الماتى وبلىستىق پارتيا فيليالىنىڭ ءتوراعاسى، وبلىس اكىمى اماندىق باتالوۆتىڭ جەتەكشىلىگىمەن «Nur Otan» پارتيانىڭ وبلىستىق اكتيۆ وتىرىسى ءوتتى.
وبلىس باسشىسى پارتيانىڭ 20 جىل ىشىندە بەدەلدى ۇيىمعا اينالعانىن ايتا كەلە، وندا پاريانىڭ ءار مۇشەسىنىڭ ەلەۋلى ۇلەسى بار ەكەنىن اتاپ ءوتتى. جۋىردا وتكەن پارتيا سەزىندە قارالعان ماسەلەلەرگە توقتالىپ، ۇيىمنىڭ 20 جىلدا اتقارىلعان جۇمىستارى سارالانعانىن، پارتيانىڭ 2030 جىلعا دەيىنگى «باقۋاتتى قوعام: 10 جىلدىققا 10 ماقسات» اتتى باعدارلاماسى قابىلدانعانىن، پارتيا جارعىسىنا وزگەرىستەر مەن تولىقتىرۋلار ەنگىزىلگەنىن اتاپ ءوتتى.
اكتيۆ الدىندا بايانداما جاساعان اماندىق باتالوۆ پارتيانىڭ باستاماشىل جوبالارى اياسىندا جىل بويى جۇرگىزىلگەن جۇمىستارعا ساراپتاما جاساپ، ورتاق جۇمىستىڭ جوسپارىمەن تانىستىردى.
- بۇگىنگى كۇنى وبلىستا 4 جانە ودان دا كوپ بالالى 40 مىڭ وتباسى بار. بۇل جانۇيالاردىڭ تابىس دەڭگەيى ءارقيلى. سوندىقتان ءبىز ءبىرىنشى كەزەكتە تابىسى تومەن كوپ بالالى وتباسىلارىنا كوڭىل بولەتىن بولامىز. از قامتىلعان وتباسىلارىن، سونىڭ ىشىندە كوپ بالالى وتباسىلارىن نەعۇرلىم كەڭ قامتۋ ءۇشىن اتاۋلى الەۋمەتتىك كومەك كورسەتۋ كريتەريلەرى تومەنگى كۇنكورىس شەگىنىڭ 70 پروسەنتىنە دەيىن، ياعني 14 849 تەڭگەدەن 20 789 تەڭگەگە دەيىن (كۇنكورىس دەڭگەيىنىڭ تومەنگى شەگى – 29698 تەڭگە) ارتتىرىلادى. مۇنداي وتباسىلاردىڭ كىرىس جيىنتىعىن ەسەپتەگەندە كوپ بالالى وتباسىلارعا، كوپ بالالى انالارعا بەرىلەتىن مەملەكەتتىك جاردەماقىلار، بالالاردىڭ مۇگەدەكتىگى ءۇشىن بەرىلەتىن جاردەماقىلار، ستيپەنديالار ەسەپكە الىنبايدى. سونىڭ نەگىزىندە ءبىزدىڭ وبلىستا اتاۋلى الەۋمەتتىك كومەك الاتىندار سانى 11 مىڭ وتباسىنان (59 مىڭ ادام) 17 مىڭ وتباسىنا (87،4 مىڭ ادام) ارتاتىن بولادى. سول سياقتى مۇگەدەك بالالارعا بەرىلەتىن جاردەماقى كولەمى دە 30 پروسەنتكە ۇلعايادى، ونى وبلىستا 8 108 وتباسى الادى، - دەدى ءوز سوزىندە اماندىق باتالوۆ.
سونىمەن قاتار كوپ بالالى جانە از قامتىلعان وتباسىلارىنا ارنالعان الەۋمەتتىك قولداۋ شارالارىنا وبلىستان 3 ملرد. تەڭگەدەن استام قارجى ءبولىنىپ وتىرعانىن تىلگە تيەك ەتتى. وعان كوپ بالالى وتباسىلارىنا ارناپ سالىناتىن ەكى كوپ قاباتتى ءۇيدىڭ جوبالىق-سمەتالىق قۇجاتتارىن دايىنداۋ، قۇرىلىسىن باستاۋ، كوتتەدجدى قالاشىقتان ءۇي ءبولۋ، 7-20-25 باعدارلاماسى بويىنشا 1 ملن. تەڭدەگەن تۇرعىن ءۇي سەرتيفيكاتتارىن ءبولۋ، جوو-عا قوسىمشا 100 گرانت ءبولۋ، وسى ساناتتارداعى وتباسى بالالارىن مەكتەپتە تەگىن ىستىق تاماقپەن قامتۋ جانە باسقا دا شارالار اتقارىلاتىنىن ەگجەي-تەگجەيلى بايانداپ بەردى.
