اتىراۋ وبلىسى اكىمى نۇرلان نوعايەۆتىڭ ۇسىنىسىمەن جۇزەگە اسىرىلىپ جاتقان «ىسكەر انا» ايماقتىق جوباسىنىڭ اياسىندا جاڭا ماماندىقتى يەلەنۋدىڭ قىسقا مەرزىمدى كۋرستارىن جالعىزباستى انالاردىڭ، ەرەكشە بالالاردى تاربيەلەپ وتىرعان انالاردىڭ، وتباسىلىق تومەن انالاردىڭ تاعى ءبىر توبى ءتامامدادى دەپ حابارلايدى Qamshy.kz اقپارات اگەنتتىگى.

ەسكە سالا كەتەلىك، اتالمىش جوبانى «عاسىر» وقۋ ورتالىعىنىڭ نەگىزىندە «ازاماتتىق جوبا» جۇزەگە اسىرۋدا. «ازاماتتىق ورتالىق» ديرەكتورىنىڭ ورىنباسارى ەرجان ونعارالييەۆ اتاپ وتكەنىندەي، 55 سەرتيفيكاتتىڭ يەسى بۇل جولى «بۋحگالتەريا نەگىزدەرى»، «شاشتاراز»، «اسپاز»، «كادر قىزمەتى»، «اسەمدەۋشى» ماماندىقتارى بويىنشا ءدارىس وقىپ شىققان. ولاردىڭ ىشىندە اسپاز، شاشتاراز جانە كادر قىزمەتى ماماندىقتارى سۇرانىسقا كوپتەۋ يە بولدى. ءدارىس وقىعانى تۋرالى سەرتيفيكاتتاردى انالارعا اتىراۋ وبلىستىق ىشكى ساياسات باسقارماسى باسشىسىنىڭ ورىنباسارى ساعادات اجىعالييەۆ تابىستادى.

«ىسكەر انا» جوباسى بويىنشا ايەلدەردىڭ تاڭداۋىنا 12 ماماندىق ۇسىنىلىپ وتىر: تىگىنشى، اسپاز، مانيكيۋر شەبەرى، اسەمدەۋشى، شاشتاراز، بۋحگالتەر، ماسساجيست، اعىلشىن ءتىلى كۋرستارى، كومپيۋتەر كۋرستارى، ءىس جۇرگىزۋشى، ساتۋشى، الەۋمەتتىك جەلىلەردەگى ماركەتينگ. جوبانىڭ باستى ماقساتى - ايەلدەردىڭ جاڭا كاسىپ اشۋى.

ۇسىنعان: گۇلىم جاقان