ۇستىمىزدەگى جىلدىڭ 28 ناۋرىزىندا الماتى قالاسى بويىنشا سوت ساراپتامالارى  ينستيتۋتىندا وسى ينستيتۋتتىڭ، الماتى قالاسى ءبىلىم بەرۋ باسقارماسىنىڭ، تىلدەردى دامىتۋ باسقارماسىنىڭ، الماتى قالاسى جوو-لارى ۇيىمداستىرۋىمەن «مەملەكەتتىك ءتىلدىڭ لاتىن گرافيكاسىنا بىرتىندەپ اۋىسۋ ماسەلەلەرى» تاقىرىبىندا دوڭگەلەك ۇستەل ءوتتى. اتالمىش شارا الماتى قالاسى بويىنشا سوت ساراپتامالارى  ينستيتۋتىنىڭ جالپى ماسەلەلەرى بويىنشا ديرەكتوردىڭ ورىنباسارى ا.ا. ەرمەكوۆتىڭ مودەراتورلىعىمەن ءوتتى. دوڭگەلەك ۇستەلگە الماتى قالاسىنىڭ تىلدەردى دامىتۋ جانە لاتىن گرافيكاسىنا كوشۋ ورتالىعىنىڭ وكىلى ن.ر. شايمەردەنوۆ، بوستاندىق اۋدانىنىڭ ءبىلىم بەرۋ باسشىسى ق.ا. ابديماناپوۆا، ءال-فارابي اتىنداعى قازۇۋ-دىڭ وقىتۋشى-پروفەسسورلارى د.ا. الكەبايەۆا، ل. ت. الىمتايەۆا، ك.ق. كۇركەبايەۆ، گ.ش. اكيمبەكوۆا، ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ دوسەنتى ب. يحسان ت.ب. عالىمدار قاتىستى.

ءبىرىنشى كەزەكتە ءسوز العان تىلدەردى دامىتۋ جانە لاتىن گرافيكاسىنا كوشۋ ورتالىعىنىڭ وكىلى ن.ر. شايمەردەنوۆ ەلباسىنىڭ قازاق ءتىلىن لاتىن گرافيكاسىنا 2025 جىلعا دەيىن كەزەڭ-كەزەڭىمەن كوشىرۋ جوسپارىمەن تانىستىرا وتىرىپ وتكەن جىلى ءالىپبيدىڭ بەكىتىلگەنىن،  ەملە ەرەجەلەرىنىڭ جوباسى ۇسىنىلعانىن اتاپ ءوتتى. ءبىر اپتا بۇرىن عانا ش. شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىندا لاتىن گرافيكاسىنا نەگىزدەلگەن ەملە ەرەجەلەرىن مەڭگەرتۋ ءۇشىن بارلىق وبلىستاردا ترەنەرلەر دايىنداۋ ماقساتىندا 72 ساعاتتىق كۋرس اشىلعاندىعىن ايتتى. بۇل كۋرستا جاڭا ءالىپبي قۇرىلىمى، مازمۇنى ورفوگرافيالىق جانە ورفوەپيالىق ەرەجەلەر، شەت تىلدەن ەنگەن سوزدەر ەملەسى ت.ب. قوعامنىڭ لاتىن نەگىزدى ءالىپبيدى يگەرۋدەگى قاجەتتىلىكتەرىنە ساي جۇرگىزىلەتىندىگىن ايتتى.

پروفەسسور د. الكەبايەۆا، دوسەنت ب. يحسان، دوسەنت ك. كۇركەبايەۆتار جاڭا ەملە ەرەجەلەرىن يگەرۋدەگى تۇيتكىلدى ماسەلەلەرگە توقتالىپ، ءالى دە جەتىلدىرە تۇسۋگە باعىتتالعان ءوز ۇسىنىس پىكىرلەرىن جەتكىزدى. ءال-فارابي اتىنداعى قازۇۋ-دىڭ دوسەنتى ل. الىمتايەۆا قازاق ءتىلىن لاتىن گرافيكاسىنا 2025 جىلعا دەيىن كەزەڭ-كەزەڭىمەن كوشىرۋ جونىندەگى جوسپارىنا سايكەس ورفوگرافيالىق جۇمىس توبىنىڭ 2019 جىلعى ءىس-شارالارى جوسپارى بويىنشا ەملە ەرەجەلەرىن ناسيحاتتاۋعا ارنالعان ادىستەمەلىك ونىمدەردى ازىرلەۋ قولعا الىنعاندىعىن، اتاپ ايتقاندا،  جوو ستۋدەنتتەرىنە ارنالعان جاڭا ەملە ەرەجەلەرىن يگەرتۋگە ارنالعان ادىستەمەلىك نۇسقاۋلىق؛ رەسمي-ىس قاعازدارىنىڭ نۇسقاۋلىعى؛ جارناما ماتىندەرىنە قاجەتتى ەملە نۇسقاۋلىعى؛ كوپشىلىككە ارنالعان ەملە ەرەجەلەرىن تۇسىندىرەتىن قىزىقتى انىقتاعىش؛ وبلىس، قالا، اۋدان ەرگونيمدەردىڭ، ماڭدايشالاردىڭ كيريل-لاتىن الىپبيىندەگى پاراللەل انىقتامالىقتارى قامتىلعاندىعىن اتاپ ءوتتى.

وقىتۋشى-پروفەسسورلارعا سوت ساراپتامالارى  ينستيتۋتى قىزمەتكەرلەرى تاراپىنان قويىلعان سۇراقتاردىڭ دەنى  لاتىن گرافيكاسىنا نەگىزدەلگەن جاڭا ەملە ەرەجەلەرىنە قاتىستى  بولدى.

ل.ت. الىمتايەۆا

ءال-فارابي اتىنداعى قازۇۋ-دىڭ
دوسەنتى، فيلول.ع.ك.