سەناتورلار تاجىكستان-اۋعانستان شەكاراسىن نىعايتۋ ماقساتىندا قازاقستاننىڭ اسكەري مۇلىك پەن وق-جابدىقتارىن بەرۋگە شەشىم قابىلدادى، دەپ جازادى Qamshy.kz اقپارات اگەنتتىگى Tengrinews.kz سايتىنىڭ دەرەگىن نەگىزگە الىپ.

«تاجىكستان مەن اۋعانستان شەكاراسىنداعى جاعداي كۇننەن-كۇنگە ناشارلاپ بارادى. شەكارا بەلدەۋىندە كۇندەلىكتى تەرروريستىك توپتارمەن قارۋلى قاقتىعىستار ورىن الىپ، ولار ءىرى كولەمدە ەسىرتكى كىرگىزۋدى كوزدەپ وتىر. سوندىقتان دا تاجىكستانعا اسكەري مۇلىك ارقىلى كومەك بەرۋ وتە ورىندى ءارى ورتالىق ازيانىڭ قاۋىپسىزدىگىن ساقتاۋعا  سەپتىگىن تيگىزەدى»، - دەپ ايتتى سەناتور تالعات مۇسابايەۆ.

زاڭ جوباسىندا كورسەتىلگەندەي، قازاقستان دۋشانبە قالاسىنداعى «روحاتي» ستانسياسىنا قارۋ-جاراقتاردى جەتكىزۋ شىعىنىن تولىقتاي ءوز مويىنىنا الادى، ال تاجىكستان اسكەري مۇلىكتى ءۇشىنشى جاققا  جىبەرمەۋگە مۇددەلى.

«كەلىسىم بويىنشا تاجىكستانعا بەرلەتىن اسكەري مۇلىكتەردىڭ ىشىندە وق-دارىلەر، اۆياسيالىق جانە ارتيللەريالىق جابدىقتار، بيولوگيالىق جانە حيميالىق قورعاۋ جابدىقتارى جانە مەديسينالىق كومەك كورسەتۋگە ارنالعان جابدىقتار بار»، - دەدى تالعات مۇسابايەۆ.

ونىڭ ايتۋىنشا، تاجىكستانعا اسكەري ءوق-دارى جابدىقتارمەن كومەك كورسەتۋ قازاقستاننىڭ قارۋلى كۇشتەرىنە ەشقانداي  كەرى اسەرىن تيگىزبەيدى.

ۇسىنعان: نازەركە لابيحان