سالماعى 200-230 كەلى تارتاتىن سۋمو بالۋاندارى كۇندەلىكتى قانداي تاماق تۇرلەرىن تۇتىنادى؟

سالماق – سۋمو بالۋاندارى ءۇشىن ۇلكەن ءرول وينايتىن سىرتقى قاسيەت. ارينە، جەكپە-جەكتە جەڭىسكە جەتۋ ءۇشىن فيزيكالىق دايىندىق، تەحنيكالىق تاجىريبە، ءتۇرلى ادىس-تاسىلدەردى مەڭگەرۋ قاجەت بولارى ءسوزسىز. دەگەنمەن، سپورتتىڭ سۋمو دەپ اتالاتىن ءتۇرى ءۇشىن سالماقتىڭ باسەكەلەستەن باسىم تۇسۋگە تيگىزەر ىقپالى كوپ.

سپورتتىڭ بۇل تۇرىنە جاڭادان كەلگەندەر مەن جەڭىل سالماقتا كۇش سىناساتىندار ءۇشىن مينيمالدى سالماق مولشەرى – 120 كەلى.

كۇندەلىكتى جۇمىس جاسايتىن، فيزيكالىق تۇرعىدا كوپ ارەكەت ەتەتىن ادام 3000 كالوريا تۇتىنادى. بۇل قاراپايىم ادام ءۇشىن جەتكىلىكتى. ءتۇرلى ادىستەرمەن اعزاعا كەلەتىن ەنەرگيا ءجۇرىس-تۇرىسقا، جۇمىس جاساۋ بارىسىندا قولدانىلادى. ال جينالعان كالوريا كۇندەلىكتى جۇمسالماسا، ادام تەز ارادا ارتىق سالماق جيناي باستايدى.

سۋمو بالۋاندارىنا ءساتتى مانساپ جاساۋ ءۇشىن سۇرالاتىن ءبىرىنشى تالاپ – سالماق جيناۋ. سوندىقتان، قاراپايىم ادام تۇتىناتىن 3000 كالوريا كاسىپقوي بالۋاندارعا جەتكىلىكسىز.

بالۋاندارعا كوپ تاماق تۇتىنۋ نە ءۇشىن قاجەت؟

سپورتتىڭ بۇل تۇرىنە كوپ جاعدايدا ورتا مەكتەپتى بىتىرگەن بالالار تارتىلادى. سۋمو كورپوراسيالارىمەن بىرگە اۋەسقوي توپتار دا بالالاردى تاربيەلەپ، شىنىققان بالۋاندارعا كۇندەلىكتى جاتتىعۋ جاساتا الادى. سۋمو بالۋانى بولۋ ءۇشىن سپورتتىڭ وسى تۇرىندەگى مانساتى 25 جاسقا دەيىن باستاپ ۇلگەرۋ قاجەت. دەمەك، وسى تيپتەگى سپورتقا قىزىعۋشىلىق تانىتقاندار ءۇشىن 20-25 جاس ارالىعىندا ايتارلىقتاي سالماق جيناۋ شارت.

قوماعايلانا اس ءىشىپ، سەمىرۋ ارقىلى سپورتشى بولۋ مۇمكىن بە؟

ەگەر جوعارىدا ايتىلعان ۇدەرىس سۋمودا جۇرەتىن بولسا، كەر جالقاۋلاردىڭ كوپشىلىگى ازۋىن ايعا بىلەگەن سپورتشى بولىپ شىعار ما ەدى، بالكىم؟!

ءبىراق بارلىعى ءبىز ويلاعانداي قاراپايىم ەمەس. كاسىپقوي سۋمو بالۋانداردىڭ كۇن ءتارتىبى وتە قاتاڭ رەجيمدە وتەدى. تاڭەرتەڭگى ۋاقىتتا 5 ساعات جاتتىعۋ. نازار اۋدارىڭىز! اش قارىنعا! 5 ساعاتتىق جاتتىعۋدان كەيىن ىستىق ۆاننا قابىلداۋ شارت. مىنە، وسىدان كەيىن بارىپ قانا تاماقتانۋعا رۇقسات. تۇيەنى تۇگىمەن، بيەنى بۇگىمەن جەيتىندەي تابەتتىڭ يەلەرى تاماققا تويىپ، ارتىنشا دەرەۋ ۇيقىعا جاتادى. بەلگىلى مولشەردەگى ۇيقىدان سوڭ قايتا جاتتىعۋ ورىندالىپ، سودان كەيىن كەشكى اسقا مۇرسات بەرىلەدى ەكەن.

سپورتتىق مانسابىندا جاقسى ناتيجەلەر كورسەتۋ ءۇشىن بالۋاندار قۇنارلى تاماق جەپ، كوپ ەنەرگيا جيناۋعا ءماجبۇر. وسى تالاپتىڭ ورىندالۋى سەبەبىنەن بالۋانداردىڭ دەنەسىندەگى مايدىڭ كولەمى 14-16 پايىزدى قۇرايدى.

قىزىقتى مالىمەت!

سالىستىرالىق. ەرەسەك جاپون ازاماتىنىڭ دەنەسىندەگى مايدىڭ مولشەرى، ادەتتە، 15-19 پايىزدى قۇرايدى. ءبىراق ولار ارىقشا ءارى سىمباتتىراق كورىنەدى. ال سالماعى 200 كەلىدەن جوعارى تارتاتىن سۋمو بالۋانىنىڭ دەنەسىندەگى مايدىڭ مولشەرى – 14-16 پايىز.

