اقپارات اعىمى جىلدامدىعىن شەكتەن تىس اسىرعان ۋاقىتتا ادامنىڭ ەستە ساقتاۋ قابىلەتىنىڭ دە قاۋقارى تومەندەيتىنى بەلگىلى. قاجەتتى-قاجەتسىز، ماڭىزدى-ماڭىزسىز اقپاراتتار ورتاسىندا ءجۇرىپ، ەستە ساقتاۋ قابىلەتىن ارتتىرۋدىڭ جولىن تابۋعا بولادى ەكەن.
تومەندەگى التى ءتۇرلى ءادىس-تاسىلدى وقىڭىز، مۇمكىن كەرەگىڭىزگە جاراپ قالار.
مىسالى، دەنە ءبىتىمىنىڭ سۇلۋلىعىن ارتتىرۋ ءۇشىن ءتۇرلى دەنە شىنىقتىرۋ جاتتىعۋلارى جاسالىنادى. ال ءبىز ميدىڭ جۇمىسى مەن جاد جاعدايىن جاقسارتۋ ءۇشىن قانشا ۋاقىت ءبولىپ، نە جاساپ ءجۇرمىز؟
باستىسى – جاد جۇمىسىن جاقسارتۋ ءۇشىن، تۋعان كۇندەر مەن ايتۋلى داتالاردى، تاپسىرمالار مەن ويعا العان ىستەردى ۇمىتپاۋ ءۇشىن بىرنەشە ساعات ۋاقىتتى قۇربان ەتپەيسىز.
- وتىرۋ مانەرىن قالىپقا كەلتىرىڭىز
ۇستەل الدىندا كۇنى بويى وتىرۋ ءسىزدىڭ مويىنىڭىز بەن يىعىڭىزعا كۇش ءتۇسىرىپ، كەشەگى جينالىستا باسشىنىڭ قانداي تاپسىرما بەرگەنىن ۇمىتىپ قالۋىڭىز مۇمكىن. سان-فرانسيسكو ۋنيۆەرسيتەتىنىڭ عالىمدارىنىڭ دالەلدەۋىنشە، ۇستەل الدىندا يەكتى كوتەرىڭكىرەپ، مويىندى، ارقانى ءتۇزۋ ۇستاپ وتىرۋ – ەستە ساقتاۋ قابىلەتىن ارتتىرۋعا كومەكتەسەتىن ۇزدىك تاسىلدەردىڭ ءبىرى. ويتكەنى، مۇنداي قالىپتا ميعا باراتىن قان مەن وتتەگىنىڭ مولشەرى 40 پايىزعا دەيىن ارتادى ەكەن.
- كۇلكىگە ۋاقىت ءبولىڭىز
مىنە، ەندى سىزدە جۇمىستان كەيىن سۇيىكتى كومەديالىق كينوڭىزدى كورۋگە سەبەپ بار. لوما ليندا ۋنيۆەرسيتەتىنىڭ پروفەسسورلارى جاس شاماسى ءتۇرلى توپتاردى ەكى قاتارعا ءبولىپ، ءبىر بولىگىنە 20 مينۋتتىق كومەديا كورسەتكەن. ال ەكىنشى توپتى تىنىش جەردە ۇستاعان. ارتىنشا ەستە ساقتاۋ قابىلەتىن تەكسەرەتىن تەست وتكىزىپ، كومەديا كورگەن توپتىڭ ايتارلىقتاي وزىق شىققانىن دالەلدەدى.
كورتيزول (سترەسس گورمونى) مولشەرىنىڭ كومەديا كورگەن توپتا از مولشەردە بولىپ، تەستتە ۇزدىك ناتيجە كورسەتۋگە سەبەپ بولىپتى-مىس.
- مەديتاسيامەن اينالىسىڭىز
ادامدار وزدەرىنىڭ مي تالشىقتارىن، نەيرونداردى قالىپقا كەلتىرىپ جانە دەمالدىرىپ وتىرۋى ءتيىس. سول كەزدە ەستە ساقتاۋ قابىلەتىنىڭ دەڭگەيى ارتا تۇسپەك.
بىرنەشە ساعاتتاردان تۇراتىن جاي عانا مەديتاسياعا قاراعاندا، ءپوزيتيۆتى جانە ەموسياعا تولى مەديتاسيانىڭ كومەگىنە جۇگىنگەن ءجون.
- تاڭعى جۇمىستاردىڭ سانىن ارتتىرۋ
ۇيقىدان تۇرعاننان كەيىنگى العاشقى ارەكەت – كۇنى بويى جاسايتىن جۇمىستارىڭىزدىڭ باستاۋى. تاڭعى جاتتىعۋلار، مۋزىكا تىڭداۋ، كوفە ءىشۋ، قىسقا ۆيدەولار كورۋ دەگەندەي...
كۇندەلىكتى جاسالىنۋى ءتيىس، ءبىراق ۇمىت قالا بەرەتىن دۇنيەلەردى اسا قاجەت زاتتارمەن، ارەكەتتەرمەن بايلانىستىرىپ قويىڭىز. ال قاعيداعا اينالىپ كەتكەن قارەكەتتەر وڭايلىقپەن ۇمىتىلمايدى.
- جەمىس-جيدەكتەرمەن قورەكتەنىڭىز
ادامداردىڭ كوپشىلىگى جادىنىڭ جۇمىس جاساۋ دەڭگەيىن ارتتىرۋ ماقساتىندا مەديسينالىق كومەك الىپ، دارۋمەندەرگە، حيميالىق دارى-دارمەكتەرگە سۇيەنىپ جاتادى.
ال ولاردى تابيعي جولمەن، ياعني، جەمىس-جيدەكتەردى كۇندەلىكتى قولدانۋ ارقىلى قابىلداۋعا بولادى. ءتۇرلى جەمىستەر ميدىڭ كۇش-قۋاتىن ارتتىراتىنى - ۋاقىتپەن دالەلدەنگەن دۇنيە.
- قاجەتتى ارەكەتتەردىڭ سۋرەتىن سالۋ
ۆاتەرلوو ۋنيۆەرسيتەتىنىڭ قىزمەتكەرلەرى ىس-ارەكەتتىڭ سۋرەتىن سالۋ ارقىلى ەستە ساقتاۋ قابىلەتىن ارتتىرۋعا بولاتىنىن العا تارتىڭىز. سىزگە سۋرەتشى بولۋ ماقسات ەمەس، تەك ءوزىڭىزدىڭ تۋىندىڭىز وزىڭىزگە تۇسىنىكتى بولسا جەتكىلىكتى.
