بۇگىن وبلىس اكىمى اماندىق باتالوۆ 8 ناۋرىز – حالىقارالىق ايەلدەر مەرەكەسىنە وراي وبلىستاعى ءبىرقاتار ارداگەر انالاردى ۇيلەرىنە بارىپ، ارنايى قۇتتىقتاپ قايتتى. الدىمەن وبلىس باسشىسى ەڭبەك ارداگەرى، «قۇرمەت بەلگىسى» وردەنىنىڭ يەگەرى اننا شيەۆەليەۆانىڭ شاڭىراعىندا بولدى.
اماندىق باتالوۆ 98 جاستاعى كەيۋانانى مەرەكەمەن قۇتتىقتاپ، اڭگىمەلەستى. بۇرىنعى جانە بۇگىنگى ءومىرى تۋرالى قىسقاشا بايانداپ بەرگەن اجە وسى ەلدە تۋىپ، ەر جەتىپ، وسى كۇنگە جەتكەنىنە ريزا ەكەنىن ايتتى.
«بۇرىنعى اندرەيەۆكا اۋىلىندا تۋدىم. قازاقستان - ءوز وتانىم. ءبىز سوعىستى دا، اشتىقتى دا، اۋىرتپالىقتى دا باسىمىزدان وتكىزدىك. 1955 جىلدان بەرى تالدىقورعان قالاسىندا تۇرامىن. ەلىمىزدىڭ، سونىڭ ىشىندە تالدىقورعاننىڭ بۇرىنعى جانە قازىرگى كەزدەگى كەيپىن ىشتەي سالىستىرامىن، كۇن ساناپ ءوسىپ كەلە جاتقانىن كۇندە جاڭالىقتاردان كورىپ، گازەتتەردەن وقىپ وتىرامىن. وسى كۇندى كورگەنىمە باقىتتىمىن. بالالارىم ءوسىپ-وندى، ەلگە قىزمەت ەتەتىن جاقسى ازاماتتار بولىپ ەرجەتتى، شۇكىر. وسىنداي مەرەكەلىك شاقتا قۇتتىقتاپ كەلگەندەرىڭىزگە شىن جۇرەكتەن ريزامىن»، - دەدى اننا شيەۆەليەۆا.
وبلىس اكىمى ءوز كەزەگىندە اجەيگە سىي-سياپات تاپسىرىپ، زور دەنساۋلىق تىلەدى جانە 100-گە كەلۋىنە تىلەكتەستىك ءبىلدىرىپ، سول عاسىرلىق قۋانىشىندا ارنايى قۇتتىقتاپ كەلەۋگە ۋادە بەردى.
كەلەسى كەزەكتە ءوڭىر باسشىسى سوعىس ارداگەرى، ءى دارەجەلى ۇلى وتان سوعىسى وردەنىنىڭ يەگەرى التىناي ەسبولاتتى قۇتتىقتادى. «سوعىستىڭ قيىنشىلىعىن باستان كەشىرە ءجۇرىپ، جەڭىستىڭ جارقىن كۇندەرىنە جەتتىك. بۇگىنگى جاستار، كەلەر ۇرپاق وسى بەيبىت زاماننىڭ، بارىمىزدىڭ باعاسىن باعاسىن بىلسە ەكەن. ەل باسقارىپ جۇرگەن ازاماتتار امان بولىپ، حالىقتى جاقسى كۇندەرگە جەتكىزە بەرسىن! انانىڭ اق تىلەۋى وسى!» - دەي كەلە، التىناي اپا باتاسىن بەردى.
وبلىس باسشىسى اماندىق باتالوۆ 96 جاستاعى اجەنىڭ ىزگى نيەتىنە العىسىن ءبىلدىرىپ، مەرەكەلىك سىيلىعىن ۇسىندى، اۋىرماي، تىڭ، سەرگەك قالىپپەن ۇزاق جاساۋىنا تىلەكتەستىگىن ءبىلدىردى. اجەيدىڭ قال-جاعدايىن، دەنساۋلىعىن سىرتتاي سۇراپ ءبىلىپ تۇراتىنىن، ال بۇگىن قۇتتىقتاۋعا ارنايى كەلگەنىن ايتتى. سونىمەن قاتار قالا اكىمدىگىنە جانە ءتيىستى باسقارماعا سوعىس ارداگەرىنىڭ دارىگەرگە قارالۋى كەزىندە كولىك تاسىمالى جاعىنان كومەكتەسىپ تۇرۋدى تاپسىردى.