ءسىز بەن ءبىز قارىنى سالبىراپ، جارىلارداي بولىپ جۇرگەن بالۋانداردىڭ دەنساۋلىعى قاراپايىم ادامدارعا قاراعاندا الدەقايدا مىقتى. سونىمەن قاتار، ولاردىڭ بۇلشىق ەتتەرى دە جىلدام جۇمىس جاسايدى.

قىسقا ۋاقىت ىشىندە قالاي 120 كەلى سالماق جيناۋعا بولادى؟

120-130 كەلى سالماق – سۋمو سپورتىندا بۇل جولعا جاڭا قادام باسقانداردىڭ سالماعى. جوعارى ليگا قاتىسۋشىلارىنىڭ سالماعى بۇل سيفرلاردى ەكى-ۇش ەسەلەيدى.

سۋمو تاريحىنداعى رەكوردتى سالماقتىڭ يەسى – بۇرىنعى چەمپيون، گاۆايلىق كونيسيكي ياسوكيتي. ونىڭ سالماعى 275 كەلىنى قۇراعان. ءوز مانسابىندا كونيسيكي ءۇش رەت يمپەراتور كۋبوگىن ۇتىپ العان جانە 6 جىل بويى «ودزەكي» تيتۋلىن ۇستاپ تۇرعان.

جوعارى ليگا سپورتشىلارىنىڭ ورتاشا سالماعى – 200-230 كەلى. مۇنداي سالماقتى تۇراقتى ۇستاپ تۇرۋ ءۇشىن نەمەسە جيناۋ ءۇشىن كۇنىنە 20000 كالوريا تۇتىنىپ، كوپ جاتتىعۋ جاساۋ قاجەت. بالۋاندار تۇستە جانە كەشكە عانا تاماق ىشەدى. دەمەك، ولار بارلىعىن وسى ەكى مەزگىلدە ىشىپ-جەپ ۇلگەرۋى شارت. سپورتشىلار كوڭىلدەرى قالاعان نارسەنى جەيدى. ءتىپتى، كەيبىرەۋلەرى ءسپيرتتى ىشىمدىكتەردەن دە باس تارتپايدى.

رەسەيلىك سۋمو بالۋانىنىڭ تاريحى

الەمگە امۋر ميسۋحيرو اتىمەن تانىمال رەسەيلىك بالۋان نيكولاي يۆانوۆ ءوزىنىڭ بۇل سپورتقا قالاي كەلگەنىن ەسىنە الادى.

2002 جىلى سۋموعا كەلگەن نيكولايدىڭ بويى 193 سم، ال سالماعى نەبارى 80 كەلى بولعان. ال كاسىپقوي سپورتتا بۇل سالماقپەن ەشقانداي جەتىستىككە جەتۋ مۇمكىن ەمەس. نيكولاي ءوزىنىڭ ارمانىن ورىنداۋ ءۇشىن ەڭبەك ەتە باستادى.

امۋردىڭ ايتۋىنشا، ول كۇنىنە سۋعا قايناتىلعان كۇرىشتىڭ بەس تاباعىن، ودان بولەك سپاگەتتي، قۋىرىلعان ەت، كوتلەت، ءبالىش جانە «چيانكو» دەپ اتالاتىن جاپونداردىڭ ءداستۇرلى سورپاسىن تۇتىنعان. ادەتتە، سۋمو بالۋاندارى كۇنىنە ەكى رەت تاماقتانادى. ءبىراق نيكولاي ءوزىنىڭ ماقساتىنا جەتۋ ءۇشىن ءتۇرل تاسىلدەرمەن تاماق ىشكەن. كەيدە ءوزىن تاماق جەۋگە ماجبۇرلەگەنىن دە جاسىرمايدى.

 امۋر ميسۋحيرونىڭ ارمانى ورىندالدى. 2017 جىلى ونىڭ سالماعى 138 كەلىنى قۇراعان. سپورتشىنىڭ قورجىنىنداعى كوپتەگەن تۋرنيرلەردە جەڭىسكە جەتكەن بايگەلەرىن ەسەپتەسەك، ونىڭ «كاسىپقويلىق» دەڭگەيىنە كوتەرىلگەنىنە كوز جەتكىزەمىز.

2018 جىلدىڭ مامىر ايىندا اۋىر جاراقات العان نيكولاي مانسابىن اياقتاۋعا ءماجبۇر بولدى. دەسە دە، ول ءالى كۇنگە دەيىن سۋمو سپورتىندا بيىك بەلەستەردى باعىندىرعان جالعىز رەسەيلىك بولىپ قالدى.

اۋىر سالماق جيناۋدى تالاپ ەتەتىن سپورتتىڭ بۇل ءتۇرى بالۋانداردى ءبىرشاما دەرتكە شالدىقتىرادى. اسقازان-ىشەك قۇرىلىسى مەن اس قورىتۋ جۇيەسىنىڭ بۇزىلاتىنى، ادەتتەگى جۇمىس ىستەۋ داعدىسىن جوعالتاتىنى ايتپاسا دا بەلگىلى.

سۋمو بالۋاندارى قاراپايىم جاپون ازاماتىنا قاراعاندا، 10 جىل ەرتە ومىردەن وتەدى ەكەن.