ەلباسىنىڭ سەزدە بەرگەن ناقتى تاپسىرمالارىن وبلىستا ساپالى ىسكە اسىرۋدى ورىنباسارلارىنا، جاۋاپتى باسقارما باسشىلارىنا، ءار اۋدان، قالا اكىمدەرىنە تاپسىرىپ، پارتيالىق جوبالاردىڭ ويداعىداي جۇزەگە اسىرىلۋىنا باعىتتالعان مىندەتتەر جۇكتەدى.
جارىسسوزگە شىققان رايىمبەك اۋداندىق پارتيا فيليالىنىڭ ءتوراعاسى، اۋدان اكىمى جولان وماروۆ جاڭادان قۇرىلعان اۋدانداعى پارتيالىقتار اتقارعان جۇمىستارعا قىسقاشا توقتالىپ ءوتتى: «جىل باسىنان از قامتىلعان، كوپبالالى وتباسىلار مەن ەرەكشە كۇتىمدى قاجەت ەتەتىن ازاماتتارعا 400 توننا كومىر، 2 ملن. تەڭگەگە ازىق تۇلىك، كيىم – كەشەك، سونىمەن قاتار قارجىلاي كومەك كورسەتىلدى. «مەكتەپ سپورت الاڭدارى» جوباسى اياسىندا شالكودە، تالاس، قاينار اۋىلدارىندا جاستار وزدەرى باستاما كوتەرىپ، وقۋشىلارعا ارنالعان كۇرەس زالدارىن، شاعىن سپورت كەشەندەرىن سالدى. وتكەن جىلى 20 كوممۋنالدىق تۇرعىن ءۇي پايدالانۋعا بەرىلسە، بيىل 83 تۇرعىن ءۇي سالىنادى دەپ جوسپارلانىپ وتىر»، - دەپ اتاپ كورسەتتى.
اكتيۆ وتىرىسىندا «اينالايىن» بالالار ءۇيى ديرەكتورىنىڭ تاربيە ءىسى جونىندەگى ورىنباسارى، كوپبالالى انا ءمولدىر جانايبەكوۆا پارتيانىڭ الەۋمەتتىك ماسەلەلەرگە دەن قويىپ، ەرەكشە كۇتىمدى قاجەت ەتەتىن بالالارى بار انالارعا مۇمكىندىكتەر قاراستىرىلعانىنا قۋانعانىن جەتكىزدى.
«كوپبالالى وتباسىلارىنا وسى ۋاقىتقا دەيىن مەملەكەت تاراپىنان بەرىلگەن جەڭىلدىكتەر مەن قامقورلىقتار ءبىزدىڭ جانۇيامىزعا دا كورسەتىلدى. مىنە بيىل ەكىنشى جىل، ءبىر بالامىز نازاربايەۆ زياتكەرلىك مەكتەبىندە، ەكىنشى بالامىز فيزيكا – ماتەماتيكا باعىتىنداعى دارىن مەكتەبىندە وقىپ ءجۇر. سەزدە كوپبالالى انالار ماسەلەسى قارالىپ، ءار بالاعا اي سايىنعى جاردەماقى مولشەرى ارتقانى قاتتى قۋانتتى»، - دەدى ءوز سوزىندە م. جانايبەكوۆا.
كاسىپكەرلەردىڭ پارتيالىقتارمەن بىرلەسە اتقارىپ جاتقان جۇيەلى جۇمىسىن «الماتينسكيە كراسكي» ج ش س ديرەكتورى، «Nur Otan» پارتياسىنىڭ XVIII سەزىنىڭ دەلەگاتى ريمما سالىقوۆا جەتكىزسە، جاستار اتىنان ءسوز العان الماس باتىرحان پارتيا قاتارىنا جاڭادان قوسىلعان جاس تولقىننىڭ اتىنان 20 جىلدىق مەرەيتويعا جىلى لەبىزىن ءبىلدىرىپ، جاستار جىلىندا جاس پاتريوتتاردىڭ الدىنا قويعان نەگىزگى باعدارلارىمەن تانىستىردى.
اكتيۆ قورىتىندىسىندا وبلىستىق فيليال ءتوراعاسى، وبلىس باسشىسى اماندىق باتالوۆ اۋدان، قالا اكىمدەرى مەن وبلىستىق باسقارما باسشىلارى، دەپۋتاتتار مەن سالا ماماندارىنا ءتيىستى تاپسىرمالار جۇكتەپ، ءىس-شارالار جوسپارىن ازىرلەۋدى جانە پارتيانىڭ جاڭا باعدارلاماسى بويىنشا جۇمىستى جۇيەلى جۇرگىزۋدى، ءىس-شارالاردىڭ مازمۇنى مەن قاجەتتىلىكتەرىن قايتا ءبىر قاراپ شىعۋدى تاپسىردى.
