ۇيىمدە قۇس جاستىققا جانتايىپ، اۋزىم بولسا، اڭقايىپ، تەلەديدار كورىپ وتىرعانمىن، «قاشان ءشاي دايىن بولادى؟» دەپ ءولىپ وتىرعانمىن، ءبىر كەزدە ايەلىم:
–ەسىك الدىنا ءنوپىر حالىق جينالىپتى! سەنى شاقىرىپ تۇر! –دەگەنى. ەسىك الدىنا ەسىنەي شىققانىم سول، ون شاقتى جىگىت مەنى كوتەرىپ الدى دا، قارا سۇلىكتەي ءليمۋزيننىڭ ىشىنە لاقتىرا سالدى. سودان، زىمىراپ وتىرىپ، اقورداعا كەلدىك. جاڭاعى جىگىتتەر مەنى دىرىلداتا سۇيرەپ اكەلدى دە، پرەزيدەنت تاعىنا ىڭق ەتكىزە وتىرعىزا سالدى.
–بۇل نە؟ –دەپ سۇرادىم مەن.
–ءسىز بۇگىننەن باستاپ پرەزيدەنتسىز. حالىق ءسىزدى قالايدى، –دەدى ءبىرى.
–ال، جارايدى. نەگە مەن پرەزيدەنتپىن؟ جوق. بولمايمىن! پرەزيدەنت بولسام، جاعىمپازدار جانىما جينالىپ، ءومىر–باقي وڭبايمىن! –دەدىم مەن.
–بولاسىز! حالىق ءسىزدى قالايدى.
–جارايدى. جاسىم توقساندا عوي؟ توڭقايىپ قالسام شە؟
–قىرىق جىل قىڭق دەمەيسىز!
–ويباي–اۋ، 130 جىلعا دەيىن كىم بار، كىم جوق؟
–ولۋگە رۇقسات جوق!
امال قانەكي، قازىرگى توقايەۆتان كەيىن پرەزيدەنت بولدىم! وزىمشە، جاعىمپازداردى جانىما جولاتپايمىن دەپ انت بەردىم. سول كۇنى كەشتەتىپ، ۇيىمە كەلسەم، ەسىك الدىندا بىرەۋ قولىن سوزىپ تۇر. «امانداسقالى تۇرعان شىعار؟» دەپ ويلاپ، جانىنا كەلسەم، ءوزىمنىڭ ەسكەرتكىشىم! قولىنان ءسۇيىپ، ىشكە كىردىم. ايەلىم ايتادى: «جاڭا عانا جاعىمپازدارىڭ قويىپ كەتتى، دىرىلداتىپ، ەسىك الدىن ويىپ كەتتى...» دەيدى. ءسال شىرەنە باستادىم. كوڭىل توق، جۇرەگىم شوق. ەرتەڭىنە مەنى قۇتتىقتاۋشىلار كوشەگە جينالىپتى! گۇل شوقتارىن لاقتىرعاندا، جالپ ەتىپ، قۇلاپ قالدىم. تاۋداي بولىپ ۇيىلگەن گۇل اراسىنان باسىمدى قىلتيتا قاراپ ەدىم، بىرەۋ كەلىپ شاشىمدى تارادى، ەكىنشىسى ءۇستىمدى گۇل جاپىراقتارىنان تازالاي باستادى، ءۇشىنشىسى ءتۋفليىمدى سابىنداپ جۋا كەتتى. شىرەنە ءتۇستىم. بەلىم قاقيدى دا قالدى. سويلەۋگە ەرىنەمىن. پرەزيدەنت بولۋ راحات ەكەن عوي؟ جەر قازبايدى، شاحتاعا تۇسپەيدى، مال باقپايدى. كۇن ۇزاق كابينەتىمدە وتىرىپ الىپ، كلاستاستارىممەن ۆاساپ ارقىلى حات جازىسۋمەن بولدىم. وقتا–تەكتە، تەلەديداردان مالىمدەمە جاساپ قويامىن: «قازاقستان قاتىندارى! داۆاي، تۋا بەرىڭدەر! 21 مىڭ جاردەماقىعا ەلۋ تيىن قوسامىن!» دەيمىن. دەپ جاتىپ، الدىما كەلگەن تورتتان جەپ جاتىپ، ويانىپ كەتتىم! جاڭاعىنىڭ ءبارى ءتۇسىم ەكەن! سونىڭ وزىندە، كەرەۋەتتەن شىرەنىپ ءتۇستىم عوي! جو–جوق، پرەزيدەنت بولمايمىن! نەگە دەيسىزدەر مە؟ ايلىعى از ەكەن...

مۇحتار شەرىم، ساتيريك