندە شىعارماشىل جاستاردىڭ جانىنان تابىلعانى ءۇشىن ەرلان تىنىمبايۇىلىنا راحمەت ايتقىم كەلەدى. ال ءبىز كوزىمىز جارقىراپ، جاڭا جوبالارعا كىرىستىك." (ورفوگر. ساقتالعان)
♦ماقپال جۇمابايدىڭ فەيسبۋك پاراقشاسىنان
ۇسىنعان: ماقپال سەمباي
